Read turkana Ngilawi 19 Bible Online

Ngilawi 19 - turkana bible

Ngilawi 19

¹Tolimok Ekapolon Akuj Musa tama,

²“Tolimok Ngisirael daang atamar, kitaleunos kainyo ayong Ekapolon Akuj na arai Akuj kus, arai na etaleuno.

³ Ejoikinit ipei kus daang erima itiokeng ka apakeng. Nabo ejoikinit irichakini akolongit a Sabato loger lo adungunitor ayong. Ayong arai Ekapolon Akuj na arai Akuj kus.

⁴“Nyikingero ayong kilipa ngakujo ngache. Warasi nyiisuba ngakujo a ngasua kilipa. Ayong arai Ekapolon Akuj na arai Akuj kus.

⁵“Ani ilemikinete esi Ekapolon Akuj akipeyos a ekisil, kirichakisi ngitalio lu kainak ayong esi sodi atachamunea ayong akipeyos kus.

⁶Ejoikinit akiring enyamio akolongit na earere ibarasit kori akolongit na etupit ngina. Akiring daang na eperi tanang akolongit na a ngauni, ejoikinit inomio

⁷kainyo nyitaleunitoe. Ani kenyam itwaan akiring ngina, nyachamuni ayong akipeyos.

⁸Itwaan cha daang ni enyami akiring ngina, ejoikinit irirao kainyo enyasu ngesi ibore ni italeunitoe erai ika Ekapolon Akuj. Nyeringa itwaan ngini imarunitae atamar erai ipei a ngitunga kang.

⁹“Ani ilemi iyong ngamanat kon, wara nyiilem ngalemet na eyakasi lokukuor a amana kon kori nyiibong akidep ngalemet na echakakin kwap.

¹⁰Wara nyiibong naabor alomana kon a ngimusabib sodi togeru ngamusabib nasek idongito kori kidep ngamusabib na echakakina kwap. Kimiekinea nguna ngikebootok ka ngitunga a ngakwapea anache. Ayong arai Ekapolon Akuj na arai Akuj kus.

¹¹Wara nyiikoko, kori nyiilim alioko kori nyiingalasi make.

¹² Nyiikong ilimit ekiro kang iliokonit, sodi yau ngileech lokiro kang. Ayong arai Ekapolon Akuj na arai Akuj kon.

¹³“Nyiichekia ekidunyet kon kori nyiikoko ibore keng. Wara nyiitinenikinio ngaropiyae a ekasuban etich kon kitoper tanang tani akolongit apei.

¹⁴ Wara nyiilam ekinim kori nyiilegerik ibore ni edakari emuduk ngaren keng. Nakaneni ejoikinit iyong ikeri Akuj kon. Ayong arai Ekapolon Akuj.

¹⁵“Toliwor lo itenoono na itubio ngakiro. Wara nyiiminak lo iboosit kori nyiiker ekabaran.

¹⁶Wara nyiiswam itwaan niche. Ani kititakinitae itwaan esakio akiar, wara nyiiremokin ngesi alokiruor kon. Ayong arai Ekapolon Akuj.

¹⁷“Wara nyiiman itwaan niche, nakaneni topupokinos ka ngesi sodi nyiisech iyong kotere ngesi.[8]

¹⁸ Wara nyiitachak ngakiro naaronok kisubea iyong itwaan kori nyiirubak iremit ngesi, nakaneni tominak itwaan niche loger lo iminar iyong ilope akwaan kon. Ayong arai Ekapolon Akuj.

¹⁹“Kiwap ngitalio kang, nyiisik ngibaren kon euriyete ngajul nagelagelae. Nyiitak ngikinyam ngiarei lugelagelae mana apei. Wara nyiinap ngiworui lu egelagela ngawarui na edonyunitere.

²⁰“Ani kepero ekile ka akedalan na enerit ekile loche, nakaneni toringa ngaropiyae nalachakinet ngesi nyelemuna, ejoikinit ngakiro nguna engichunio. Nakaneni nyear kesi kainyo aringa akedalan ngina nyelachakina.

²¹Erikuni ekile ngolo emesek ngaren eam a Akuj toliwor akipeyos a atachanot.

²²Esubakini emuron etal lo a akitaleun tolemarea akisech na asubi ekile ngolo, nakaneni erimakini Akuj ngesi.

²³“Ani inangete esi nakwap a Kanaan kitakis ngikito daang a ageor toyena atamar italeo ageor ngina akinyam a ngikaru a nguuni. Nyiinyam ageor ngikaru ngulu.

²⁴Ani ekaru lo a nguomwon, elemunio ageor daang toliwor akipeyos ani a Ekapolon Akuj, kidodiuneta esi alakara anikang.[9]

²⁵ Nakaneni tanyama ageor ekaru lo a ngikan. Ani kisuba esi daang kongina, ekoniunete ngikito kus ageor nakaalan. Ayong arai Ekapolon Akuj na arai Akuj kus.

²⁶“Warasi nyiinyam akiring na eyakasi ngaakot. Warasi nyiidwar kori nyiimuroto.

²⁷Nyiibany ngitim lua ngikwaasea a ngakies kus kori nyiitubo ngitim lua abokony.

²⁸ Warasi nyiidungudungoto ngawat kus ani igorotor itwaan ni atoana, kori nyiigear ngawat kus. Arai ayong Ekapolon Akuj.

²⁹ “Wara nyiisurum tanakookon ngileech ani itiliworea ngamalaae a akai a akuj.[10] Ani kikok iyong neni, ibatarosi ngitunga daang lomalaanu, sodi kilelebun akwap emalaanu.

³⁰Kirichakisi akolongit a Sabato, sodi kidodiut arima ani kelipitere ayong Ekapolon Akuj.

³¹ “Warasi nyiilot lomurok ka ngikapilak. Ani kikokis esi neni, iliworosi esi lu nyitaleuno. Ayong arai Ekapolon Akuj na arai Akuj kus.

³²“Tonyou towo alongaren ngitunga lumojong ani ikeritor, sodi kidodik arima. Toker Akuj kon. Ayong arai Ekapolon Akuj.

³³“Nyiiboliar ngitunga a akwap anache lu irukito ka iyong.

³⁴ Tosubea kesi ngakiro napei isubea iyong Ngisirael luche, sodi tominak kesi loger lo iminar iyong akwaan kon. Kitam atamar irai kolong iyong dang itwaan a akwap anache na iyakar Misiri. Ayong arai Ekapolon Akuj na arai Akuj kus.

³⁵“Wara nyiingala itwaan itemi aoyau a ibore, kori apotis, ta alalau.

³⁶Ejoikinit itemi ngiboro a ngaratilio ana eteniyete, ka apotis na etenoono, ta ngakitemiet na eteniyete. Arai ayong Ekapolon Akuj na arai Akuj kus, nakaneni kepuduni kolong ayong esi alo Misiri.

³⁷ Kiwap ngitalio kang daang ka ngakiro na adungunit ayong. Ayong arai Ekapolon Akuj.”