Read turkana Ngilawi 4 Bible Online

Ngilawi 4 - turkana bible

Ngilawi 4

¹Todungok Ekapolon Akuj Musa tama,

²“Tolimok Ngisirael kona, itwaan cha daang ni esechi sodi kichwangak etal epei alotalio alu edungunit Ekapolon Akuj erai peiyechakinit, ejoikinit irichakini ngitalio lu isisaunitae lugu.

³“Ani kerai Emuron Loapolon a Akuj esechi sodi kitosech ngitunga, elemuni ngesi emong losorokit lo emam ni ichwangakina toliwor akipeyos ani a Ekapolon Akuj kotere akisech a emuron kangolo.

⁴Eramuni ngesi emong nakituk a eam kidokok akan keng nakou a emong, taar kaneni alongaren Ekapolon Akuj.

⁵Elemuni Emuron Loapolon ngaakot ngache yaa tooma eam.

⁶Ilumokini emuron ngolo ekimoin keng naakot kiterak ngaren awaru na etiakit ngiwaitin lu italeunitoe ngakiterakinet ngakan-kaarei.

⁷Ani erumor kiwasak ngaakot ngadi najipeta na eyakasi lowaitin a ekeno alo inomere emitina, alotooma eam. Ani ngaakot na idongete, ebukokini ngesi lowae lo a ngalup a ekeno a ngakipeyos, alo eyei nakituk a eam.

⁸Elemari ngesi nikataronon daang alomong kangolo. Elemari asepae,

⁹ngingalur ka asepae kech ta ewae loajokon a emany.

¹⁰Elemuni emuron a Akuj nikataronon topee alokeno a ngakipeyos ana inomio, loger lo epeyo nikataronon a ibarasit ani eario kotere ngakipeyos a ekisil.

¹¹Nakaneni ejomu a emong kangolo, ka akiring, ka akou, ka ngamuroi ka ngakwaas ka aboi imorikina ka ngamaliteny,

¹²edakari nikalapatan a adakar tanang ni echamakinitae alotal, ni erai ngesi ebukonorio ekuron. Epeyi ngesi nginerin ngulu kaina a akim ana inokakinitae a ngakito.

¹³“Ani kerai Ngisirael daang esechete ngitalio a Ekapolon Akuj erai peiyechakinito,

¹⁴napei eyenere akisech ngina, eramunete ngitunga daang emong losorokit toliwor akipeyos a akisech. Eramunete kesi loeam a Akuj.

¹⁵Idokokinete ngikarikok a ngitunga ngakan kech nakou a emong kangolo. Earakinio emong ngolo neni.

¹⁶Eyaari Emuron Loapolon ngaakot a emong ngache tooma loeam.

¹⁷Ilumokini ngesi ekimoin keng naakot, sodi kiterak ngaren awaru ngakiterakinet ngakan-kaarei.

¹⁸Iwasakini ngesi ngaakot ngadi najipeta na eyakasi lowaitin a ekeno alo inomere emitina, alotooma eam. Ani ngaakot na idongete ebukokini ngesi lowae lo alokwap a ekeno a ngakipeyos lo eyei nakituk a eam.

¹⁹Ani erumor, elemari ngesi nikataronon keng daang sodi topee alokeno alo a ngakipeyos.

²⁰Esubea ngesi emong ngolo ngakiro napei esubea emong lo a akipeyos ana akisech. Kotere eger ngolo, elemuni emuron akipeyos a akisech na emookere ngitunga, nakaneni erimakinio kesi.

²¹Elemari ngesi emong yaa nikalapatan a adakar topee loger lo epeyo ngesi emong lo elemunit ngesi kotere akisech keng a ilope. Erai akipeyos ngina na elemari akisech a ngitunga.

²²“Ani kerai ekarikon a ngitunga esechi kichwangak epei a ngitalio alu edungunit Ekapolon Akuj erai peiyechakinit,

²³napei elimokinere ngesi atamar esechit, erikuni ngesi ekoroe lo emam ni ichwangakina toliwor akipeyos keng.

²⁴Idokokini ngesi akan keng nakou a ekoroe kangolo, sodi taar ani palem eareenere akipeyos na inomio alongaren Ekapolon Akuj. Erai akipeyos ngina na elemari akisech.

²⁵Ilumokini emuron ekimoin naakot a ibarasit, kiwasak najipeta na eyakasi lowaitin a ekeno alo a ngakipeyos. Ani erumor tobukok ngaakot na idongete lowae lo a ngalup a ekeno alo a ngakipeyos.

²⁶Epeyi ngesi nikataronon a akine kangina alokeno alo a ngakipeyos loger lo epeyo nikataronon a akipeyos ana ekisil. Kotere eger ngolo, elemuni emuron akipeyos na emookere akisech a ekarikon a ngitunga, sodi torimakinere ekarikon ngolo.

²⁷“Ani kerai ipei a ngitunga alu nyeyenikinitae esechi kichwangak epei a ngitalio alu edungunit Ekapolon Akuj erai peiyechakinit,

²⁸napei elimokinere ngesi atamar esechit, erikuni ngesi akine naberu na emam ni ichwangakina toliwor akipeyos a akisech keng.

²⁹Idokokini ngesi akan keng nakou a akine kangina sodi taar anipalem eareenere akipeyos na inomio alongaren Ekapolon Akuj.

³⁰Ilumokini emuron a Akuj ekimoin naakot a ibarasit, kiwasak najipeta na eyakasi lowaitin a ekeno alo a ngakipeyos. Ani erumor tobukok ngaakot na idongete lowae lo a ngalup a ekeno alo a ngakipeyos.

³¹ Elemari ngesi nikataronon keng daang loger lo elemanarere nikataronon alobaren kadaang alu eario eraakasi akipeyos a ekisil. Ipeye ngesi alokeno a ngakipeyos sodi tojoik akukuny Ekapolon Akuj. Kotere eger ngolo, elemuni emuron akipeyos a akisech a itwaan, sodi torimakinae itwaan ngini.

³²“Ani keriku itwaan imesek erai akipeyos a akisech, ejoikinit imesek ngini emam ni ichwangakina.

³³Idokokini ngesi akan keng nakou a imesek kangini sodi taar anipalem eareenere akipeyos na inomio alongaren Ekapolon Akuj.

³⁴Ilumokini emuron a Akuj ekimoin naakot a ibarasit, kiwasak najipeta na eyakasi lowaitin a ekeno alo a ngakipeyos. Ani erumor tobukok ngaakot na idongete lowae lo a ngalup a ekeno alo a ngakipeyos.

³⁵Elemari ngesi nakataronon keng daang loger lo elemanarere nikataronon alobaren kadaang alu eario eraakasi akipeyos a ekisil. Ipeye ngesi alokeno a ngakipeyos aapei ka ngakipeyos nache epeikinitoe Ekapolon Akuj. Kotere eger ngolo, elemuni emuron akipeyos na emookere akisech a itwaan, sodi torimakinae itwaan ngini.