Read turkana Ngilawi 20 Bible Online

Ngilawi 20 - turkana bible

Ngilawi 20

¹Tolimok Ekapolon Akuj Musa tama,

²“Tolimok Ngisirael atamar itwaan daang ni erai Isiraelit kori itwaan a akwap anache ni irukito ka esi erai kipoto ikoku keng nak akuj nabe Molek, ejoikinit itwaan ngini eario. Imasete ngitunga a akwap kangina ngesi a ngamoru taara.

³Angeri ayong alope itwaan ngini nyeringa emaruni atamar erai ipei a ngitunga kang, kainyo epotori ngesi ikoku keng ipei nak akuj nabe Molek. Kotere erot ngolo, kinyasu ngesi eam kang lo italeunitoe, nabo yau ngileech lokiro kang lo italeunitoe.

⁴Nakaneni ani pekemisikis ngitunga ngakiro na asubi ngesi sodi nyear ngesi,

⁵angeri ayong alope itwaan ngini ka ngitunga a awi keng. Angeri ayong ngitunga daang lu imorikinosi ka ngesi towout amuno ayong ani ilipeta akuj nabe Molek. Nyeringa ayong emaruni kesi atamar eraakasi ngitunga kang.

⁶“Ani kelot itwaan lomurok ka ngikapilak sodi tojongo amuno ayong, angeri ayong ngesi nakaneni nyeringa emaruni atamar erai ipei a ngitunga kang.

⁷Toliworos lu italeuno, kainyo ayong arai Ekapolon Akuj na arai Akuj kus.

⁸Kiwapa ngitalio kang kainyo ayong arai Ekapolon Akuj, nakaneni ketiliwori ayong esi lu italeuno.

⁹ Itwaan daang ni ichieni apakeng ka itiokeng eario. Eraakasi ngakiro a akitu keng ngaka akiding keng.

¹⁰“Ani kelom ekile ka aberu a Esiraelit aloche, eario ekile ngolo ka aberu ngina.

¹¹Ani kitoper ekile apei a ngaberu a apakeng, isurumi ngesi apakeng ngileech. Eario ekile ngolo ka aberu ngina. Eraakasi ngakiro a akitu kech aka akiding kech.

¹²Ani kitoper ekile aberu a lokookeng, eario ekile ngolo ka aberu ngina. Asuba kesi ngakiro naaronok, nakaneni eraakasi ngakiro a akitu kech ngaka akiding kech.

¹³Ani kitoper ekile ekile loche, asuba kesi ngakiro na italeo. Nakaneni eario ngikiliok ngulu. Eraakasi ngakiro a akitu kech ngaka akiding kech.

¹⁴Ani kuut itwaan aberu keng ka itiokeng a aberu keng, eario kesi luuni daang kotere ngakiro na ngileech asuba kesi. Nyejoikinit ngakiro na ikote nguna echamakinio anikus.

¹⁵Ani kitoper ekile etiengit, eario ngesi ka etiengit ngolo.

¹⁶ Ani keapikin aberu ka etiengit topero ka etiengit ngolo, eario aberu ngina ka etiengit ngolo. Eraakasi ngakiro a akitu kech ngaka akiding kech.

¹⁷“Ani kuut ekile nakaatokeng na idounitoe ka ngesi anakook a apei, kori nakaatokeng na a aberu anache, ejoikinit kesi isurumio ngileech alongaren ngitunga kitwarakinae alotunga keng. Etoper ngesi nakaatokeng nakaneni ejoikinit itiri nguna.

¹⁸ Ani kepero ekile ka aberu na ibooyi eyei lolap, itwarakinio kesi daang alotunga kech kainyo asech kesi etal lo italeununere.

¹⁹“Ani kepero ekile ka eyaakeng, ejoikinit kesi daang irirao ani asubeta ngakiro naaronok nguna tarai eyanasi.

²⁰Ani kitoper ekile aberu a amaekeng, esurum ngesi amaekeng ngileech. Irirao ekile ngolo ka aberu ngina, etoakete kesi nyeanyuna ngide.

²¹ Ani kuut ekile aberu a lokaatokeng, etoakete ekile ngolo ka aberu ngina nyeanyuna ngide. Asub ekile ngolo ngakiro na italeo akisub, nakaneni esurum lokaatokeng ngileech.”

²²Tolim Ekapolon Akuj tama, “Kirichakisi ngitalio kang daang ka ngakiro na adungunit ayong, sodi nyikingerio esi akwap a Kanaan na asaki ayong esi toloma.

²³Warasi nyiirokut ngitalio a ngitunga alu elomito neni. Etwarakini ayong ngibukui ngulu sodi tolometa esi nakwap ngina. Kakadakis kesi ayong ani asubeta ngakiro naaronok nguna daang.

²⁴Nakaneni kechikak ayong esi atamar kainakini akwap kech toliwor akus. Ileleba akwap ngina ngakile ka akimiet a ao. Ayong arai Ekapolon Akuj na arai Akuj kus, nabo ketegelia ayong esi alobukui aluche.

²⁵Kotere ngakiro nguna, ejoikinit esi itiakito ngitieng ka ngikieny lu italeunitoe ka lu nyitaleunitoe. Warasi nyiinyam ngitieng ka ngikieny lu nyitaleunitoe, alimu ayong atamar eraakasi kesi lu nyitaleunitoe, ani kinyam esi kesi iliworosi esi dang lu nyikitaleunitoe.

²⁶Toliworos lu italeuno lu iraakasi ngikang make, kainyo arai ayong Ekapolon Akuj na etaleuno. Ketegelia ayong esi alobukui aluche sodi toliworos esi ngikang.

²⁷“Ekile cha daang kori aberu na elosi lomurok kori lokapilak, ejoikinit imasio a ngamoru totoan. Eliwor akitu a itwaan kangini aka akiding keng.”