Read turkana Ngilawi 21 Bible Online

Ngilawi 21 - turkana bible

Ngilawi 21

¹Tolimok Ekapolon Akuj Musa tama, “Tolimok ngimurok lu eraakasi talokookeng a Aron atamar nyiitiliwor tani epei kech lo nyitaleuno ani elosio ni enukere itwaan niyenet keng ni etoani,

²mati kerai itwaan ngini itiokeng kori apakeng, kori lokookeng, kori nakookeng, kori lokaatokeng,

³kori nakaatokeng na eringa nyiuta na ibooyi anawi a itwaan kangini.

⁴ Nyiitiliwor ngesi lo nyitaleuno kotere akitu ka ngulu eyanasi ka ngesi ani eraakatar ngikamurak.

⁵“Emam emuron a Akuj lo eluri, kori etubi ngitim a abokony keng, kori edungidungi akwaan keng ani igoror itwaan ni atoana.

⁶Ani kona eraakar ngesi ipeyoe ngakipeyos alongaren kang ayong Ekapolon Akuj, ejoikinit ngesi eliwor lo italeuno sodi nyiisurum ekiro kang ngileech.

⁷Ani kona eraakar emuron itwaan ni italeuno ani a Akuj keng, ejoikinit ngesi peiusi amalaat, kori aberu na eperito ka ekile a ache kori aberu nasek elakit ekile loche.

⁸Italeuni iyong ngesi toliwor ika Akuj, nakaneni italeun ngesi anikon kainyo ngesi ipeye ngakipeyos alongaren kang ayong Ekapolon Akuj. Ayong Ekapolon Akuj ketaleuni iyong toliwor ika Akuj, nakaneni etaleuno ayong.

⁹Ani keliwor nakookeng a emuron amalaat, isurumi ngesi apakeng ngileech. Ejoikinit ngesi inomio a akim totoan.

¹⁰“Emuron loapolon daang, kona edokakinere ngesi akimiet na etal nakou, nabo etaleun ngesi tanap ngiworui lu a emuron a Akuj, nyejoikinit ngesi imiekini ngitim keng nyikiarara kori echili ngiworui keng idodiunit ibore ngini atamar igoro ngesi itwaan keng nia atoana.

¹¹Nyelomari ngesi ni eyei itwaan nikatoan kori nyejoikinit eliwor lo nyitaleuno ani etapea itwaan nikatoan tani kerai itwaan ngini apakeng kori itiokeng.

¹²Ani kona aseunere ngesi ani edokakinere akimiet a Akuj nakou keng, nyejoikinit ngesi inyasuni eam a Akuj ani epudorea aloeam kangolo toloma kai na eyei itwaan nikatoan, tani kerai itwaan ngini apakeng kori itiokeng. Ayong arai Ekapolon Akuj.

¹³Iusi ngesi apese na nyepero ka ekile a ache,

¹⁴meere apuserut, kori aberu na elakitae, kori na enyasun a emalaanu. Nakaneni ejoikinit iusi apese na nyepero ka ekile a ache na erai aka emachar keng.

¹⁵Ani pekikok ngesi neni, ngide keng lu ejoikinit italeuno eliworosi lu nyitaleunitoe. Arai ayong Ekapolon Akuj, nakaneni etegelia ayong ngesi toliwor emuron loapolon.”

¹⁶Todungok Ekapolon Akuj Musa atamar,

¹⁷tolimok Aron tama, “Emam ales kon na eyei ni ichwangakina anakwaan nakalemikini ayong Ekapolon Akuj keng ngakipeyos. Eliworosi ngakiro nugu na iwapio jiik.

¹⁸Emam itwaan ni eyei ni ichwangakina anakwaan ni elemuni akipeyos, kerai itwaan ngini emuduk, kori ni engwalit, kori ni eyakasi ngaporos loreet, kori ni engwalit ekiner eche a akwaan,

¹⁹kori ni engwalit akan kori akeju,

²⁰kori ni eyei aruk, kori ni earit aurianut, kori nipirong a ngakonyen, kori ni etingit ekipianu, kori loper, ta ni idongitoe.

²¹Aron lo erai emuron, emam ales keng na eyei ni ichwangakina nakwaan, nakalemikini ayong ngakipeyos na inomio ka na a ngalemet.

²²Epedori itwaan ni ikoni neni akinyam akimuj na kalemikinitae ayong na erai na italeunitoe noi, ka nache italeunitoe.

²³ Ani kona eyakar ngesi ni ichwangakina anakwaan, nyejoikinit ngesi eapuuni diyete awaru natiaket eam kori lokeno a ngakipeyos. Nyejoikinit ngesi itiliwori ngiboro lu italeunitoe lugu lu nyitaleunitoe, kainyo ayong na erai Ekapolon Akuj ngesi etaleuni.”

²⁴Ngakiro nugu robo kesi alimokini Musa Aron ka talokookeng, ta Ngisirael daang.