Read turkana Ngilawi 5 Bible Online

Ngilawi 5 - turkana bible

Ngilawi 5

¹“Ngakiro na ikote nugu kesi elemunere ngakipeyos a akisech. “Ani kenyaraun itwaan nitubet ekies tamarae kisisau ngakiro a ibore ani engolik ngesi kori eira, nakaneni towou ngesi alimor, asech ngesi.

²“Ani ketap itwaan ibore ni nyitaleunitoe peiyechakinit, kerai ta ibore ni ikoni ibarasit nikatoan, eliwor ngesi ni nyitaleuno nabo erai ekasechan napei eyenea ngesi ngakiro na asub.

³“Epedori ta itwaan peiyechakinit akitap ibore cha daang ni nyitaleunitoe, ni itorunit nitwaan. Eliwor itwaan ngini ekasechan napei eyenea ngesi atamar atap ibore ngini.

⁴“Ani kekopokin itwaan akikong eringa nyitamakina ngakiro lokojokon, tarai nyeyeni ngesi, eliwor ekasechan napei eyenea atamar ekong.

⁵“Ani kesech itwaan anakiro kanguna, ejoikinit elimori akisech na asub ngesi.

⁶Erikuni ngesi imesek niberu kori ikale niberu nia Ekapolon Akuj toliwor akipeyos. Elemuni emuron akipeyos na emookere akisech a itwaan kangini.

⁷“Ani kengopiki ngesi imesek niberu kori ikale niberu elemuni, eyauni ngesi nia Ekapolon Akuj ngakurio ngaarei kori takidomelio ngaarei toliworos ngakipeyos na emookere ngasechesea keng. Eliwor apei akipeyos na emookere akisech, toliwor nache akipeyos na epeikinitoe Ekapolon Akuj.

⁸Eyauni ngesi kesi nia emuron a Akuj. Elemuni emuron ikeny nia akipeyos a akisech mono. Emojirikini ngesi akou a ikeny nakaneni nyerutori akou keng.

⁹Iwasakini ngesi ngaakot ngache lokwaas a ekeno alo a ngakipeyos. Ngaakot nache idongete, iteleleario alowae alo a ngalup a ekeno alo a ngakipeyos. Erai akipeyos naga na emookere akisech.

¹⁰Ani erumor tolem ngesi ikeny nia ngiarei erai akipeyos na epeikinitoe Ekapolon Akuj, loger lo elimunitere. Kotere eger ngolo, elemuni emuron a Akuj akipeyos na emookere akisech a itwaan kangini, nakaneni, erimakinio ngesi.

¹¹“Ani kengopikis itwaan ngakurio ngaarei kori takidomelio ngaarei, eyauni ngesi akilo apei a ngakiria toliworos akipeyos a akisech. Nyiwaakini ngesi akimiet kori emitina nakiria nguna kainyo erai akipeyos a akisech, meere akipeyos a ngalemet.

¹²Eyauni ngesi ngakiria nguna nia emuron a Akuj. Emukuni emuron ngakiria nguna akan apei ileleba, kidodiu ibore ngini atamar erai akipeyos nakisitamunet na elemikinitae Ekapolon Akuj. Inomio ngakiria nguna alokeno alo a ngakipeyos erai akipeyos epeikinitoe Ekapolon Akuj. Erai ibore ngini akipeyos na emookere akisech.

¹³Kotere eger ngolo, elemuni emuron akipeyos na emookere akisech a itwaan, sodi torimakinae itwaan ngini. Eraakasi ngakiria nache ngaka a emuron a Akuj, loger lo a akipeyos a ngalemet.”

¹⁴Tolimok Ekapolon Akuj Musa tama,

¹⁵“Ani kesech itwaan ani ewounea akipotor ngiboro lu italeunitoe eraakasi ngika Ekapolon Akuj, erikuni ngesi nia Ekapolon Akuj emesek lo emam ni ichwangakina toliwor akipeyos na a atachanot a akisech. Itemio etiae a ngaropiyae a emesek kangolo a eger alosek itemeenere aloeam a Akuj.

¹⁶Ejoikinit ngesi elemuni ngiboro lusek awouni akipotor ani erumor tolem nabo ngiche lu eraakasi alemunet apei anakan. Elemuni ngesi nak emuron a Akuj sodi emuron tolem ibarasit kipeye erai akipeyos a akisech a a itwaan, nakaneni erimakinio ngesi.

¹⁷“Ani kesech itwaan idio peiyechakinit kichwangak ngitalio a Ekapolon Akuj edio, erai ngesi ekasechan nakaneni ejoikinit ibusi akisech keng.

¹⁸Ejoikinit ngesi erikuni nia emuron a Akuj emesek lo emam ni ichwangakina toliwor akipeyos a atachanot a akisech. Itemio etiae a ngaropiyae a emesek kangolo a eger alosek itemeenere. Elemuni emuron akipeyos na emookere akisech a itwaan kangini sodi torimakinae ngesi.

¹⁹Erai ngina akipeyos a atachanot a akisech ana asechaki ngesi Ekapolon Akuj.”