Read turkana Ngilawi 26 Bible Online

Ngilawi 26 - turkana bible

Ngilawi 26

¹Todungok Ekapolon Akuj Ngisirael tama, “Nyiisuba ngakujo nasubuna kori ekisikwaane lo ichietae, kori ngapirio a ngamoru, kori akikul ngamoru na ilipio. Arai ayong Ekapolon Akuj na arai Akuj kus.

² Kirichakisi ngisukukui kang sodi kidodiut arima ani kelipitere ayong. Arai ayong Ekapolon Akuj.

³“Ani kiwapa esi ngitalio kang ka ngakiro na adungunit ayong,

⁴ameuni ayong akiru nikus toliwor erameene ngirwa lupalem erameenea, sodi tokoniunio akwap ngalemet, nabo tokoniut ngikito ageor.

⁵ Elalakearosi ngalemet kus toliwor ilemete esi tani kenang ngirwa lu egerere ngamusabib, nabo iliworosi esi igerete ngamusabib tani kenang ngirwa lu itakinere ngikinyam. Ianyunete esi akimuj daang na isakete akinyam, sodi kiboikinotor niajokon anakwap kus.

⁶“Kainakini ayong esi ekisil anakwap kus, sodi topero esi emam itwaan iemito. Alemari ayong ngitunga lukaadengak anakwap, nakaneni engopi ejie kaneni.

⁷Iritarete esi ngimoe kus taara.

⁸Ngitunga kus ngikan, iritarete ngimoe amiat apei, ani ngitunga kus amiat apei, iritarete ngimoe kus ngabunge ngatomon.

⁹Kapiari ayong esi etalala ngide kus. Erichakini ayong achamunet nakolong kichikakin ka esi.

¹⁰Elalakearosi ngalemet kus tananga lokaru loche lo elemere ngamanat. Ani ilemete esi ngamanat, ichakarete esi ngikinyam lungorok lu idongito sodi minio nikaaloman iwaakinete lu elemio.

¹¹Kiruki ayong ka esi aloeam kang, nakaneni nyakangeri ayong esi.

¹²Kiruki ayong ka esi atoliwor Akuj kus, sodi toliworos esi ngitunga kang.

¹³Ayong Ekapolon Akuj na arai Akuj kus, ngesi kolong kepuduni esi alo Misiri sodi nyiiliworosi esi ngikedalak nabo. Abu ayong atobil ngakito na aenitere ngimosiringan kus, sodi kemiek esi iloose a ekileenu!”

¹⁴Tolim Ekapolon Akuj tama, “Ani pekiwapa esi ngitalio kang, kirirao esi.

¹⁵Ani kiwout esi akiwap ngitalio kang ka ngakiro nakechikakinit ayong, sodi tosecha achamunet nakichikakin ayong ka esi,

¹⁶kerirae ayong esi. Ayauni ayong ngakiro naaronok nikus na ikote ngidekesinei lu nyengalekinete ka ngilekesinei lu kitumudukanete esi, kinyasut eboyor kus. Itakinete esi ngikinyam kus, nakaneni eliwor akitare kus aka pas kainyo kidwangete esi ngimoe kus tanyama ngalemet a ngamanat ana itaate esi.

¹⁷Kabilakin ayong esi katonger sodi kidwang esi. Kipolokinete esi ngitunga lu iremokino esi. Kibuli esi noi toliworos ikerete tani emam itwaan kirisit.

¹⁸“Ani kiwout esi akiwap ngakiro kang tani kirirae kerumor, eatakini ayong eriras kus ngakiatakinet ngakan-kaarei.

¹⁹Enyasuni ayong ekinis kus lo iraakatar lu ichanaka noi. Engopi akiru, toon akwap kus deu togogonger loger a ngasua anakirionok.

²⁰Etich kus lo isubete esi itionikinito, emam ibore ajokon kitaanyuni esi, kainyo nyekokete ngamanat nabo nyekoniunete ngikito ageor.

²¹“Ani keringa esi kingerito ayong, sodi towout akiwap ngakiro kang, eatakini ayong eriras kus nabo ngakiatakinet ngakan-kaarei.

²²Ameuni ayong ngitieng lukaadengak nikus, sodi taara ngide kus, tomunyasi ngibaren kus, sodi kidongo esi ikidioko noi toliworos ngirotin kus lu asilok.

²³“Ani kiwout esi akiwap ngakiro tani kirirae loger ngolo kerumor, nakaneni torubakis ingerito ngakiro kang,

²⁴kabilakin ayong esi kerira ngakiriraet ngakan-kaarei naaronok noi na idwangito na a ekingaren.

