Read turkana Ngilawi 24 Bible Online

Ngilawi 24 - turkana bible

Ngilawi 24

¹Tolimok Ekapolon Akuj Musa tama,

²“Todungok Ngisirael kiinut iyong akimiet naajokon noi a ngikito, kotere ngataae a eam, sodi toliwor akim enoki kaneni jiik.

³Atabong a akolongit kadaang, inokakini Aron ngataae sodi kimiek enokete tanang nataparach. Enokete ngataae nguna alongaren kang alowae alo anikalapatan a awaru ana eyei ngaren asaduku a Achamunet, ana eyei ni italeunitoe noi. Irichakinio etal logo jiik.

⁴Echoikini Aron ngataae na eyakasi ni esipor ataa ni erai egolit bon esubunitere. Nakaneni ejoikinit ngesi echoikini atamar enokete ngataae nguna jiik kaneni.

⁵“Tolem ngakiloi ngatomon ka ngaarei a ngakiria sodi kipou ngamugati ngatomon ka ngaarei.

⁶Torek ngamugati a ngangedakinet a ngaarei, ngamugati ngakan-kapei nangedakinet apei, erekinitae kidiama emeesa lo ebutakinitae egolit, alongaren Ekapolon Akuj.

⁷Kiwaak emitina bon nangedakinet naarei nguna erai akipeyos nakisitamunet epeikinio Ekapolon Akuj kilunyokin nados a amugati.

⁸Akolongit a Sabato daang, ejoikinit amugati iwaakinio ngaren Ekapolon Akuj. Erai etich ngolo eka Ngisirael jik.

⁹ Erai amugati aka Aron ka ngalesea keng. Nakaneni enyamete kesi amugati ani italeunitoe kainyo erai atiaket a akimuj naga na italeunitoe noi anakimuj ana elemikinitae Ekapolon Akuj kotere ngimurok a Akuj.”

¹⁰Ayei ekile epei lo arai lokookeng a aberu ana anyaritae Chelomis, lo arai apakeng Emisirit. Abu ekile ngolo tongolopa ka Esiraelit anadakar.

¹¹Lokookeng a Chelomis, ngolo, abu kimeny ka akilam ekiro a Akuj. Torikut ngitunga ngesi nia Musa. Arai aberu na anyaritae Chelomis ngina nakookeng a Dibiri alo arai eka ekitela a Dan.

¹²Apot kiratakis ngesi kiteto, kidareta Ekapolon Akuj elimokini kesi ibore ni esubeta itwaan ngini.

¹³Sodi tolimok Ekapolon Akuj Musa tama,

¹⁴“Kipudosi itwaan ngini nikalapatan a adakar. Itwaan daang ni eirari ngesi ilami Akuj, idokokini ngakan keng nakou a itwaan kangini tolim atamar esechit itwaan ngini. Nakaneni imasete ngitunga daang ngesi a ngamoru totoan.

¹⁵Ani erumor tolimok Ngisirael atamar itwaan cha daang ni ilami Akuj irirao kotere akisech keng

¹⁶sodi taarae. Itwaan ni erai Isiraelit kori ni erai ika akwap anache ni elomit nakwap a Isirael na ilamea Ekapolon Akuj, imasete ngitunga daang a ngamoru totoan.

¹⁷“Itwaan daang ni eari niche, eario.

¹⁸ Ani itwaan cha daang ni eari ibarasit a itwaan aniche, ejoikinit etachi, tatachak akiyar nakiyar nache.

¹⁹“Ani kewan itwaan itwaan niche, ejoikinit esubakinere ngesi dang ngakiro nguna asubea ngesi itwaan niche.

²⁰Ani kebil ngesi akoit, ebilio akoit keng dang apei. Ani kitumudukan ngesi akongu a itwaan aniche apei, itumudukanio nakeng dang apei. Ani kedoto ngesi ekelae a itwaan aniche, edotorio ekelae keng dang. Ewane locha ewani ngesi itwaan niche, ewanio ngesi dang kongina.

²¹Itwaan ni eari ibarasit, etachi, nakaneni itwaan ni eari itwaan niche, eario.

²² Erai etal logo ekus kadaang, esi Ngisirael ka ngitunga a ngakwapea anache lu irukito ka esi, kainyo arai ayong Ekapolon Akuj na arai Akuj kus.”

²³Ani elimokini Musa Ngisirael ngakiro nguna, kipudosi kesi itwaan ngini nikalapatan a adakar kimasa a ngamoru taara. Eger ngolo ngesi asubakineta Ngisirael ngakiro na adungokinit Ekapolon Akuj Musa.