Read turkana Ngilawi 9 Bible Online

Ngilawi 9 - turkana bible

Ngilawi 9

¹Ani enangi akolongit na a ngakan-kauni, kitaleun akolongit na a ngakan-kaarei kerumor, tanyarau Musa Aron ka talokookeng, ta ngikarikok a Ngisirael.

²Tolimok ngesi Aron tama, “Tolem emong losorokit erai akipeyos a akisech, tolem emesek erai akepeyos na inomio tarai daang lu emam ni ichwangakina. Tolemik Ekapolon Akuj.

³Ani erumor tolimok Ngisirael tolemut ekoroe erai akipeyos a akisech, tolemut itaok ni erai ekaru epei ka imesek ni erai ekaru epei, tarai daang lu emam ni ichwangakina, toliworos akipeyos na inomio.

⁴Nabo, tolemut emong ka emesek toliworos akipeyos a ekisil. Epeikinio Ekapolon Akuj ngibaren ngulu aapei ka akipeyos a ngalemet ana imorikinitae ka akimiet. Ejoikinit kesi esubete kongina kainyo ebuni Ekapolon Akuj nikech akolongit naga.”

⁵Yaut Ngisirael ibore daang ni adungunit Musa lowae lo alongaren a eam. Tochunakin ngitunga daang kirudun akilip Ekapolon Akuj.

⁶Tolimok Musa kesi tama, “Kidungok esi Ekapolon Akuj atamar tosuba nugu daang, sodi taanyungareta akwangis keng naakwaan kea.”

⁷ Ani erumor tolimok Musa Aron tama, “Taapia lokeno loa ngakipeyos sodi tolem akipeyos a akisech ka na inomio na elemari akisech kon ka akisech a Ngisirael kadaang. Tolem akipeyos naga tomookere ngasechesea a ngitunga kadaang loger lo adungunitor Ekapolon Akuj.”

⁸Abu Aron taapiya lokeno lo a ngakipeyos sodi taar emong losorokit lo arai akipeyos a akisech keng.

⁹Inut talokookeng ngesi ngaakot, kilumok ngesi ekimoin keng naakot nguna kiwasak najipeta a ekeno a ngakipeyos. Ani erumor, tobukok ngaakot nache lowae loa ngalup a ekeno alo a ngakipeyos a Ekapolon Akuj.

¹⁰Sodi topeo nikataronon alokeno alo a ngakipeyos, topeo tani ngingalur, ka ewae loajokon a emany, loger lo adungokinitor Ekapolon Akuj Musa.

¹¹Nakaneni topee ngesi akiring ka eleu anikalapatan a adakar.

¹²Taar ngesi ibarasit ni arai ika akipeyos keng ana inomio. Inut talokookeng ngesi ngaakot, sodi towatak lowaitin luomwon a ekeno alo a ngakipeyos.

¹³Nakis kesi ngesi akou ka nginerin luche a ibarasit, sodi topee ngesi alokeno alo a ngakipeyos.

¹⁴Ani erumor kilota ngesi ngiboro a akook ka ngamuroi ani erumor topee alokeno alo a ngakipeyos aapei ka nginerin luche a akipeyos ana inomio.

¹⁵Ani erumor, tolem ngesi akine na erai akipeyos a ngasechesea a ngitunga kadaang. Taar, sodi tolem loger losek alemunea ngesi ibarasit nia akipeyos a akisech keng a ilope.

¹⁶Toriku tani ibarasit a akipeyos ana inomio loger lo asakitere alotal.

¹⁷Tolem ngesi akipeyos a ngalemet sodi tomuk ngakiria ileleba akan, topee alokeno alo a ngakipeyos. (Arai akipeyos naga na eatakinitae nakipeyos na elemuununio akolongit daang.)

¹⁸Taar ngesi emong ngolo ka emesek erai akipeyos a ekisil kotere ngitunga. Inut talokookeng ngesi ngaakot towatak ngesi lowaitin luomwon a ekeno a ngakipeyos.

¹⁹Nikataronon a emong ka na emesek, ka asonyok a emesek, ka asepae, ka ngingalur, ta ewae loajokon a emany,

²⁰kimorik Aron ka atorobu, sodi topee alokeno alo a ngakipeyos.

²¹ Nakaneni atorobu ka ngamuroi nakitalio, kiwakawak Aron eraakasi akipeyos na iwakiwakio alongaren Ekapolon Akuj, loger lo adungokinea Ekapolon Akuj Musa.

²²Ani erumor Aron alemun ngakipeyos daang, kikea ngakan kidiama topia ngitunga, ani erumor totiyaun ani ayei ekeno lo a ngakipeyos.

²³Tolomasi Musa ka Aron loeam a Akuj. Ani epudunete kesi, topiasi ngitunga. Tatakanu akwangis naakwaan kea a Ekapolon Akuj alotunga.

²⁴ Tolem Ekapolon Akuj akim atipei tonom akipeyos na inomio, ka nginerin lu atumak ayakasi lokeno lo a ngakipeyos. Ani eanyungarete ngitunga akim ngina, tachalakis daang sodi toriediko tojuko ngireetin kech ngalup.[1]