Read turkana Ngilawi 27 Bible Online

Ngilawi 27 - turkana bible

Ngilawi 27

¹Tolimok Ekapolon Akuj Musa tama,

²“Tolimok Ngisirael kona, ani elemikinio Ekapolon Akuj itwaan kotere akikong na itegeliarere, epedorio itwaan ngini alakakin erai ketach ngaropiyae na itemokino egielere itwaan, itemitoe a eger alopalem itemeenere.

³Ekile cha daang lo erai ekimar a ngikaru keng ngitomwon-arei, kori akipor ngikaru ngulu tananga ngitomwon-kapei, elakakinio a ngaropiyae a ngatomwon-kan.

⁴Ani kerai aberu, elakakinio ngaropiyae a ngatomwon-uni.

⁵Ani kerai itwaan ngini edia lo erai ekimar a ngikaru keng ngikan, kori akipor ngikaru ngulu tananga ngitomwon-arei, elakakinio a ngaropiyae a ngatomwon-arei. Ani kerai itwaan ngini nipese, elakakinio a ngaropiyae ngatomon.

⁶Ani kerai idia ni erai ekimar a ngikaru keng elap tanang ngikaru ngikan, elakakinio a ngaropiyae a ngakan. Ani kerai ikoku ngini ipese, elakakinio a ngaropiyae a ngauni.

⁷Ani itwaan nikile ni erai ekimar a ngikaru keng ngitomwon-kapei, kori lu iporito ngikaru ngulu, elakakinio a ngaropiyae a ngatomon ka ngakan. Ani kerai itwaan ngini niberu elakakinio a ngaropiyae a ngatomon.

⁸“Ani kiboosit itwaan ni ikongit tongopikis ngaropiyae na itemokinosi napalem elakanakinere ngitunga, erikuni ngesi itwaan ngini lomuron a Akuj. Itemokini emuron a Akuj itwaan ngini ngaropiyae na ejoikinit etachi, itemem ka ibore ni etingit itwaan ngini.

⁹“Ani kerai akikongiet ngina aka ibarasit ani palem echamakinitae elemanakinio Ekapolon Akuj, eliwor ainakinet na elemikinio Ekapolon Akuj daang na italeunitoe.

¹⁰Itwaan ngini alemuni ibarasit ngini, nyepedori nabo jik akilokony ibarasit ngini ka iche niajokon kori niaronon. Ani kilokony ngesi, eliworosi ngibaren luarei ngulu daang ngika Ekapolon Akuj.

¹¹Nakaneni ani kerai akikongiet aka ibarasit ani nyitaleunitoe, ibarasit ni nyechamakinitae elemikinio Ekapolon Akuj, erikori itwaan ngini ibarasit ngini lomuron a Akuj.

¹²Elimuni emuron a Akuj ngaropiyae na egielere ibarasit ngini, itemit ajokis keng ka aronis keng. Nakaneni eliworosi ngaropiyae na elimuni emuron nguna egielere ibarasit ngini.

¹³Ani kesaki itwaan nisek arai ilope a ibarasit akigiel nabo ibarasit ngini, ejoikinit ngesi elemuni ngaropiyae nagielet ani erumor kiatak alemunet apei anakan a ngaropiyae ana egielitere ibarasit.

¹⁴“Ani italeuni itwaan akai keng toliwor aka Ekapolon Akuj, elemuni emuron a Akuj ngaropiyae na egielere akai ngina, itemit ajokis keng ka aronis keng. Nakaneni eliworosi ngaropiyae na elimuni emuron nguna egielere akai ngina.

¹⁵Ani kesaki itwaan nisek arai ilope a akai akigiel nabo akai ngina, ejoikinit ngesi elemuni ngaropiyae nagielet ani erumor kiatak alemunet apei anakan a ngaropiyae ana egielitere akai.

¹⁶“Ani kitaleu itwaan akwap keng epewae toliwor aka Ekapolon Akuj, elimunio ngaropiyae na egielere itemitoe ka ngikinyam lu itaanakinio neni. Ngakiloi ngatomwon-arei a erau, eraakasi ngaropiyae keng ngatomon.

