Read turkana Ngilawi 23 Bible Online

Ngilawi 23 - turkana bible

Ngilawi 23

¹Tolimok Ekapolon Akuj Musa tama,

²“Eraakasi lugu ngitalio lua ngirwa alu esukukuu a Ekapolon Akuj. Ngirwa lua ngisukukui a Ekapolon Akuj ngulu, iriamiriamete Ngisirael kilipa.

³Isubete esi etich a ngirwa a ngikan-kapei nakaneni toyena atamar akolongit na a ngakan-kaarei, nabe Sabato, erai akwaar nakiangaret. Akolongit ngina, nyiisuba etich, nakaneni tochunakinos kilipa. Erai Sabato aka Ekapolon Akuj, ani ilomito esi kadaang.

⁴ Tolimunoe ngirwa lu esukukuu lugu a ngirwa alu ereatae.

⁵“Esukukuu a Adeparet lo erimare Ekapolon Akuj, isiakini adooyoret a akolong akolongit na a ngatomon ka ngoomwon a elap alo a ekingaren.

⁶Akolongit na a ngatomon ka ngakan, isiakini esukukuu a ngamugati anapadok. A ngirwa a ngikan-kaarei napei ngina jik, tanyama ngamugati na emam ekitoe lo itubui.

⁷Akolongit na a ekingaren a esukukuu, ejoikinit esi ichunakinosi kilipa, sodi nyiisuba edio a ngitichisio alupalem sek isubete esi.

⁸ A ngirwa a ngikan-kaarei, tolemikisi Ekapolon Akuj kus ngakipeyos na epeyo. Ani akolongit na a ngikan-kaarei tochunakinos nabo kilipa, nakaneni nyiisuba edio a ngitichisio alupalem sek isubeenete esi.”

⁹Tolimok Ekapolon Akuj Musa tama,

¹⁰“Tolimok Ngisirael atamar, ani ipote esi nakwap nakainakini ayong esi sodi tolema esi ngalemet a akwap kangina, yaasi ngalemet na ekingaren nia emuron a Akuj.

¹¹Elemuni ngesi erai akipeyos na iwakiwakio ani a Ekapolon Akuj, sodi kitachamunere esi. Elemuni emuron a Akuj akipeyos ngina akolongit na etupit na a Sabato.

¹²Akolongit na ilemunea iyong ngalemet tolem tani imesek niichi nikile ni erai ekaru epei, tamam ni ichwangakina, kitiliwo akipeyos na inomio.

¹³Tolem aapei ka ngakiloi ngaarei a ngakiria ana imorikinitae ka akimiet, toliwor akipeyos na epeikinitoe Akuj. Ejoikinit akukuny a akipeyos kangina Ekapolon Akuj. Tolem aapei ka alemunet na erai alita apei a emuna alo epuritoe.

¹⁴Nyiinyam ngalemet nakiteat, kejonak kori kepeitoe, kori kesubakinitae toliwor amugati, mati mono kiyau akipeyos naga nia Ekapolon Akuj. Irichakinete ngalesea kus etal logo jiik.

¹⁵“Kimarutu ngiukio ngikan-kaarei napei anakolongit ana etupit Sabato na iyauneta esi ngaenet a ngalemet tolemikis Ekapolon Akuj.

¹⁶Ani akolongit na a ngatomwon-kan, akolongit na etupit Sabato na a ngakan-kaarei, tolemikisi Ekapolon Akuj ngalemunet a ngalemet anakiteat.

¹⁷Eyaunete ngitunga a awi a apei ngamugati ngaarei sodi tolimokis Ekapolon Akuj eraakasi akipeyos na iwakiwakio. Amugati apei, esubunio anakiria ana eraakasi ngakiloi ngaarei, ana eyei ekitoe lo itubui ngamugati. Elemikinio Ekapolon Akuj erai alemunet a ngalemet alu isiaunio akilem.

¹⁸Aapei ka ngamugati nguna, elemunete ngitunga ngimesekin luuchik ngikan-kaarei lu eraakasi ekaru epei, ka itaok, ta ngimesekin ngiarei lu emam ni ichwangakina. Elemikinio Ekapolon Akuj eraakasi akipeyos na inomio, aapei ka akipeyos a ngalemet ka na emuna alo epuritoe. Ejoikinit akukuny a akipeyos kangina Ekapolon Akuj.

¹⁹Tolem tani ekoroe erai akipeyos a akisech, ta ngimesekin luuchik ngiarei lua ekaru a epei, toliworos akipeyos a ekisil.

²⁰Elemuni emuron a Akuj amugati ka ngimesekin luuchik ngiarei eraakasi akipeyos na iwakiwakio ani a Ekapolon Akuj kotere ngimurok a Akuj.

²¹ Akolongit ngina, nyiisuba etich lopalem sek isubeenete, nakaneni tochunakinos kilipa. Irichakinete ngalesea kus etal logo jiik, awadaang anicha elomete kesi.

