Read turkana Ngilawi 3 Bible Online

Ngilawi 3 - turkana bible

Ngilawi 3

¹“Ani elemuni itwaan aite keng toliwor akipeyos a ekisil, ejoikinit eliwor emong kori aite na emam ni ichwangakina.

²Idokokini itwaan akan nakou a ibarasit sodi taar anakituk a eam a Akuj. Talokookeng a Aron lu eraakasi ngimurok a Akuj, ewatakinete ngaakot lowaitin luomwon daang a ekeno alo a ngakipeyos.

³Epeikinete kesi Ekapolon Akuj nginerin a ibarasit lu eraakasi asepae daang a ngiboro akook,

⁴ka ngingalur ka asepae kech, ta ewae loajokon a emany.

⁵Epeyete ngimurok nginerin ngulu daang alokeno alo a ngakipeyos aapei ka akipeyos na inomio. Ejoikinit akukuny a akipeyos kangina Ekapolon Akuj.

⁶“Ani kerai amesek kori akine erai akipeyos a ekisil, eliwor ibarasit nikile kori niberu, nakaneni ejoikinit erai na emam ni ichwangakina.

⁷Ani kelemu itwaan imesek,

⁸idokokini ngesi akan keng nakou a imesek sodi taar alongaren eam. Ewatakinete talokookeng a Aron ngaakot a ibarasit lowaitin daang a ekeno alo a ngakipeyos.

⁹Epeikinete kesi Ekapolon Akuj nginerin a ibarasit lu eraakasi nikataronon ka asonyok daang etubunio ani etiakatar ka achir, ka asepae daang,

¹⁰ka ngingalur ka asepae kech, ta ewae loajokon a emany.

¹¹Epeikini emuron Ekapolon Akuj akipeyos ngina alokeno alo a ngakipeyos.

¹²“Ani kelemu itwaan akine,

¹³idokokini ngesi akan keng nakou a akine sodi taar alongaren eam. Ewatakinete talokookeng a Aron ngaakot a ibarasit kangini lowaitin luomwon a ekeno a ngakipeyos.

¹⁴Sodi tolemikis Ekapolon Akuj nginerin a ibarasit lu eraakasi asepae daang a ngiboro a akook,

¹⁵ka ngingalur ka asepae kech, ta ewae loajokon a emany.

¹⁶Ipeye emuron nginerin ngulu daang alokeno alo a ngakipeyos, toliwor akukuny kech na ejoikinit Ekapolon Akuj. Erai nikataronon daang ika Ekapolon Akuj.

¹⁷Alosirael, emam itwaan enyami nikatuman kori ngaakot. Erai ibore en etal lo iwapete Ngisirael jik awadaang ani elomete kesi.”