Read turkana Ngilawi 18 Bible Online

Ngilawi 18 - turkana bible

Ngilawi 18

¹Tolimok Ekapolon Akuj Musa tama,

²“Tolimok Ngisirael atamar ayong Ekapolon Akuj arai Akuj kus.

³Warasi nyiiwap ngakiro na esubete ngitunga a akwap a Misiri, ana kolong ilomito esi, kori nyiiwap ngakiro a ngitunga a akwap a Kanaan ana tokona kayaarit ayong esi.

⁴Kiwapa ngitalio kang tosuba ngakiro na kadungokinit ayong esi. Ayong arai Ekapolon Akuj na arai Akuj kus.

⁵ Kiwapa ngakiro kang ka ngitalio lu kadungokini ayong esi. Iyuunete esi akiyar kus erai kikokis neni. Ayong arai Ekapolon Akuj.

⁶“Engeritoe anikus eperete ekile ka aberu na eyanatar.

⁷Wara nyiisurum apakon ngileech ani iperieto ka itiokon nakolong kidouni iyong. Nyiisurum itiokon ngileech.

⁸Nyiisurum apakon ngileech ani iperioto ka ngaberu keng nache.

⁹Nyiipero ka nakaatokon kori nakaatokon na a aberu anache, kerai nawi apei kitanunitere esi kori meere.

¹⁰Nyiipero ka nakookeng a nakookon. Eliwor ibore ngini ngileech anikon.

¹¹Nyiipero ka nakaatokon na a aberu anache, kainyo erai ngesi dang nakaatokon.

¹²Wara Nyiipero ka eyaakon, kainyo erai ngesi nakaatokeng a apakon.

¹³Wara nyiipero ka eyaakon kainyo erai ngesi itiokon naapolon kori naachi.

¹⁴Wara nyiipero ka aberu a apakon aloapolon, kori aloochi, kainyo erai ngesi dang itiokon.

¹⁵Wara nyiipero ka aberu a lokookon

¹⁶kori ka aberu a lokaatokon.

¹⁷Wara nyiipero ka nakookeng kori atatait a aberu anasek iperito ka iyong. Eraakasi kesi ngiyenet kon, nabo eliworosi nguna ngakiro aronok.

¹⁸ Wara nyiiut nakaatokeng a aberu kon ngirwa daang lu eyarea aberu kon.

¹⁹“Wara nyiipero ka aberu ngirwa lu ibooyo eyakar lolap, kainyo erai ngesi na nyitaleuno.

²⁰Nyiipero ka aberu a ekile a loche kainyo kitiliwori iyong ibore ngini lo nyitaleuno.

²¹Nyiipoto ikoku kon kipeyokinoe akuj nabe Molek, kainyo eyaunete ngakiro nguna ngileech lokiro a Akuj, ana erai Ekapolon Akuj.

²²Emam ekile lo itoperi loche loger lopalem itoperio aberu, eremokino Akuj ngakiro na ikote nguna.

²³ Nyeepero ekile kori aberu ka etiengit, kitiliworete ngakiro na ikote nguna esi lu nyitaleuno.

²⁴“Warasi nyiitiliworosi lu nyitaleuno a ngakiro kanu, kainyo ekokinete kolong ngibukui itiliworosi lu nyitaleuno neni. Ngibukui ngulu kesi lu esiaunete toloma neni nakaneni etwarakini tokona ayong Ekapolon Akuj kesi anakwap kangina sodi tolometa esi.

²⁵Etiliwori eboyor kech akwap na nyitaleuno, nakaneni erirae ayong akwap sodi tongerio akwap ngitunga keng.

²⁶Nakaneni kiwapa esi ngakiro kang ka ngitalio kang, warasi nyiisuba ngakiro naaronok nguna, esi kori ngitunga a ngakwapea anache lu irukito ka esi.

²⁷Kainyo asubete kolong ngitunga lu esiaunete toloma nakwap a Kanaan eringa esi ngakiro naaronok nugu daang, sodi kitiliwosi akwap na nyitaleuno.

²⁸Nakaneni nyiisuba esi na ikote nguna. Ani kisuba esi na ikote nguna, kingeri esi akwap ngina loger lokolong angerio ngibukui lu esiaunete toloma nakwap ngina eringa esi.

²⁹Iyenete esi atamar itwaan cha daang ni esubi ngakiro naaronok ikote nguna, nyeringa imarunitae atamar erai ipei a ngitunga a Akuj.”

³⁰Sodi tolim Ekapolon Akuj tama, “Kiwapa ngitalio lu kadungokini ayong esi, warasi nyiiwap eboyor a ngitunga alu kolong esiaunete toloma nakwap a Kanaan eringa esi. Nabo warasi nyiiliworosi lu nyitaleuno ani isubeta ngakiro nguna ngadi. Ayong arai Ekapolon Akuj na arai Akuj kus.”