Read turkana Ngilawi 16 Bible Online

Ngilawi 16 - turkana bible

Ngilawi 16

¹Eruorosi Ekapolon Akuj ka Musa ekisidi a akitu a talokookeng a Aron aluarei, alu aario na alemikineta Ekapolon Akuj akim na peetaleunitoe.

²Tolimok Ekapolon Akuj Musa tama, “Tolimok lokaatokon Aron atamar nyeeloma tooma ni italeunitoe noi eringa esaa lolomaret nyenanga. Nyeeloma ngesi neni kainyo neni ngesi atakanuunea ayong alodou amin kidiama apukenit a asaduku a Achamunet. Ani kewou ngesi akiwap ngakiro nguna, etoani.

³ Elomari Aron ni italeuno noi keyau emong losorokit erai akipeyos a akisech ta emesek erai akipeyos na inomio.”

⁴Abu Ekapolon Akuj todung ngakiro nugu. Ani eringa Aron nyelomara ni italeunitoe noi, ejoikinit mono ilotar sodi tanap ngiworui lu eraakar emuron. Ngiworui ngulu kesi eworu lokooyen kaanikan, ka esuruale, ka aruba, ta achaat.

⁵Elemuni ngesi alotunga a Ngisirael ngikora ngiarei kotere akipeyos akisech, ka emesek epei kotere akipeyos na inomio.

⁶Elemuni Aron emong erai akipeyos a elemari ngasechesea keng ka ngasechesea a ngitunga a awi keng.

⁷Ani erumor eyaari ngesi ngikora luarei ngulu nakituk a eam a Akuj.

⁸Erami ngesi ekura kaneni a ngamoru a ngaarei, apei na igiritae “Aka Ekapolon Akuj” ka nache na igiritae, “Aka Asasel.”[5]

⁹Ipeye Aron ekoroe lo aseunio a akiram ekura toliwor akipeyos a akisech ani a Ekapolon Akuj.

¹⁰Ani ekoroe lo aseunio toliwor eka Asasel, elemikinio Ekapolon Akuj eyari, sodi kimiek emuron a Akuj elosi nariet a Asasel, tolemarere ngasechesea a ngitunga.

¹¹“Elemuni Aron emong erai akipeyos a akisech keng ka na a ngitunga a awi keng.

¹²Ani erumor, elemuni ngesi atartar na elemere ngatotol anakim ileleba ngatotol na enokete na alemunio alokeno a Akuj, ka emitina lo ileleba ngakan ngaarei, sodi yau kesi ni etaleuno noi.

¹³Iwaakini ngesi emitina nakim alongaren Ekapolon Akuj, sodi tarap apuru a emitina apukenit a asaduku a Achamunet, sodi nyeanyunga ngesi totoanea.

¹⁴ Elemuni ngesi ngaakot ngache a emong kiterak a ekimoin keng lowae lo alongaren a apukenit, ani erumor kiterak ngache ngakiterakinet ngakan-kaarei, lowae lo alongaren a asaduku a Achamunet.

¹⁵“Ani erumor, eari ngesi ekoroe kotere akisech a ngitunga. Eyauni ngesi ngaakot a ekoroe kangolo tooma ni italeuno noi, tosubea ngakiro nasek asubea ngaakot a emong, kiterak apukenit alowae alo alongaren.

¹⁶Kotere eger ngolo, esubakini etal lo italeunere ni italeuno noi anaronis a Ngisirael ka ngasechesea kech daang. Ejoikinit ngesi esubakinea tani eam a Akuj lo eyei kiding adakar ngakiro napei nguna, kainyo erai lo nyitaleuno.

¹⁷Ani elomari Aron ni italeuno noi asubakin etal loa akitaleun tanang ni epudunio, emam itwaan echamakinitae emini loeam. Ani kesubaki ngesi etal ngolo kotere ngesi elope, ka ngitunga a awi keng, ta ngitunga luche daang,

¹⁸ejoikinit ngesi elosi lokeno lo a ngakipeyos ana inomio sodi kitaleu. Elemuni ngesi ngaakot a emong epewae, ka ngaakot a ekoroe epewae, sodi kiwasak najipeta na eyakasi lokwaasea a ekeno.

¹⁹Ewatakini ngesi ekeno ngaakot a ekimoin keng ngawatakinet ngakan-kaarei. Kotere eger ngolo, italeuni ngesi ekeno ngolo anasechesea a Ngisirael, sodi toliwor lo italeuno.

²⁰“Ani erumori Aron akisub etal lo italeunio ni italeuno noi, ka ewae loche a eam a Akuj ta ekeno a Akuj, elemikini ngesi Ekapolon Akuj akine na eyari na asekinitae Asasel[6]

²¹Idokokini Aron ngakan keng nakou a ekoroe alo eyari sodi tolimo alokidiama keng ngakiro naaronok daang, ka ngasechesea a Ngisirael, sodi kiwaakinea ngakiro naaronok nguna daang nakou a ekoroe. Ani erumor kitwara itwaan ni eseunitae ekoroe ngolo nariet.

²² Iwoki ekoroe ngolo ngasechesea daang a ngitunga yaa nakwap na emam itwaan elomit.

²³“Ani erumor ebongori Aron tooma loeam, talacha ngiworui lu eraakar emuron, lusek anapi ngesi eroko nyelomara ni italeuno noi. Imiekini ngesi ngiworui ngulu kaneni.

²⁴Ilotar ngesi ani italeuno sodi tanap ngiworui lukeng a ilope. Ani erumor, elosi ngesi tolem akipeyos na inomio tolemarea ngasechesea keng ka na a ngitunga.

²⁵Inomi ngesi nikataronon a akipeyos a akisech alokeno.

²⁶Itwaan ni arujari ekoroe nariet nia Asasel, ejoikinit ilotari ngiworui keng ka akwaan keng eringa nyebonguno nadakar.

²⁷Emong ka ekoroe lu alemunio toliworos ngika akipeyos a akisech a akisech, lu ayaunio ngaakot kech ni italeuno noi tolemarere akisech, edakario nikalapatan a adakar topeoi.

²⁸ Itwaan ni inomi kesi, ejoikinit ilotari ngiworui keng ka akwaan keng eringa nyebongoro nadakar.

²⁹“Irichakinete esi ngitalio lugu jiik. Akolongit na a ngatomon a elap alo a ngikan-kaarei, Ngisirael daang ka ngitunga lua a ngakwapea anache lu erukito ka kesi, ejoikinit eroneenete tasala alotich.

³⁰Akolongit ngina, esubi etal lo italeunere kesi anasechesea kech, sodi toliworos kesi lu italeuno.

³¹Eliwor akolongit ngina na italeunitoe noi, akolongit na eronioto kesi tasala alotich. Irichakinio ngitalio ngulu jiik.

³²Emuron Loapolon lo eseunio kitaleunoe kilunyokin nados ka apakeng, esubakini etal lo akitaleun. Enapi ngesi ngiworui lu emuron a Akuj

³³sodi tosubak etal lo italeunere ni italeuno noi, ka ewae loche a eam a Akuj, ka ekeno, ka ngimurok, ta ngitunga daang.

³⁴ Irichakinio ngitalio ngulu daang jiik. Esubakinio etal ngolo asubakinet apei a ekaru a epei, sodi kitaleunere Ngisirael anasechesea kech. Sodi tosubak Musa[7] loger lo adungokinitor Ekapolon Akuj.”