¹⁷Ani kitaleu ngesi akwap ngina ekaru lo a ngitomwon-kan, elemunio ngaropiyae daang na itemokino egielere akwap ngina.

¹⁸Ani kitaleu ngesi akwap ekisidi, itemi emuron a Akuj etiae a ngaropiyae a akwap kangina alokaru alo eringa idongit tanangea ekaru lo a ngitomwon-kan, sodi tolim ngesi ngaropiyae na etubitoe.

¹⁹Ani kesaki itwaan nisek arai ilope a amana akigiel nabo amana ngina, ejoikinit ngesi elemuni ngaropiyae nagielet ani erumor kiatak alemunet apei anakan a ngaropiyae ana egielitere amana ngina.

²⁰Ani kegielaki ngesi amana itwaan iche eringa mono nyegieluna ani a Ekapolon Akuj, nyepedori ngesi akigiel nabo amana ngina.

²¹Ani enangi ekaru lo a ngitomwon-kan, eliwor amana ngina aka Ekapolon Akuj jik. Ngimurok a Akuj elemarete amana ngina toliwor akech.

²²“Ani kitaleu itwaan amana toliwor aka Ekapolon Akuj, tarai amana ngina na agieli ngesi meere nakolong erumi,

²³itemi emuron a Akuj etiae a ngaropiyae a amana kangina alokaru alu eringa idongito tanangea ekaru loa ngitomwon-kan. Nakaneni ejoikinit itwaan ngini elemuni ngaropiyae akolongit napei ngina. Eraakasi ngaropiyae ngaka Ekapolon Akuj.

²⁴Ani enangi ekaru lo a ngitomwon-kan, ebuakinio amana ngina itwaan nikolong sek arai ilope, ka ngalesea keng.

²⁵“Ngaropiyae daang na egielanarere, itemio a eger alosek itemeenere.

²⁶“Iuriuna nia ekingaren a ibarasit, erai alotal ika Ekapolon Akuj, kotere ngakiro nguna, emam itwaan italeuni toliwor akipeyos na elemuni ngesi ani esakitor alemuni kerai itaok, kori imesek, kori ikale, eraakasi ngika Ekapolon Akuj.

²⁷Nakaneni iuriuna ni ekingaren a ibarasit ani nyitaleunitoe, epedorio akigiel nabo a etiae a ngaropiyae ana itemitoe ka napalem egielere, ani erumor kiatakinae alemunet apei anakan a ngaropiyae ana egielere.

²⁸“Emam itwaan egielari kori egieli nabo ibore ni italeuni ngesi toliwor ika Ekapolon Akuj emam itwaan itingakini.[11] Kerai ibore ngini itwaan, kori ibarasit, kori akwap, eraakasi ngika Ekapolon Akuj jik.

²⁹ Tani itwaan nikolong etaleunio ani Ekapolon Akuj, nyegielunio nabo, ani kegielun, ejoikinit eario.

³⁰“Alemunet apei anatomon a akimuj kadaang ana ekoniuni akwap, kerai ngalemet kori ageor, erai aka Ekapolon Akuj.

³¹Ani kesaki itwaan akigiel nabo, ejoikinit ngesi elemuni etiae a ngaropiyae ana palem egieleenere, ani erumor kiatak alemunet apei anakan a ngaropiyae egieleenere.

³²Ibarasit ipei alobaren alutomon erai ika Ekapolon Akuj. Ani imario ngibaren, ibarasit daang nia ngitomon, erai ika Ekapolon Akuj.

³³ Nyejoikinit ilope a ngibaren erekini ngibaren toliworos lu ijiwaikinit eseunio, nabo nyejoikinit ngesi ilokonyi ngibaren. Ani kilokony ngesi ibarasit ipei ka niche eliworosi ngibaren ngulu daang ngika Ekapolon Akuj, nakaneni emam itwaan egieli nabo.”

³⁴Ngitalio ngulu kesi adungokini Ekapolon Akuj Musa alokidiama emoru lobe Sinai, kotere Ngisirael.