²²“Ani ilemete esi ngamanat kus, nyiitubo ngalemet na eyakasi lokwaasea a ngamanat, kori nyiibongosi akitub ngalemet na idongito naabor. Kimiekineta ngikebootok ka ngitunga a ngakwapea anache. Ayong arai Ekapolon Akuj na arai Akuj kus.”

²³Tolimok Ekapolon Akuj Musa tama,

²⁴“Tolimok Ngisirael atamar, ani akolongit na ekingaren a elap alo a ngikan-kaarei, ejoikinit iangario. Eliwor akolongit ngina na itamunio ani ekutakinere ngaburucho kiriamariamae kilipae.

²⁵Akolongit ngina, nyiisuba etich lopalem sek isubeenete, nakaneni tolemikisi Ekapolon Akuj akipeyos na epeikinio.”

²⁶Tolimok Ekapolon Akuj Musa tama,

²⁷“Akolongit na ngatomon a elap alo a ngikan-kaarei ngesi erai akolongit na esubakinere etal lo erimakinere ngasechesea a ngitunga. Akwaar ngina, torono nyiinyam akimuj tani nadiochichi, nakaneni kiriamariama wapei kilipa, sodi tolemikis Ekapolon Akuj akipeyos na epeikinio.

²⁸Nyiisuba etich akolongit ngina kainyo akolongit ngina esubakinere etal lo erimakinere akisech.

²⁹Itwaan cha daang ni enyami akimuj adio akolongit ngina, nyeringa imarunitae atamar erai ipei a ngitunga kang.

³⁰Ani kesub itwaan etich akolongit ngina, eari Ekapolon Akuj itwaan ngini.

³¹Erai etal logo lo irichakinete ngalesea kus daang, awadaang anicha elomete.

³² Napei anadooyeret a akolong a akolongit ana ngakan-koomwon a elap tanang adooyoret a akolong a akwaar ana ngatomon, kirichakisi akolongit naga toliwor na iangaritere. Emam ibore enyamio akolongit ngina.”

³³Tolimok Ekapolon Akuj Musa tama,

³⁴“Tolimok Ngisirael atamar, isiakini esukukuu a ngikalea akolongit na a ngatomon ka ngakan a elap alo a ngikan-kaarei, sodi torubak a ngirwa a ngikan-kaarei.

³⁵Akolongit na ekingaren a ngirwa kangulu, kiriamariama wapei kilipa nakaneni nyiisuba etich lopalem sek isubete.

³⁶ Akolongit daang a ngirwa alukan-kaarei kangulu, ilemikinete esi Ekapolon Akuj akipeyos na epeikinio. Akolongit na a ngakan-kauni, kiriamariama wapei kilipa sodi tolemut akipeyos na epeikinio Ekapolon Akuj. Erai akolongit ngina na ilipitere, nakaneni nyiisuba etich.

³⁷“Eraakasi lugu ngisukukui a Ekapolon Akuj lu irimatar esi Ekapolon Akuj. Kiriamariama akilip ka alemun ngakipeyos na epeikinio Ekapolon Akuj, ka ngakipeyos na inomio, ka ngalemunet a ngalemet, ka ngakipeyos nache, ta ngalemunet a emuna alo epuritoe, tolemunae ngakipeyos nguna nacha esakitae akolongit apei.

³⁸Eraakasi ngisukukui ngulu lu iatakinosi nia Ngasabatoi anapalem eyakasi. Ani ngakipeyos nugu, eraakasi na iatakinosi nia ngainakinet anapalem eyakasi, ka ngakipeyos na elemunio anisek ikongitere, ta ngakipeyos na elemanakinio Ekapolon Akuj ani esakitor ilope ayaun.

³⁹“Ani kilema esi ngamanat kus kerumor, kikareikisi esukukuu logo a ngirwa a ngikan-kaarei, isiakini akolongit na a ngatomon ka ngakan a elap alo a ngikan-kaarei. Eliwor akolongit na ekingaren na iangarere, toliwor nabo akolongit na ngikan-kauni na iangaerere.

⁴⁰Akolongit ngina, tolemutu ageor naajokon alokito kus. Tolemutu ngaten a auk a ngingolea, ta ngaten a ngikito alukaalak a ngakui, sodi kisiakis esukukuu a Ekapolon Akuj lo erimare Ekapolon Akuj na erai Akuj kus.

⁴¹Kirichakisi esukukuu lo a Ekapolon Akuj ngolo a ngirwa a ngikan-kaarei. Irichakinete ngalesea kus etal logo jiik na enangea elap lo a ngikan-kaarei.

⁴²Ngisirael daang elomete lokalea a ngirwa a ngikan-kaarei,

⁴³sodi toyeneta ngalesea kus atamar nakolong epudunio ayong Ekapolon Akuj Ngisirael alo Misiri, abu etolom kesi lokalea. Ayong arai Ekapolon Akuj na arai Akuj kus.”

⁴⁴Eger ngolo ngesi alimokinea Musa Ngisirael ngitalio lu irichakineta ngisukukui lu erimare Ekapolon Akuj.