Read turkana Ngilawi 2 Bible Online

Ngilawi 2 - turkana bible

Ngilawi 2

¹“Ani keyau itwaan akipeyos erai ngalemet nia Ekapolon Akuj, ejoikinit mono irie toliworos ngakiria. Ejoikinit ngesi iwaakini akimiet ka emitina nakiria nguna,

²inu talokookeng a Aron lu eraakasi ngimurok. Emukuni emuron ngakiria na eyei akimiet, tomuk ileleba akan, imorikina ka emitina, sodi topee alokeno a ngakipeyos erai akipeyos nakisitamunet na elemikinitae Ekapolon Akuj. Ejoikinit akukuny a akipeyos kangina Ekapolon Akuj.

³Eliworos ngakipeyos na a ngalemet na idongete ngaka Aron ka talokookeng. Eraakasi na italeunitoe noi kainyo elemunitae anakimuj ana elemikinitae Ekapolon Akuj.

⁴“Ani kerai akipeyos ngina amugati na imakinitae nakim, ejoikinit esubakinio emam ekitoe lo itubui. Epedorete aliwor ngamugati nalangir imorikinitae ka akimiet, kori ngabisikutio na iwasakinitae akimiet.

⁵“Ani kerai akipeyos amugati na ipoo a apalarang anabeleny tosubunae anakiria ana imorikinitae ka akimiet, nakaneni nyiiwaakin ekitoe lo itubui.

⁶Tonyilinyili ngamugati nguna kiwasak akimiet, na ilemunea erai akipeyos.

⁷“Ani kerai akipeyos ngamugati na ipoo anapalarang, ejoikinit eliwor ngakiria imorikina ka akimiet.

⁸Yau nia Ekapolon Akuj erai akipeyos nak emuron lo eyaari lokeno lo a ngakipeyos.

⁹Elemari emuron akipeyos ngina epewae toliwor akipeyos nakisitamunet elemikinitae Ekapolon Akuj, sodi topee alokeno alo a ngakipeyos. Ejoikinit akukuny a akipeyos kangina Ekapolon Akuj.

¹⁰Eliwor akipeyos a ngalemet na idongi aka Aron ka talokookeng. Erai na italeunitoe noi kainyo elemunitae anakimuj ana elemikinitae Ekapolon Akuj.

¹¹“Akipeyos daang a ngalemet na iyauni iyong nia Ekapolon Akuj, ejoikinit emam ekitoe lo itubui. Tochoite iwaakini ekitoe lo itubui kori akimiet a ao nakimuj na ilemikini Ekapolon Akuj.

¹²Akipeyos a ngalemet na ekingaren ana ilemi iyong ekaru daang, yau nia Ekapolon Akuj. Nakaneni nyelemunio topeoi alokeno alo a ngakipeyos.

¹³Kiwaak amakat nakipeyos a ngalemet daang, kainyo erai amakat emachar lo itemokino anachamunet kon ka Akuj. (Kiwaak ngakipeyos kon daang amakat.)

¹⁴Ani iyauni iyong nia Ekapolon Akuj akipeyos na a ngalemet ana ekingaren, tolem ngalemet na epeitoe kori na irietae.

¹⁵Kiatak akimiet sodi kiwaak emitina.

¹⁶Epeyi emuron a Akuj epewae a akipeyos ana a ngalemet ka akimiet, ta emitina daang, toliwor akipeyos na epeikinitoe Ekapolon Akuj.