Read turkana Yeremia 1 Bible Online

Yeremia 1 - turkana bible

Yeremia 1

¹Eraakasi ngakiro a akitab kana ngaka Yeremia alo arai lokookeng a Ilikia. Arai ngesi alesit a ngimurok a ere a Anasos anakwap a Benjamen.

²Tolimok Ekapolon Akuj Yeremia akiroit ekaru lo a ngitomon ka nguuni lo araakar Yosia lokookeng a Amon ekapolon a Yuda.

³ Kisuruor ngesi nabo na araakar Yeoyakim lokookeng a Yosia ekapolon a Yuda, ani ekisidi, kisuruor ngesi ngakisuruoret nakaalak, tanang ekaru lo a ngitomon ka epei na araakar Sedekia lokookeng a Yosia ekapolon a Yuda. Elap loa ngikan a ekaru kangolo, torikoe ngitunga a Yerusalem nakwap ache.

⁴Katolimok Ekapolon Akuj ayong akiroit tama,

⁵“Kaseuni kolong ayong iyong eringa nyesubuna anakook a itiokon. Ketaleu eringa nyidouno, katolem toliwor ekadwaran a ngibukui.”

⁶Atatachak ayong atama, “Wae Ekapolon lo irai Ekapolon Akuj, kingolik a, kakuruworit ayong ekiruor, kainyo eringa ayong adit.”

⁷Nakaneni katolimok ayong Ekapolon Akuj tama, “Nyiilim atamar eringa iyong idit. Ilosi iyong lotunga lu kalimokini ayong iyong atamar tolot, nabo ilimori iyong ngakiro daang nakadungokini ayong iyong atamar kiruor.

⁸Tochoite iemei kesi kainyo kiruki ayong ka iyong katoyuu. Ayong Ekapolon Akuj ngesi alimu nguna!”

⁹Abu Ekapolon Akuj kitorwaa akan keng, tatap akituk kang, katolimok tama, “Topupok a, ewaakini ayong ngakiro nakituk kon.

¹⁰Kainak ayong iyong akolongit naga apolou alobukui ka ngapolosio, toditu ka aukor, kinyasu ka akiloch, adukokin ka akitakin.”

¹¹Kengit ayong Ekapolon Akuj akiroit tama, “Yeremia, nyo itee iyong?” Atatachak ayong atama, “Ateni a ekitoe alo ikoni engoomo.”

¹²Katolimok Ekapolon Akuj tama, “Ingolik iyong dir kainyo etee[1] ayong asaki atamar kiyookinos ngakiro kang.”

¹³Katolimok Ekapolon Akuj ayong akiroit tama, “Nyo iche itee iyong?” Atatachak ayong atama, “Etee ayong amot ekulae alowae alo alokwap, edikino itelun laalo.”

¹⁴Katolimok ngesi ayong tama, “Ekulaunete nginyas alowae alo alokwap taanyut daang lu ibooyete anakwap kana,

¹⁵kainyo anyaraunit ayong ngibukui lua lokwap daang abala pot. Epote ngikapolok kech topolokis ngidorin a Yerusalem ka ngawasea keng. Epolokinete tani ngirerea luche a Yuda.

¹⁶Erirae ayong ngitunga kang kainyo asecha kesi. Kaisikis kesi ayong, alemikis ngakujo nache ngakipeyos. Asubakis ngakujo nasubuna kilipa.

¹⁷Tokona bocha Yeremia, tonyou. Kape tolimok kesi daang ngakiro nakadungok ayong iyong. Nyiem kesi sodi nyeketeemea ayong iyong alongaren kech.

¹⁸Akolongit naga, kesikok ayong iyong ere lo a awas anakaagongon, kori apir a asuat anakirion, kori asuat nanyang anakwap kadaang, ka alokapolok a Yuda, ka ngikapolok luuchik, ka ngimurok ta ngitunga luche.

¹⁹Ijiete iyong ka kesi, nakaneni nyikidwangete kesi iyong kainyo kirukit ayong ka iyong katoyuu. Ayong Ekapolon Akuj alimu nguna.”