Read turkana Ngilawi 7 Bible Online

Ngilawi 7 - turkana bible

Ngilawi 7

¹“Eraakasi lugu ngitalio a ngakipeyos a atachanot, ana italeunitoe.

²Eario ibarasit a akipeyos kangina alowae alo alokwap ekeno lo a ngakipeyos, ani eareenere ngibaren a ngakipeyos ana inomio. Nakaneni ewatakinio ngaakot kech lowaitin luomwon a ekeno alo a ngakipeyos.

³Elemunio nikataronon keng daang topeoi alokeno alo a ngakipeyos. Elemunio asonyok, ka asepae,

⁴ka ngingalur ka asepae kech, ta ewae loajokon a emany.

⁵Inomi emuron a Akuj nikataronon daang alokeno alo a ngakipeyos toliwor akipeyos epeikinitoe Ekapolon Akuj. Erai akipeyos ngina aka atachanot.

⁶Enyami itwaan nikile a awi a ngimurok a Akuj daang akipeyos ngina. Nakaneni ejoikinit enyamio alowae alo italeunitoe kainyo erai akipeyos na italeunitoe.

⁷“Ikwaan etal a akipeyos a akisech ka etal a akipeyos a atachanot. Erai akiring aka emuron alo inomi akipeyos.

⁸Erai eleu a ibarasit ani inomio tonomia aka emuron alo inomi akipeyos.

⁹Akipeyos a ngalemet daang na emakinitae nakim, kori apeyo anapalarang kori anapalarang anabeleny, erai aka emuron a Akuj alo apeikini Ekapolon Akuj.

¹⁰Nakaneni ani ngakipeyos a ngalemet daang na nyepeyo, erai kimorikinitae ka akimiet kori pekimorikinitae, erai aka talokookeng a Aron alu eraakasi ngimurok a Akuj. Ejoikinit kesi emorete ngakipeyos nguna eriyan.

¹¹“Ngitalio a ngakipeyos a ekisil lugu.

¹²Ani kelemu itwaan akipeyos ngina erai abuakinet Akuj alakara, elemuni ngesi ngamugati napadok, aapei ka ibarasit ni ipeyoe. Ejoikinit ngamugati nguna eraakasi nakabwok kori ngabisikutio na iwasakinitae akimiet kori ngakekio imorikinitae ka akimiet.

¹³Elemuni ngesi ngamugati nakabwok, aapei ka akipeyos a ekisil na ebuakinere Ekapolon Akuj alakara.

¹⁴Eyauni ngesi apei a ngamugati kadaang erai alemunet na iwakiwakio elemikinitae Ekapolon Akuj. Erai aka emuron a Akuj alo elemuni ngaakot a ibarasit towatak lokeno loa ngakipeyos.

¹⁵Ejoikinit akiring a ibarasit enyamio akwaar na earere, amam na imiekinio eperi kiwalak.

¹⁶“Ani keyau itwaan akipeyos a ekisil anisek ekongio, kori erai keyau ani esakitor ngesi ilope ayaun, enyamio akiring a ibarasit kangini akolongit ngina, ani na idongi, enyamio akolongit na etupit ngina.

¹⁷Akiring daang na eperi tanang akolongit na ngauni, ejoikinit inomio.

¹⁸Ani kenyam akiring ngina adio akwaar na a ngauni, nyechamuni Akuj akipeyos a itwaan kangini, nabo nyimarunio atamar alemu itwaan ngini akipeyos. Eliwor akiring ngina na ilamitae, ani itwaan ni enyami, eanyunosi ka ngakiro naaronok.

¹⁹Ani ketapakin akiring ka ibore cha daang ni nyitaleunitoe, nyejoikinit enyamio. Nakaneni ejoikinit inomio. “Itwaan cha daang ni italeuno epedori akinyam akiring nache daang.

²⁰Nakaneni ani kenyam itwaan ni nyitaleuno akiring ngina, nyeringa nabo ngesi imarunitae atamar erai ipei a ngitunga a Akuj.

²¹Nabo, itwaan cha daang ni enyami akiring a ibarasit kaen tarai sek etapit ngesi ibore ni nyitaleunitoe, kerai itwaan kori ibarasit, nyeringa nabo ngesi imarakinitae atamar erai ipei a ngitunga a Akuj.”

²²Tolimok Ekapolon Akuj Musa tama,

²³“Tolimok Ngisirael ngitalio lugu. Emam nikataronon a ngaatuk, ka ngamesekin, ta ngaanei na echamakinitae enyamio.

²⁴Nyiinyam nikataronon a ibarasit ani atoani bon kori ani eari ebu nakaneni epedorio asubea ngakiro nache.

²⁵Itwaan daang ni enyami nikataronon a ibarasit ani elemunio erai akipeyos a ekisil ani Ekapolon Akuj, nyeringa imarunitae atamar erai ipei a ngitunga a Akuj.

²⁶Wadaang nicha elomete Ngisirael, nyejoikinit kesi enyamete ngaakot a ngikieny kori a ngibaren.

²⁷ Itwaan daang ni esechi etal logo, nyeringa imarunitae atamar erai ipei a ngitunga a Akuj.”

²⁸Tolimok Ekapolon Akuj Musa tama,

²⁹“Tolimok Ngisirael ngitalio lugu. Itwaan cha daang ni elemuni akipeyos a akisil, ejoikinit eyauni epewae a ibarasit kangini erai ainakinet na elemikinit Ekapolon Akuj.

³⁰Yau ngesi a ngakan keng a ilope erai alemunet na elemikinit Ekapolon Akuj. Eyauni ngesi nikataronon a ibarasit ka atorobu keng sodi tolemu erai ainakinet nabekot ani a Ekapolon Akuj.

³¹Inomi emuron a Akuj nikataronon alokeno alo a ngakipeyos, nakaneni eliwor atorobu aka ngimurok.

³²Elemunio amuro nakitalio erai alemunet nabekot

³³nakinae emuron a Akuj lo alemuni ngaakot ka nikataronon a akipeyos ana a ekisil.

³⁴Erai atorobu a ibarasit ainakinet nabekot, tarai amuro nakitalio alemunet nabekot na alemu Ekapolon Akuj Alosirael sodi nak ngimurok keng. Nginerin ngulu ejoikinit Ngisirael einanakinete ngimurok a Akuj jiik.

³⁵Nginerin ngulu alemikinitae Ekapolon Akuj anakipeyos ana inomio, nakinae Aron ka talokookeng akolongit na etaleunere kesi ani edokakinere akimiet nakies toliworos ngimurok a Akuj.

³⁶Akwaar ngina, todungok Ekapolon Akuj Ngisirael atamar toliworos einanakinete Aron ka talokookeng nginerin ngulu jiik. Eliwor etal ngolo lo iwapete Ngisirael ngirwa daang.”

³⁷Eraakasi ngulu robo ngitalio a ngakipeyos ana inomio tonomiasi, ka ngakipeyos a ngalemet, ka ngakipeyos a akisech, ka ngakipeyos a atachanot, ka ngakipeyos a akitaleun, ta ngakipeyos a ekisil.

³⁸Abu Ekapolon Akuj todungok Musa ngitalio ngulu alomoru a Sinai alo ayei nariet, akolongit na alimokinea Musa Ngisirael atamar yaut ngakipeyos.