Read turkana Ngilawi 22 Bible Online

Ngilawi 22 - turkana bible

Ngilawi 22

¹Tolimok Ekapolon Akuj Musa tama,

²“Tolimok Aron ka talokookeng atamar, nyeeyaut ngileech lokiro kang lo italeuno. Kotere ngakiro nguna, kidodiutu arima anakipeyos ana italeunitoe kalemanakinete Ngisirael ayong. Ayong arai Ekapolon Akuj.

³Tolimok kesi tama, ‘Ani keapuu epei a ngalesea kus lo nyitaleuno diyete ngakipeyos na italeunitoe nakalemikis ayong Ngisirael, nyeringa nabo ngesi esubi etich alokeno alo kepeyonokinere ayong. Eliworosi ngakiro nugu na irichakinio jiik. Ayong arai Ekapolon Akuj.

⁴Emam itwaan daang ni erai ales a Aron totingite enomokere kori toleleete ngabulon anakwaan ni enyami ngakipeyos na italeunitoe mati mono kitaleun ngesi kerumor. Eliwor emuron daang lo nyitaleuno erai ketap ibore ni nyitaleuno ni ikoni itwaan nikatoan, kori keleleete ngadwa,

⁵kori ketap etiengit lo nyitaleunitoe, kori itwaan ni nyitaleunitoe.

⁶Emuron daang lo nyitaleunitoe, erubakini erai lo nyitaleunitoe tanang ebong. Ani ikoni neni dang, nyenyami ngesi ngakipeyos na italeunitoe mati kilotar mono.

⁷Ani edooyori akolong erumor, eliwor ngesi lo italeuno, nakaneni epedori akinyam ngakipeyos na italeunitoe na eraakasi akimuj keng.

⁸Nyeenyam ngesi akiring a etiengit kadaang alo etoani bon kori alo earete ngibuin, sodi nyeeliworor lo nyitaleuno. Arai ayong Ekapolon Akuj.’

⁹“Irichakinete ngimurok daang ngitalio lu adungok ayong. Ani pekikokis neni, esechete kesi totoaka ani awouneta akiwapakin ngitalio kang lu italeunitoe. Arai ayong Ekapolon Akuj na etiliwori kesi lu italeuno.

¹⁰“Ngitunga lu eyanasi ka ngimurok make enyamete ngakipeyos na italeunitoe. Emam itwaan niche ni enyami ngakipeyos nguna. Nyenyami tani itwaan ni ibooyete ka emuron kori ekasuban etich keng.

¹¹Nakaneni ani ekedalan lo agieluni emuron a ngaropiyae keng, kori lo edounio anawi a emuron, epedori akinyam ngakipeyos nguna.

¹²Nakookeng a emuron na iusi itwaan ni nyerai emuron, nyenyami ngakipeyos na italeunitoe nguna.

¹³Nakaneni ani kerai nakookeng a emuron apuserut kori kelakitae tamam ikoku, sodi tobongu akiyar anawi a apakeng, epedori ngesi akinyam akimuj na eanyuununi apakeng ani eraakar emuron, nyenyami itwaan ni nyeyanasi ka emuron akimuj ngina.

¹⁴“Ani kenyam itwaan ni nyeyanasi ka emuron ngakipeyos na italeunitoe peeyeni, etachakini ngesi emuron ngolo etiae lo eriyan ka akimuj ngina, ani erumor kiatak nabo etiae lo erai alemunet apei anakan.

¹⁵Nyiitiliwosi ngimurok ngakipeyos na italeunitoe na nyitaleunitoe

¹⁶ani itanyameta ngitunga lu nyechamakinitae enyamete. Eyaunete ngakiro nguna akisech ka eriras nitwaan ni ikoni ngini. Ayong arai Ekapolon Akuj nakaneni etiliwori ayong ngakipeyos na italeuno.”

¹⁷Todungok Ekapolon Akuj Musa tama,

¹⁸“Tolimok Aron ka talokookeng, ta Ngisirael daang ngitalio lugu. Itwaan daang ni erai Isiraelit kori ni a akwap anache ni elomit nakwap a Isirael, na elemunea akipeyos na inomio, kotere nisek ekongio kori ani esakitor ngesi ilope alemun, ejoikinit ibarasit ngini emam ni ichwangakina.

¹⁹Ani esakio tachamunae, ejoikinit erai ibarasit nikile ni emam ni ichwangakina.

²⁰Ani kilemu iyong ibarasit ni eyei ni ichwangakina, nyechamuni Ekapolon Akuj ibarasit ngini.

²¹Ani kelemiki itwaan idio Ekapolon Akuj ngakipeyos a ekisil, kotere nisek ekongio kori ani esakitor ngesi ilope alemun, ejoikinit ibarasit ngini emam ni ichwangakina erai esakio tachamunae.

²²Nyiilemik Ekapolon Akuj ibarasit ni emudukana, kori ni ebilil, kori ni engwalit, kori ni eyei ajeme na eleleete ngabulon, kori ni etingit etune, ta ni etingit ekuruoru. Nyiilem ngibaren lu ikote ngulu toliworos ngakipeyos na epeikinitoe Ekapolon Akuj.

²³Ani akipeyos na ilemuni iyong ani isakitor, ipedori iyong alemuni emong kori imesek ni engwalit kori ni euriana ekiner eche. Nakaneni nyechamunio erai akipeyos na ilemuni iyong ani ikongio.

²⁴Nyiilemik Ekapolon Akuj ibarasit ni ewanitae ngitou kori ni egelemitae kori idongitoe kori ni edungitoe. Nyejoikinit ibarasit ni ikoni neni elemunio erai akipeyos anakwap kon.

²⁵Nyiilem ibarasit a itwaan a akwap anache toliwor akipeyos na epeikinitoe Ekapolon Akuj. Eraakasi ngibaren ngulu lu ichwangakina, nakaneni emam itwaan echamuni.”

²⁶Tolimok Ekapolon Akuj Musa tama,

²⁷“Na euriunere itaok, kori imesek, kori ikale, imiekinio tanak a ngirwa a ngikan-kaarei. Ani edaunosi ngirwa ngulu, echamunio na elemunere erai akipeyos na epeikinio Ekapolon Akuj.

²⁸Nyiipeye aite ka itaok keng akolongit apei, kori amesek ka imesek keng, kori akine ka ikale keng.

²⁹Ani ilemuni iyong akipeyos na ebuakinitere Ekapolon Akuj alakara, kiwap ngitalio sodi kitachamunea ngesi iyong.

³⁰Tanyam akiring a ibarasit kangini akolongit ngina nyiimiek ache eperi.”

³¹Tolim Ekapolon Akuj tama, “Kiwap ngitalio kang, ayong arai Ekapolon Akuj.

³²Nyiisurum ekiro kang lo italeuno ngileech. Ejoikinit Ngisirael daang eyenete atamar etaleuno ayong. Ayong arai Ekapolon Akuj, nakaneni ketaleuni ayong esi.

³³Ayong kolong kepuduni esi anakwap a Misiri atoliworor Akuj kus. Ayong arai Ekapolon Akuj.”