Read turkana Ngilawi 25 Bible Online

Ngilawi 25 - turkana bible

Ngilawi 25

¹Tolimok Ekapolon Akuj Musa alokidiama emoru a Sinai tama,

²“Tolimok Ngisirael kona, ani ilomarete esi nakwap nakainakini ayong esi, kidodiutu arima anikang nyiitata ngalup ekaru lo a ngikan-kaarei.

³A ngikaru a ngikan-kapei, kitata ngamanat kus, toiro ngasepukan a ngimusabib ka akilem ngalemet.

⁴Nakaneni eliwor ekaru lo a ngikan-kaarei ekaru lo iangaritotor ngalup, ekaru lo italeunitoe ani a Ekapolon Akuj. Nyiitata ngamanat kus kori nyiiro ngasepukan a ngimusabib kus.

⁵Nyiilema tani ngalemet na erupunito make, na emam itwaan etat, nabo nyiilema ngamusabib alomusabib kus alu eringa esi nyeiro ngasepukan. Erai ekaru ngolo lo iangaritotor ngalup.

⁶Tani pekitatae ngalup ekaru ngolo, ianyunete esi akimuj analup. Eanyunete tani ngikedalak kus, ka ngikasubak etich kus, ka ngitunga a ngakwapea anache lu irukito ka esi,

⁷ ka ngibaren kus, ta ngitieng kus a moding lu eyakasi nakwap kus. Tanyama ibore daang ni ekoniunete ngalup kus.

⁸“Kimarutu ngikaru ngikan-kaarei ngakimarunet ngakan-kaarei. Eraakasi ngikaru ngulu daang ngitomwon-omwon ka ngikan-koomwon.

⁹Ani erumor, akolongit na a ngatomon a ekaru alo a ngikan-kaarei akolongit na erai aka arimakin ngasechesea, tomeasi itwaan nakwap daang etia ni etia tokutak aburuch.

¹⁰Eger ngolo ngesi italeunioto esi ekaru loa ngitomwon-kan, sodi talachakis ngitunga lu eyakasi nakwap daang. Ekaru logo, ngiboro daang lukolong agielario, ebuakinio itwaan nikolong sek arai ilope kori ngalesea a itwaan kangini. Ani itwaan daang nikolong agielario erai ekedalan, ebongori lotunga a awi keng.

¹¹Nyiitata ngamanat kus kori nyiilema ngikinyam lu erupunete make, kori nyiilema ngamusabib a ngimusabib alu nyeiro ngasepukan.

¹²Eliwor ekaru ngolo daang etia ni etia lo italeunitoe anikus. Inyamete esi akimuj na ekoniunete ngamanat make.

¹³“Ekaru logo, ngiboro daang lukolong agielario, ebuakinio itwaan nikolong sek arai ilope.

¹⁴Ani kigielak iyong itwaan niche ni arai Isiraelit ngalup kon kori ani kigielu iyong anikeng, wara nyiisechak ngesi.

¹⁵Ejoikinit etiae a ngaropiyae ana egielere akwap ngina itemio ka ngikaru lu ekonio amana ngina ngalemet eringa ekaru lo a ngitomwon-kan nyenanga.

¹⁶Ani keringa ngikaru elalak, elalakearosi ngaropiyae na egielere, nakaneni ani kekidioko ngikaru idongito, ekidiokerosi ngaropiyae egielere kainyo ibore ni egielaritae ngesi etiae a ngalemet ana ekoniunete ngalup.

¹⁷Nyiingala itwaan niche ni erai Isiraelit, nakaneni tokera Ekapolon Akuj na erai Akuj kus.

¹⁸“Kiwapa ngitalio kang daang ka ngakiro nakadungokinit ayong esi, sodi kibooyoto niajokon anakwap.

¹⁹Ekoniunete ngamanat ngalemet, nabo ianyunete esi akimuj na inyamete kibooyoto niajokon.

²⁰Ipedorete esi akingita tamasi, ‘Ani pekitak sua ngamanat atolema, nyoni kinyami ekaru lo a ngikan-kaarei?’

²¹Apiari ayong akwap kus ekaru lo a ngikan-kapei sodi tokoniu ngalemet na itemokin ngikaru ngiarei.

²²Ani itaate esi ngamanat ekaru lo a ngikan-kauni, inyamete esi ngalemet nakolong ilemete ekaru loa ngikan-kapei. Nakaneni emini esi akimuj na itemokino tanangea ngikinyam lu itakinete esi ekaru ngolo elemio.

²³“Nyiigielasi akwap kus jik kainyo nyerai akus, erai akang. Nakaneni iraakasi esi ngitunga a ngakwapea anache nabo ngikalotok.

²⁴“Ani egielario akwap, ejoikinit eyenio atamar epedori itwaan ni agielari akwap ngina akigiel nabo toliwor akeng.

²⁵Ani keliwor itwaan ni erai Isiraelit ekebootonit sodi togiela akwap keng, egieli itwaan ni eyanatar ngesi noi akwap.

²⁶Ani kemam itwaan ni egieli akwap keng ani ekisidi tabar ngesi sodi taanyu ngaropiyae na egielia nabo akwap ngina,

²⁷ejoikinit ngesi imaruni ngikaru lukolong agielarea ngesi akwap ngina tatachak ngesi itwaan ni agielit akwap ngina ngaropiyae a ngikaru kangulu, kitiliwo ngesi akwap akeng nabo.

²⁸Ani kemam ngesi ngaropiyae na itemokino etachakini itwaan ngini, eliwor akwap ngina aka itwaan ani kolong agieli tanang ekaru lo a ngitomwon-kan edoli. Ani edoli ekaru ngolo, ebuakinio ilope akwap ngina.

