Read turkana Ngilawi 15 Bible Online

Ngilawi 15 - turkana bible

Ngilawi 15

¹Todungok Ekapolon Akuj Musa ka Aron tama,

²“Ani keleleut ngabulon anamir a ekile, eraakasi ngabulon nguna na nyitaleunitoe,

³erai keringa ngabulon eleleete anamir kori ketubub ngabulon nguna.

⁴Ekitanda cha daang lo iboikin ngesi kori lo inapakin, erai lo nyitaleuno.

⁵Itwaan cha daang ni etapi ekitanda a itwaan kangini

⁶kori ni iboikin nisek ebooyo itwaan ngini, ejoikinit ilotari ngiworui keng ka akwaan keng, nakaneni eliwor ngesi ni nyitaleunitoe tanang ebong.

⁷Itwaan cha daang ni etapi itwaan ni eleleete ngabulon, ejoikinit ilotari ngiworui keng ka akwaan keng, nakaneni eliwor ngesi ni nyitaleunitoe tanang ebong.

⁸Ani kimoak itwaan ni eleleete ngabulon itwaan ni italeunitoe, ejoikinit itwaan ngini ilotari ngiworui keng ka akwaan keng, nakaneni eliwor ngesi ni nyitaleunitoe tanang ebong.

⁹Ekicholong lo iboikin itwaan ni eleleete ngabulon alotiengit alo edoki ngesi, eliwor lo nyitaleunitoe.

¹⁰Itwaan cha daang ni etapi ibore ni ebooyo itwaan ngini, eliwor ni nyitaleuno tanang ebong. Ani itwaan cha daang ni iwoki ibore ni erai ika itwaan kangini, ejoikinit ilotari ngiworui keng ka akwaan keng, nakaneni eliwor ngesi ni nyitaleuno tanang ebong.

¹¹Ani ketap itwaan ni eleleete ngabulon itwaan eringa ngesi nyilotara ngakan keng, ejoikinit itwaan ni atapio ngini ilotari ngiworui keng ka akwaan keng, nakaneni eliwor itwaan ni atapio ngini ni nyitaleuno tanang ebong.

¹²Amot nalupe daang na etapi itwaan ni eleleete ngabulon, ejoikinit ebwangio. Ani atubwa nakitoe etapi itwaan ngini, ejoikinit ilotario.

¹³“Ani kengaleki edeke a itwaan ani eleleete ngabulon, ejoikinit ngesi idari ngirwa ngikan-kaarei edaunosi. Ani erumor, kilota ngesi ngiworui keng, ka akwaan keng anakipi a elelea anaajokak, nakaneni eliwor ngesi ni italeuno.

¹⁴Akolongit na a ngakan-kauni, eyaari ngesi ngakurio ngaarei kori takidomelio ngaarei nakituk a eam a Ekapolon Akuj sodi nak emuron a Akuj.

¹⁵Elemuni emuron apei toliwor akipeyos a akisech, sodi tolem nache erai akipeyos na inomio. Kotere eger ngolo, esubakini ngesi etal lo akitaleun.

¹⁶“Ani keleleete ekile ngadwa, ejoikinit ngesi ilotari akwaan keng daang, nakaneni eliwor ngesi lo nyitaleuno tanang ebong.

¹⁷Eworu daang lo edokakin ngadwa nguna kori eleu, ejoikinit ilotario, nakaneni eliwor ibore ngini ni nyitaleuno tanang ebong.

¹⁸Kepero ekile ka aberu, ejoikinit kesi daang ilotarosi, nakaneni eliworosi kesi lu nyitaleuno tanang ebong.

¹⁹“Aberu na ibooyi eyei lolap, eliwor na nyitaleuno a ngirwa a ngikan-kaarei. Itwaan cha daang ni etapi ngesi eliwor nyitaleuno tanang ebong.

²⁰Ibore cha daang ni eperio ngesi kori ni iboikinor ngirwa lu eyakar lolap, eliwor ni nyitaleuno.

²¹Itwaan cha daang ni etapi ekitanda a aberu kangina, ejoikinit ilotari ngiworui keng ka akwaan keng, nakaneni toliwor nyitaleuno tanang ebong.

²²Itwaan cha daang ni etapi ibore ni ibooyo aberu ngina, ilotari ngiworui keng ka akwaan keng, nakaneni eliwor ni nyitaleuno tanang ebong.

²³Ekile cha daang lo etapi ibore cha daang ni eperio aberu ngina kori ni iboikinor, eliwor lo nyitaleuno tanang ebong.

²⁴Ani kepero ekile ka aberu ngina ngirwa lu eyakar aberu ngina lolap, etapakin ngaakot na aberu kangina ekile ngolo toliwor ngesi lo nyitaleuno a ngirwa a ngikan-kaarei. Ani ekitanda cha daang lo inapakin ekile ngolo, eliwor lo nyitaleuno.

²⁵“Ani keleleete aberu ngaakot a ngirwa lukaalak, tarai nyeraakasi ngirwa ngulu lu ibooyo ngesi eyakar lolap, eliwor ngesi na nyitaleuno ngirwa daang lu eleleata ngaakot nguna. Kikok eboyor keng lo ibooyo ngesi eyakar lolap.

²⁶Ekitanda cha daang lo eperio ngesi kori ibore cha daang ni eperio ngesi eliwor ni nyitaleunitoe.

²⁷Itwaan cha daang ni etapi ngiboro lu eperio ngesi kori lu ibooyo, ejoikinit ilotari ngiworui keng ka akwaan keng, nakaneni eliwor ngesi ni nyitaleuno tanang ebong.

²⁸Ani ketubosi ngaakot keng alelere, ejoikinit ngesi idaruni ngirwa ngikan-kaarei edaunosi, sodi toliwor ngesi na italeuno.

²⁹Akolongit na a ngakan-kauni, eyaari ngesi ngakurio ngaarei kori takidomelio ngaarei nakituk a eam a Ekapolon Akuj sodi nak emuron a Akuj.

³⁰Elemuni emuron a Akuj apei toliwor akipeyos a akisech, sodi tolem nache erai akipeyos na inomio. Kotere eger ngolo, esubakini emuron ngolo etal lo a akitaleun anaberu kangina.”

³¹Tolimok Ekapolon Akuj Musa tama, “A eger kangolo, itiliworete esi Ngisirael lu italeuno, sodi nyeemunyarotor kesi erai kinyasut eam kang, lo eyei kiding kech.”

³²Eraakasi ngulu ngitalio a ekile alo eleleete ngabulon, kori ngadwa,

³³ka aberu na ibooyi eyei lolap, ta ekile lo eperete ka aberu na nyitaleuno.