Read turkana Ngilawi 8 Bible Online

Ngilawi 8 - turkana bible

Ngilawi 8

¹Tolimok Ekapolon Akuj Musa tama,

²“Toriko Aron ka talokookeng nakituk a eam a Ekapolon Akuj sodi yau ngiworui a ngimurok a Akuj, ka akimiet na iwasakinio, ka emong losorokit a akipeyos a akisech, ka ngimesekin luarei, ta akikap na a ngamugati anapadok.

³Ani erumor tochunak ngitunga daang neni.”

⁴Tosubak Musa ngakiro daang loger lo adungokinitor Ekapolon Akuj. Ani kechunakin ngitunga daang kerumor,

⁵tolimok ngesi kesi tama, “Ngakiro na tokona edikino ayong asubakini kesi adungu Ekapolon Akuj atamar tosubakinae.”

⁶Toriku Musa Aron ka talokookeng sodi kilota kesi a ngakipi kitaleunotor.

⁷Kitanap ngesi Aron echat ka eworu lokooyan, sodi kitanap aruba anaabor. Kitanap ngesi akaluwat*g** a emuron sodi toenik aruba na edonyitoe niajokon naabor keng.

⁸Kitanap ngesi Aron eboli alorarum sodi kiwaak Urim ka Sumim*g** tooma ichue.

⁹Tobutok ngesi apukot nakou a Aron, sodi kiwaak egolit lowae lo alongaren a apukot kangina, toliwor ekiraun lo italeunitoe, loger losek adungunitor Ekapolon Akuj.

¹⁰Abu Musa tolem akimiet na etal kitaleunio eam a Akuj ka ngiboro luche kidokak akimiet loeam ka ngiboro daang lu ayakasi tooma eam.

¹¹Tolem akimiet epewae nakiwasakina towatak ngawatakinet ngakan-kaarei lokeno a ngakipeyos, ka ngiboro a ekeno ta ateger ka ewae lo a ngalup a ateger. Kotere eger ngolo, kitiliwo Musa eam ka ngiboro a eam lu italeunitoe.

¹²Kitaleu ngesi Aron kidokak epewae akimiet ana etal nakou a Aron.

¹³Ani erumor, toriku Musa talokookeng a Aron kitanap ngiworui, kitanap ngarubae anaaborin, ani erumor tobutok ngapukoto nakies kech, loger losek adungunitor Ekapolon Akuj.

¹⁴Sodi taramu Musa emong losorokit lo a akipeyos a akisech. Apot Aron ka talokookeng kidokokis ngakan kech nakou a emong kangolo.

¹⁵Taar Musa emong ngolo, tomietu ngaakot ngache a ekimoin keng sodi kiwasak najipeta a ekeno a ngakipeyos, kitaleunio ekeno ngolo. Sodi tobukok ngesi ngaakot nache lowae lo a ngalup a ekeno a ngakipeyos. Kotere eger ngolo, kitaleu ngesi ekeno ngolo kiteseg.

¹⁶Tolem Musa a asepae daang, ka ewae loajokon a emany, ta ngingalur luarei imorikina ka asepae kech, topee alokeno alo a ngakipeyos.

¹⁷Ani eliwor akiring a emong ka eleu, ta ngiboro a akook ka ngikujit, topee anikalapatan a adakar loger losek adungunitor Ekapolon Akuj.

¹⁸Ani erumor taramu Musa emesek lo a akipeyos ana inomio, sodi kidokokis Aron ka talokookeng ngakan kech nakou a emesek kangolo.

¹⁹Taar Musa emesek ngolo towatak ngaakot keng lowaitin luomwon a ekeno alo a ngakipeyos.

²⁰Ani etubitubio nginerin a emesek kangolo, topee Musa akou a emesek, ka nginerin keng, ta nikataronon.

²¹Ani kilotar ngiboro a akook, ka ngamuroi, ta ngakwaas anakipi kerumor, topee Musa emesek ngolo alokeno alo a ngakipeyos, erai akipeyos na inomio. Ejoikinit Ekapolon Akuj akukuny akipeyos kangina. Tosubak Musa kongina loger lo adungokinit Ekapolon Akuj.

²²Sodi toriku Musa emesek lo a ngiarei, lo italeunere ngimurok a Akuj kidokakinae akimiet nakies. Kidokokis Aron ka talokookeng ngakan kech nakou a emesek kangolo.

²³Taar Musa emesek ngolo. Tolem ngaakot ngache kiwasak lobonibonit akit ana aloteten a Aron, ka ekimoin loapolon a akan analoteten ta ekimoin loapolon a akeju ana aloteten.

²⁴Ani erumor apot talokookeng a Aron dang, kiwasak ngesi ngaakot ngache lobonibon a ngaki kech ana aloteten, ta lomoyo luapolok a ngakan kech ana aloteten, ta lomoyo luapolok a ngakejen kech ana aloteten. Sodi towatak Musa ngaakot na edongete lowaitin luomwon a ekeno a ngakipeyos.

²⁵Kipachu ngesi nikataronon alomesek, ka asonyok, ka asepae, ka ewae loajokon a emany, ka ngingalur luarei imorikina ka asepae ta akalokiding a amuro anakitalio.

²⁶Abu ngesi tolem amugati apei anakikap a ngamugati anapadok etalekinitoe Akuj, ka ngamugati nadapal apei na apeyo a akimiet, ta abisikut apei. Sodi kiwaak kidiama nikataronon ka amuro nakitalio.

²⁷Nak Musa Aron ka talokookeng, sodi tolemut kesi erai akipeyos na iwakiwakio elemikinitae Ekapolon Akuj.

²⁸Abu Musa kidiau ngamuja nguna daang anikech topee alokeno alo a ngakipeyos, aapei ka akipeyos a akiriket, eraakasi ngakipeyos a akitaleun. Ejoikinit akukuny a akipeyos kangina Ekapolon Akuj.

²⁹Sodi tolem Musa atorobu kiwakawak erai akipeyos na iwakiwakio elemikinitae Ekapolon Akuj. Ibore ngini arai ika Musa alomesek alo italeunere ngimurok a Akuj. Tosubak Musa ngakiro daang loger lo adungokinitor Ekapolon Akuj.

³⁰Tolem Musa akimiet nakiwasakina epewae ta ngaakot ngache na ayakasi lokeno a ngakipeyos, towatak Aron ka talokookeng, towatak tani loworui kech. Kotere eger ngolo, kitaleu ngesi kesi ka ngiworui kech toliworos ngika Ekapolon Akuj.

³¹Tolimok Musa Aron ka talokookeng tama, “Kitukulautu akiring ngina anakituk a eam a Akuj, sodi tanyama kaneni aapei ka amugati na eyei nakikap na ngiboro alu italeunitoe. Tosuba loger lo kadungokinitor ayong Ekapolon Akuj ebala, ‘Enyamete Aron ka talokookeng akiring ngina.’

³²Topeo akiring daang ka ngamugati daang na epiyanun.

³³Kiboikinos nakituk a eam a ngirwa a ngikan-kaarei, tanang edaunosi ngirwa lu kitaleere esi, kainyo eraakasi ngirwaa lu kitaleere esi ngikan-kaarei.

³⁴Adungu Ekapolon Akuj atamar tosubae nguna kongina torimanakinere ngasechesea kus.

³⁵Ejoikinit esi iboikinosi nakituk a eam akwaar ka apaaran, a ngirwa a ngikan-kaarei, isubete nakolong adunguni Ekapolon Akuj.”

³⁶Apot Aron ka talokookeng tosuba daang na adungunit Ekapolon Akuj kisitoru nia Musa.