Read turkana Ngilawi 14 Bible Online

Ngilawi 14 - turkana bible

Ngilawi 14

²“Ngitalio lugu kesi lu italeunere itwaan nisek adeaka enomokere, tangalek enomokere ngolo. Akolongit na elimunere atamar erai itwaan ngini ni italeuno, erikunio ngesi nia emuron a Akuj.

³Elosi emuron kiseme ngesi anikalapatan a adakar. Ani kengalekinit edeke,

⁴elimuni emuron atamar yaunae ngikieny ngiarei lu italeunitoe, aapei ka akitoe a echekereng, ka auno naarengan eluguritoe, ta akuyen a ekitoe alobe isopo.*g**

⁵Elimuni emuron atamar taarae ikeny ipei anatubwa ana esubunitae alochoto, ana eyakasi ngakipi naajokak a elelea.

⁶Elemari emuron ikeny niche ni eyari, aapei ka akitoe a echekereng, ka auno naarengan na eluguritoe, ta akuyen a ekitoe alobe isopo, sodi kiwaak daang naakot a ikeny ani aario.

⁷Itwaan ni italeunio alonomokere, ewatakini emuron ngesi ngaakot, ngawatakinet ngakan-kaarei, ani erumor tolim emuron atamar angaleki itwaan ngini. Imiekini ngesi ikeny ni eyari toporo tolot naroatin.

⁸Ilotari itwaan ngini ngiworui keng, tabanya ngitim daang, sodi kilotar. Eliwor itwaan ngini ni italeuno. Ani erumor, elomuni ngesi nadakar nakaneni iboikin nikalapatan a eam keng ngirwa ngikan-kaarei.

⁹ Ani akolongit na ngakan-kaarei, ebanyi ngesi nabo akou keng, ka abokony, ka ngakiir, ta ngajul nache daang na eyakasi nakwaan keng. Ilotari itwaan ngini ngiworui ka akwaan keng, sodi toliwor ni italeuno.

¹⁰“Akolongit na a ngakan-kauni, eyauni ngesi ngimesekin lukiliok ngiarei lu ediseak, ka imesek niberu ni erai ekaru epei, ni emam ni ichwangakina. Eyauni tani ngakiloi ngauni a ngakiria ana imorikinitae ka akimiet, ta atiaket apei anauni a alita a apei a akimiet.

¹¹Emuron lo italeuni itwaan ngini, erikori ngesi nakituk a eam a Akuj ka ngakipeyos keng aapei.

¹²Elemuni emuron imesek nikile ipei ka atiaket apei anauni a alita a akimiet, tolem erai akipeyos a atachanot. Elemuni ngesi erai akipeyos na iwakiwakio ani Ekapolon Akuj.

¹³Eari ngesi imesek ngini ani italeuno, ani palem eareenere ngibaren a ngakipeyos akisech, ka ngakipeyos na inomio tonomiasi. Ejoikinit ngesi esubi kongina kainyo ngakipeyos a atachanot ka ngakipeyos na inomio tonomiasi, eraakasi daang ngaka emuron, nabo italeunitoe noi.

¹⁴Elemuni emuron ngaakot ngache a imesek kiwasak lobonibonit a akit ana aloteten, ka lokimoin loapolon a akan ana aloteten, ta ekimoin loapolon a akeju ana aloteten, a itwaan ani edikino elimunio atamar italeuno.

¹⁵Elemuni emuron akimiet a ngikito ache, tobukok lotau a akan keng ana alokedieny,

¹⁶sodi kilumok ekimoin a akan keng ana aloteten nakimiet ngina, towatak itwaan ni italeo ngawatakinet ngakan-kaarei alongaren Ekapolon Akuj.

¹⁷Elemuni emuron akimiet ache na idongi lotau a akan keng ana alokedieny kiwasak itwaan ni italeo ngini lobonibonit a akit keng ana aloteten, ka lokimoin loapolon a akan ana aloteten, ta ekimoin loapolon a akeju ana aloteten, kimorikin ka ngaakot nasek ewasakinio neni.

¹⁸Idokakini emuron akimiet nache na idongi lotau a akan keng, nakou a itwaan ani italeo. Ani kikok emuron neni, italeuni itwaan ngini ani Ekapolon Akuj.

¹⁹“Ipeye emuron akipeyos a akisech kitaleunio itwaan ngini. Ani kikok neni kerumor, eari ibarasit a akipeyos ana inomio tonomia

²⁰sodi tolem ka akipeyos a ngalemet alokeno a Akuj. Alorot kangolo, italeuni emuron itwaan ngini toliwor ngesi ni italeuno.

²¹“Ani kiboosit itwaan tokuruwo alemun ngiboro ngulu, ejoikinit elemuni imesek nikile ipei erai akipeyos a atachanot. Eliwor akipeyos a Ekapolon Akuj na iwakiwakio. Eyauni ngesi akilo apei a ngakiria ana imorikina ka akimiet erai akipeyos a ngalemet, ta atiaket apei anauni a alita a apei a akimiet a ngikito.

²²Eyauni ngesi tani ngakurio ngaarei, kori takidomelio ngaarei, erai apei aka akipeyos a akisech, tarai nache aka akipeyos ana inomio tonomia.

²³Akolongit na a ngakan-kauni italeere itwaan ngini, eyauni ngesi kesi nia emuron a Akuj anakituk a eam.

²⁴Elemari emuron imesek nikile ka atiaket apei anauni a alita a apei a akimiet a ngikito, sodi tolem erai akipeyos na iwakiwakio ani a Ekapolon Akuj.

