Read turkana Ngilawi 6 Bible Online

Ngilawi 6 - turkana bible

Ngilawi 6

¹Tolimok Ekapolon Akuj Musa tama,

²“Ani kesech itwaan ani a Ekapolon Akuj, elemuni akipeyos ani ewounea akinyiakakin itwaan niche ibore nisek imiekinitere ngesi, kori kekoko ibore a itwaan aniche, kori kingala itwaan niche ka akitoaniar ibore keng.

³Elemuni akipeyos erai keanyu ibore a itwaan aniche nisek achakara sodi kikong epega tama nyeanyuna.

⁴Ani na esechea ngesi toyen atamar asechit, inyiakari ngesi ibore nikolong ademari itwaan, kori nikolong etoaniari ngesi anitwaan, kori nikolong emiekinere ngesi, kori ibore a itwaan nisek achakara taanyu ngesi.

⁵Ibore cha daang nikolong ekongio ngesi eliokonit, inyiakari ngesi daang imorikina ka atiaket apei anakan a ibore kangini.

⁶Erikuni ngesi nia emuron a Akuj emesek ka ekoroe lo emam ni ichwangakina toliwor akipeyos a atachanot a akisech ani a Ekapolon Akuj. Itemio etiae a ngaropiyae keng a eger alosek itemeenere aloeam a Akuj.

⁷ Elemuni emuron akipeyos na emookere akisech a itwaan, sodi torimakinae ngesi.”

⁸Todungok Ekapolon Akuj Musa tama,

⁹“Todungok Aron ka talokookeng atamar ikote ngitalio a ngakipeyos ana inomio nege. Imiekinio akipeyos na inomio alokeno akwaar daang kiiya kiwala, nakaneni kimiekinae akim erubakinit enoki.

¹⁰Enapi emuron eworu lokooyen kaanikan ka edengo lokaanikan, tolem ekuron itilit alokeno kiwaak lokwaas a ekeno alo a ngakipeyos.

¹¹Ani erumor ilochi ngesi ngiworui sodi yaa ekuron nikalapatan a adakar, ni italeunitoe.

¹²Akim na enoki alokeno alo a ngakipeyos, ejoikinit imiekinio enoki, nakaneni nyiimiekin edunge. Ataparach daang, iwaakini emuron ngakito nakim ngina, torek akipeyos na inomio kidiama, sodi topee nikataronon a ngakipeyos a ekisil.

¹³Ejoikinit akim imiekinio enoki jiik alokeno alo a ngakipeyos, nakaneni nyiimiekin edunge.

¹⁴“Ikote ngitalio a ngakipeyos a ngalemet nege. Emuron a Akuj lo erai lokookeng a Aron, elemikini Ekapolon Akuj akipeyos a ngalemet alongaren ekeno lo a ngakipeyos.

¹⁵Ani erumor tomuk ngesi ngakiria na eyei akimiet ileleba akan, imorikina ka emitina, sodi topee alokeno erai akipeyos nakisitamunet, kidodiu ibore ngini atamar elemikinit daang Ekapolon Akuj. Ejoikinit akukuny a akipeyos kangina Ekapolon Akuj.

¹⁶Enyamete Aron ka talokookeng ngakiria na idongete. Enyamete alowae alo italeunitoe erai peiwaakinito ekitoe lo itubui. Enyamete kesi ngakiria nguna alo tooma alaar a eam a Akuj.

¹⁷Nyejoikinit epeyo imorikina ka ekitoe lo itubui ngamugati. Ainaki Ekapolon Akuj ngimurok ngakiria nguna toliworos na etiakakinitae kesi anakipeyos ana epeikinitoe Ekapolon Akuj. Erai akipeyos ngina na italeunitoe lokojokon, loger a akipeyos ana a akisech ka na a atachanot a akisech.

¹⁸Edungunitoe atamar, analesea kadaang, enyamete ngide lusapa jiik analesea a Aron akipeyos na epeikinitoe Ekapolon Akuj. Itwaan cha daang ni etapi akipeyos ngina, italeun.”

¹⁹Tolimok Ekapolon Akuj Musa tama,

²⁰“Kotere akitaleun Aron ka talokookeng toliworos ngimurok. Ani akolongit na italeunere ngesi ani idokakinere akimiet nakou, elemikini Ekapolon Akuj akipeyos na erai akilo apei a ngakiria anaajokak (eriyan etiae keng ka lopalem a akipeyos a ngalemet ana elemuununio akolongit apei), elemunio anus nataparach, tolemunea anus nache ebong.

²¹Imorikini ngakiria nguna ka akimiet kipoo anapalarang anabeleny. Eyauni igurokina lokojokon, topee eraakasi ngakapongor loger a akipeyos a ngalemet, dio alemun erai akipeyos na ejoikinit akukuny keng Ekapolon Akuj.

²²Emuron daang lo italeunio analesea a Aron kidokakinae akimiet nakou toliwor Emuron Loapolon.

²³Akipeyos cha daang a ngalemet na elemuni emuron a Akuj, inomio daang, emam na enyamio.”

²⁴Todungok Ekapolon Akuj Musa tama,

²⁵“Tolimok Aron ka talokookeng ngitalio lua ngakipeyos a akisech lugu. Ibarasit ni eario kotere akipeyos a akisech, eario alowae alo alokwap ekeno lo a ngakipeyos, ni earanakinio ngibaren lua ngakipeyos ana inomio. Erai akipeyos naga na italeuno lokojokon.

²⁶Emuron lo ipeye ibarasit, imuji ani italeunitoe, alotooma alaar a eam a Akuj.

²⁷Itwaan cha daang kori ibore cha daang ni etapi akiring a ibarasit kangini, italeun. Eworu cha daang lo etapakin ngaakot a ibarasit kangini, ejoikinit ilotario alowae alo italeuno.

²⁸Amot nalupe cha daang na ikulaare akiring, ejoikinit ebwangio. Ani kerai apalarang ikulaare, ejoikinit irigaario, sodi kilatarae a ngakipi.

²⁹Itwaan nikile daang ni erai ika awi ana ngimurok, enyami akipeyos ngina, kainyo italeunitoe.

³⁰Nakaneni emam akipeyos a akisech na enyamio erai keyaun ngaakot loeam toliwor italeunere ewae lo italeuno. Inomio akipeyos ngina.