²⁹“Ani kegiela itwaan akai alore alo eyakasi ngawasea, epedori ngesi akigiel nabo toliwor akeng ekaru epei akisiakin anakolongit ana kolong agielarea.

³⁰Nakaneni ani pekegiel ngesi nabo ekaru lopei ngolo, nyepedori ngesi akigiel nabo. Eliwor akai ngina jik aka itwaan ani agieli ka ngalesea keng. Nyebuario nia itwaan ani kolong sek arai ilope na enangea ekaru lo a ngitomwon-kan.

³¹Nakaneni ngakais na eyakasi nadakarin na emam ngawasea, ikokinete ngamanat. Epedori itwaan nikolong sek arai ilope akigiel nabo, nakaneni ekaru lo a ngitomwon-kan, ebuakinio itwaan nikolong sek arai ilope.

³²Tani kikoni neni, epedorete Ngilawi agielun nabo ngiboro lu eraakasi ngikech, lu eyakasi lorerea lu etiakakinitae kesi.

³³Ani kegiela itwaan a ekitela a Lawi akai alorerea kangulu sodi nyeegielun nabo, ejoikinit ani edoli ekaru loa ngitomwon-kan, tobuakinae itwaan nikolong sek arai ilope, kainyo ngakais na Ngilawi alorerea alu etiakakinitae kesi, eraakasi ngaka ngikulepek jik Alosirael.

³⁴Nakaneni akwap na iyokiyo ngibaren na idunyatar ngirerea a Ngilawi, nyegielario. Erai akwap ngina akech jik.

³⁵“Ani kiboot itwaan ni erai Isiraelit ni elomit diyete kon, nakaneni tongopik ibore ni eyarea, kitan ngesi loger lo itanea iyong ekasuban etich kon, sodi torubakinea elomit diyete kon.

³⁶Nyiisiat ngesi ngaropiyae ngache ni eyakasi nakon, nakaneni toker Akuj sodi kimiek itwaan niche ni erai Isiraelit tolom diyete kon.

³⁷Nyiitatach ngesi ngaropiyae ngache kiatak ni eyakasi na earit ngesi anikon, kori nyiigielak ngesi akimuj taanyunea iyong ngaropiyae na elalak.

³⁸ Eraakasi nugu ngakiro na adungunit ayong Ekapolon Akuj na arai Akuj kus nakolong kepuduni esi alo Misiri, sodi kainak akwap a Kanaan ka aliwor Akuj kus.

³⁹“Ani kiboot noi Esiraelit lo elomit diyete kon, sodi togiel iyong ngesi ani esakea agielanot, nyiitusub ngesi etich loger a ekedalan.

⁴⁰Irukete iyong ka ngesi erai ekasuban etich kon sodi tosub etich kon tanang ekaru lo a ngitomwon-kan.

⁴¹Ani enangi ekaru ngolo, erotokinete ngesi ka ngide keng anawi kon, sodi toloto lotunga a awi kech ka ngibaren a ngalesea kech.

⁴²Eraakasi Ngisirael ngikedalak a Ekapolon Akuj, nakaneni epuduni ngesi kesi alo Misiri. Kotere ngakiro nguna, nyejoikinit kesi egielario toliworos ngikedalak.

⁴³Nyiimoitanik kesi, nakaneni toker Akuj kon.

⁴⁴Ani kisaki iyong ngikedalak, ipedori iyong agielun alobukui alu idunyatar iyong.

⁴⁵Ipedori iyong tani akigiel ngide a ngitunga a ngakwapea anache, alu irukito ka iyong. Ngide lu ikote lu idounio anakwap kon, eliworosi ngikon.

⁴⁶ Nakaneni imiekini iyong kesi tarata ngikedalak a ngide kon jik. Nakaneni nyiimoitanik tani itwaan ipei a Ngisirael.

⁴⁷“Ani kebar itwaan a akwap anache ni irukito ka iyong, tarai Esiraelit lo a akwap kon ekebootonit, sodi togiel itwaan a akwap anache ngesi ani esakea katogiel, kori togiel ngesi eyenet a itwaan a akwap anache,

⁴⁸ani kegiel ngesi kerumor, epedorio ngesi akigiel nabo. Epei a ngikaitotoi keng,

⁴⁹kori amaekeng, kori lokaapakeng, kori itwaan iche ni eyanasi ka ngesi noi, epedori akigiel ngesi. Kori ani keanyu ngesi dang ilope ngaropiyae na itemokino, epedori akipotor talakakinere.

⁵⁰Ejoikinit ngesi epupokin ka itwaan nisek egielit ngesi kimarut ngikaru lukolong agielere ngesi tanang ekaru loa ngitomwon-kan. Nakaneni ipotori ngesi ngaropiyae na itemokino atachea ekasuban etich alokaru kangulu.

⁵¹Ani keringa ngikaru elalak, ipotori ngesi ngaropiyae na itemem ka ngikaru lu idongito tanang ekaru loa ngitomwon-kan.

⁵²Ani keringa ngikaru ngidikidio, ipotori ngesi ngaropiyae na itemem ka ngirwa lu idongito tananga ekaru loa a ngitomwon-kan.

⁵³Nakaneni ejoikinit ngaropiyae nguna imarunio iwapitae eger lo a itwaan ani esubi etich, meere ekedalan.

⁵⁴Ani pekelachakin ngesi ka ngitunga a awi keng a ngirotin kangulu kadaang, ejoikinit ngesi ka ngitunga a awi keng elakakinio na enangea ekaru lo a ngitomwon-kan.

⁵⁵Nyepedori itwaan ni erai Isiraelit aliwor ekedalan nakajik, kainyo eraakasi Ngisirael ngikedalak kang. Epuduni kolong ayong kesi alo Misiri. Arai ayong Ekapolon Akuj na arai Akuj kus.”