²⁵Eari ngesi imesek nikile ni erai ika akipeyos a akisech ngini kiwasak ngaakot ngache lobonibonit a akit keng ana aloteten, ka lokimoin loapolon a akan ana aloteten, ta ekimoin loapolon a akeju ana aloteten, a itwaan kangini.

²⁶Ebukokini emuron akimiet ache lotau a akan keng ana aloteten.

²⁷Ani erumor towatak emuron itwaan ngini akimiet a ekimoin keng a akan ana loteten, ngawatakinet ngakan-kaarei, alongaren Ekapolon Akuj.

²⁸Iwasakini emuron itwaan ngini akimiet lobonibonit a akit keng ana aloteten, ka lokimoin loapolon a akan keng ana aloteten, ta ekimoin loapolon a akeju ana aloteten.

²⁹Ani ngaakot nache idongete, idokakini ngesi nakou a itwaan kangini, sodi kitaleunio ngesi.

³⁰Ani erumor tolem ikeny ni cha keyei, kerai akuuri kori kidomelio

³¹toliwor akipeyos a akisech, nabo tolem akipeyos na inomio tonomia toliwor akipeyos a ngalemet. Elemuni nabo tani akipeyos a ngalemet, sodi kitaleu emuron itwaan ngini ani a Ekapolon Akuj.

³²Erai ngolo etal a itwaan ani edeaka enomokere, nakaneni nyepedori alemuni akipeyos napalem ipeyoeneo kotere edeke ngolo.”

³³Tolimok Ekapolon Akuj Musa ka Aron tama,

³⁴“Ani ilomarete esi nakwap a Kanaan nakainak ayong esi toliwor akus, sodi ewaak ayong Ekapolon Akuj erukopus nawas a akai a adio anakwap ana eliwor akus,

³⁵ejoikinit itwaan a akai kangina elimokini emuron tama, ‘Esibit eyei erukopus kai kang.’

³⁶Elimuni emuron atamar kipudoroe ngiboro daang nikalapatan eringa ngesi nyeloto akisemere akai ngina. Ani pekipudor ngiboro nikalapatan, epedorio alimun atamar eraakasi ngiboro daang lu eyakasi neni lu nyitaleuno. Ani erumor elosi emuron

³⁷akisemere erukopus. Ani keyakasi ngakemera napusiek kori naarengak esibit kichukuliyoro awas,

³⁸erotokini ngesi alokai togol tanang ngirwa ngikan-kaarei edaunosi.

³⁹Ebonguni ngesi nabo akolongit na ngakan-kaarei kiseme. Ani kepetakina erukopus ngolo nawas a akai,

⁴⁰elimuni ngesi atamar tolemarae ngamoru na eyei erukopus, tachakakinae wadio ni nyitaleunitoe anikalapatan a ere.

⁴¹Ani erumor elimuni ngesi atamar kikisarae ngikwaasea a akai daang lu alotooma sodi tochakakinae ngalup na eraraunosi wadio ni nyitaleunitoe anikalapatan a ere.

⁴²Elemunio ngamoru nakitet todukokinae nisek ekisario, ipuchakinio nabo akai ngina kilalakinae.

⁴³“Ani ketakanuu erukopus nabo alokai kelemar ngamoru kikisae akai kilalakinae,

⁴⁴elosi emuron kingolik. Ani kepetakina erukopus kai ngina, erai akai ngina na nyitaleunitoe.

⁴⁵Ejoikinit akai ngina ebwangio sodi tolemunae ngamoru keng, ka ngakito keng, ta ngalup keng na eraraunosi daang yaarae nikalapatan a ere ni nyitaleunitoe.

⁴⁶Itwaan cha daang ni elomari kai ngina eringa egolitoe, eliwor ni nyitaleunitoe tanang ebong.

⁴⁷Itwaan ni inapakin kori ni imuji alokai kangina, ejoikinit ilotari ngakan.

⁴⁸“Nakaneni ani kebu emuron akisemere; torukau erukopus eringa nyetakanuuna kipuchakin akai kilalakinae torumor, elimuni atamar erai akai na italeunitoe, kainyo adaun erukopus jik.

⁴⁹Ani esakio akitaleun akai ngina, elemuni ngesi ngikieny ngiarei, ka akitoe a echekereng, ka auno naarengan eluguritoe, ta akuyen a ekitoe be isopo.*g**

⁵⁰Eari ngesi ikeny ipei anatubwa ana esubunitae alochoto ana eyakasi ngakipi naajokak a elelea.

⁵¹Sodi tolem emuron akitoe a echekereng, ka akuyen a ekitoe alo be isopo, ka auno naarengan eluguritoe, ta ikeny ni eyari, sodi kiwaak daang naakot a ikeny ani aario, kiwaak nabo tani nakipi naajokak.

⁵²Ani kikok ngesi neni, italeuni akai a ngaakot a ikeny, ka ngakipi naajokak, ka akitoe a echekereng ka akuyen a ekitoe be isopo, ta auno naarengan eluguritoe.

⁵³Imiekini ngesi ikeny ni eyari toporo tolot naroatin. Ani kikok ngesi neni, italeuni akai, sodi toliwor na italeuno.

⁵⁴“Eraakasi ngulu ngitalio a enomokere kadaang,

⁵⁵ka loper, ka erukopus lo eyei kai, kori loworui,

⁵⁶ka abus, ka elepunait, ta ajeme,

⁵⁷sodi toyenere atamar nyitaleuno kori italeuno. Erai ngolo etal a enomokere.”