Read turkana Ngilawi 17 Bible Online

Ngilawi 17 - turkana bible

Ngilawi 17

¹Tolimok Ekapolon Akuj Musa tama,

²“Tolimok Aron ka talokookeng, ta Ngisirael daang atamar, ngitalio lugu kesi adungu Ekapolon Akuj atamar kiwapae.

³“Ani kear itwaan idio Alosirael emong kori imesek, kori akine alotooma adakar kori anikalapatan a adakar,

⁴ejoikinit itwaan ngini eyauni mono akipeyos nia Ekapolon Akuj alongaren eam a Akuj. Itwaan cha daang ni nyikokini neni, erai ekasechan, nakaneni echamit etachi ngaakot na abukor. Nyeringa itwaan ngini imarunitae atamar erai ipei a ngitunga a Akuj.

⁵Erai eger a etal kalo atamar eyaunete Ngisirael nia Ekapolon Akuj ngibaren daang lukolong aareenete kesi anaroatin. Eyaunete tokona kesi nia emuron a Akuj anakituk a eam sodi taara eraakasi ngakipeyos a ekisil.

⁶Ewatakini emuron ngaakot lokwaasea a ekeno alo a ngakipeyos anakituk eam, sodi topee nikataronon ni ejoikinit akukuny keng Ekapolon Akuj.

⁷Nyejoikinit Ngisirael eliworosi lu nyemunosi Ekapolon Akuj ani eareta ngibaren alomoding kipeyokis ngipean a ngaanei. Ejoikinit Ngisirael irichakinete etal logo jiik.

⁸“Ilimokini iyong kesi atamar itwaan cha daang a Ngisirael kori itwaan cha daang a akwap anache ni irukito ka esi, ni elemuni akipeyos na inomio kori akipeyos ache,

⁹ ani a Ekapolon Akuj, tolem awache ani nyerai akituk a eam a Akuj, nyeringa itwaan ngini imarunitae atamar erai ipei a ngitunga a Akuj.

¹⁰“Ani kenyam itwaan idio a Ngisirael kori itwaan a akwap anache ni irukito ka esi ngaakot, engeri Ekapolon Akuj itwaan ngini nyeringa nabo imaruni ngesi atamar erai ipei a ngitunga keng.

¹¹Akiyar a ibore kadaang ani eyari, eyei naakot. Ngakiro nguna kesi edungunitor Ekapolon Akuj atamar tobukokinae ngaakot daang lokeno tolemarere ngasechesea a ngitunga. Ngaakot na eraakasi akiyar, kesi elemarete ngasechesea a ngitunga.

¹² Ngakiro nguna kesi alimokinea Ekapolon Akuj Ngisirael ka ngitunga a ngakwapea anache erukitotor kesi atamar nyeenyam akiring.

¹³“Ani kear itwaan idio a Ngisirael kori itwaan a akwap anache erukito ka kesi etiengit kori ikeny ni italeunitoe alorika, ejoikinit ebukokini ngaakot keng kwap sodi tonuk a ngalup.

¹⁴Eyei akiyar a ibore kadaang naakot. Ngakiro nguna kesi alimokinea Ekapolon Akuj Ngisirael atamar nyeenyam ngaakot. Ani kenyam itwaan idio ngaakot, nyeringa imarakinitae atamar erai ipei a ngitunga a Ekapolon Akuj.

¹⁵“Itwaan cha daang, kerai Isiraelit kori itwaan a akwap anache, ni enyami akiring a etiengit alo etoani bon kori alo enyamete ngibuin, ejoikinit ilotari ngiworui keng ka akwaan keng, kidar tanang ebong esaa lo eliworor ngesi ni italeunitoe.

¹⁶Ani pekikok neni, ejoikinit ititakinio.”