²⁵Ayauni ayong ejie nikus kerira esi kotere ni isecheta achamunet yok. Ani kichunakinosi esi lorerea kus isakete ayuuno, ayauni ayong ngidekesinei lu nyengalekinete nikus, sodi tachamut esi akisil ka ngimoe kus.

²⁶Atubi ayong akimuj kus toditeu, sodi toliwor ekeno epei itemokin ngaberu ngatomon akipoo ngamugati. Kikoranakinete kesi esi akimuj ngina itemito. Ani tani kirikasi esi akimuj ngina kerumor, idongi akoro kinyamit.

²⁷“Ani kirubakis esi kingerito ayong towout akiwap ngakiro kang tani kirirae kerumor,

²⁸kabilakin ayong esi angoit noi sodi kerira ngakiriraet ngakan-kaarei na eroko noi idwangito nakolong a ekingaren.

²⁹Eroner akoro kus noi toliwor inyamete esi ngide kus.

³⁰Enyasuni ayong ni ilipeeneta esi alokidiama ngimukur, atobwang ngikenoi lu inomeeneta esi emitina, sodi atachakak ngawat kus nakatoak kidiama ngawat nakatoak a ngakujo kus anasubuna. Kotere eger lo kakadakineta ayong ngakiro nguna,

³¹enyasuni ayong ngirerea kus ka ni ilipitotor esi, sodi atonger ngakipeyos kus.

³²Enyasuni ayong akwap kus lokojokon noi tatalasi tani ngimoe kus lu elomete nakwap ngina ngakiro a nginyas kangulu.

³³Ayauni ayong ejie nikus sodi katopeta esi nakwapea nagelayek. Idongi akwap kus ibooyi kongin, sodi kidongo ngirerea inyasuna.

³⁴Ani iyakasi esi nakwapea a ngimoe kus, iangari akwap kainyo iboikin kongin.

³⁵Ngirwa daang lu ibooyo akwap kongin, eliwor iangarit eger lokolong nyiangara a ache ngirwa lu ilomitotor esi nakwap ngina.

³⁶“Ani esi lu ipete nakwapea a ngimoe kus, ketubuli ayong esi toliwor tani kekutaki ekuwan akuyen kiirasi esi, imatarosi. Imatarosi esi tosub kori kirisitae alojie, nabo idakarosi esi, tani emam emoit eyei diyete kus.

³⁷Idakanakinosi esi ni eyakasi luche, tamam itwaan kirisit, nabo nyitijiete esi ngimoe kus.

³⁸Itoakete esi anakwapea a ngimoe kus, kirikakinos nakwapea nguna.

³⁹Ani esi ludikidio ipiyanunosi anakwapea a ngimoe kus, inyasunosi kotere akisech kus ka akisech kata apaakus.

⁴⁰Nakaneni elimorete ngalesea kus ngasechesea kech ka ngasechesea kata apaakech, alu kolong kangerete ayong towout akiwap ngakiro kang,

⁴¹sodi ketongoa ayong atobilakin kesi etwarak toloto nakwapea a ngimoe kech. Ani kitiditeunosi ngalesea kus tolunga akisech kech,

⁴²etamuni ayong achamunet nakichamakin ayong ka Yakobo, ka Isaka, ta Aburaam, nakaneni alimuni nabo atamar ainakini ayong ngitunga kang akwap.

⁴³Nakaneni imiekinete mono kesi akwap ibooyi kongina sodi kianga. Nakaneni irirao kesi kotere ngasechesea kech, kainyo angerete kesi ngitalio kang ka ngakiro na adungunit ayong.

⁴⁴Ani tani ikoni neni, ani epete kesi nakwapea a ngimoe kech, nyachakari ayong kesi jik kori nyamunyari, nyeedaunor achamunet nakichamakin ayong ka kesi, kainyo arai ayong Ekapolon Akuj na arai Akuj kech.

⁴⁵ Etiliwori ayong achamunet nakichamakin kata apaakech akitetet. Achamunet ngina ngesi nakichamakin ayong ka kesi na edodikinea ngibukui daang agogongu kang ani epudunio ngitunga kang alo Misiri, sodi atoliworor ayong Ekapolon Akuj, Akuj kech.”

⁴⁶Eraakasi lugu daang ngitalio ka ngakiro na adungokini Ekapolon Akuj Musa alokidiama emoru lobe Sinai kotere Ngisirael.