Read turkana Yeremia 10 Bible Online

Yeremia 10 - turkana bible

Yeremia 10

¹Esi Ngisirael, topupokisi ngakiro nakilimokinit esi Ekapolon Akuj!

²Ebala Ekapolon Akuj kona, “Nyiiwap elote a ngibukui aluche, kori nyikiteriangakis ngakiro naparing na ianyungarete anadis, nguna itubuleenete ngibukui luche.

³Kainyo eraakasi ngitalio a ngitunga, eyapunete kesi akitoe anamoni, kichie ekechian a aep keng.

⁴Kitisirio a ngakwangae ka egolit, kirumeikinae a ngisumarea, nyiiloilookinosi.

⁵Ikote ngakujo nasubuna nguna ngiborei lusuriet ngikieny anamanat a ngamunye. Nyiruorikinete. Iwokitae kesi jiik kainyo nyerotokinete. Nyiikera ngakujo nasubuna nguna. Emam naaronok kisubakineta esi, kori emam ibore ajokon kisubakineta.”

⁶Ekapolon Akuj, ngae ikwaanatar iyong? Ipolot iyong, nabo eyenikinitae ationis a ekiro kon.

⁷ Ngae nyikikeri iyong, iyong ekapolon a ngibukui? Ejoikina iyong kikerio. Alokoosok kadaang alobukui, ka ngikapolok kech daang, emam tani epei lo ikwaan ka iyong.

⁸Ebangaaka daang iwaarit. Nyo kitatamete ngoni ngakujo nakito?

⁹Ayaunio ngakwangae alo Sipania, yaunae egolit alo Upas. Erai etich ngolo daang eka ngikunonoi. Itanapitae ngakujo nguna ngiworui lumugeyek ka lupusiek-arengak, lu adonyete ngikadonyok lukunonoi.

¹⁰Nakaneni iyong Ekapolon Akuj, irai Akuj na iteni. Irai iyong Akuj na eyari, ekapolon lokajik. Na ingoea iyong, tamaranik akwap. Nyenaikinete ngibukui anyunyura kon.

¹¹Ilimokinete esi kesi kona, “Ngakujo nakolong nyesubuna adis ka akwap, inyasunio. Engopiarete anadis ka kwap adis.”

¹²Asubi Ekapolon Akuj akwap a agogongu keng. Tosubak akwap a aosou keng, sodi topetak adis a achwaanu keng.

¹³Na edungunio ngesi akiroit, torukis ngakipi na eyakasi kidiama adis.[7] Kitonyou eloch anasalunet a akwap. Kisitoru akimilea nakiru, talakak ekuwam anisek egolokino.

¹⁴Ebangaana itwaan daang iwaarit, irumito ngileech itwaan ni esubi ngakujo nasubuna, kainyo eraakasi ngakujo nguna ngaka alioko nabo nyeyarete.

¹⁵Eraakasi kesi ngapasiek, ejoikinit ekianare. Inyasunio na ebunio Ekapolon Akuj akirirare kesi.

¹⁶Kainyo nyikwaan Akuj a Yakobo, ka ngakujo nasubuna nguna, ngesi kolong asubuni ibore daang. Nabo aseu ngesi Isirael aliwor ebukut keng a ilope. Akuj Namerikanyer ngesi ekiro keng.

¹⁷Ngitunga a Yerusalem, kiriamitae esi! Tochunakisi ngiboro kus.

¹⁸Ebala Ekapolon Akuj kona, “Kingolikisi a, kemasari ayong esi anakwap kana nipei bore en, ketaanyu esi ngichan lu kibelarete.”

¹⁹Kikalout ngitunga a Yerusalem tamasi, “Oitiakoi kare! Kiwan cha sua kona? Abe nyengalekinete ngajemei kosi! Kitamit sek atamar eraakasi ngichan lugu lu kipedori sua atitinyikin.

²⁰Enyasun ngieman kosi, angedasi ngaunoi kosi daang. Alot sua ngide kosi, kiisikis sua. Emam lu idongito akiguror ngieman kosi nabo, kori emam lu imukete a ngawarui.”

²¹Atatachu ayong atama, “Abangaaketa ngikeyokok. Awout alosit nia Ekapolon Akuj kiten kesi. Ibore ngini ngesi akuruworea kesi akisikokin. Ibore ngini ngesi apetarotor ngamesekin kech.

²²Topupokisi! Edolunit akiroit! Eruunit echale loationon, ebunit alobukut alo alokwap. Itiliwori ngirerea a Yuda alaireng, toliworos ni elomito ngikolowoi.”

²³Ekapolon Akuj, ayeni ayong atamar emam itwaan epolokinit eboyor keng, emam itwaan eriki elote keng a ilope.

²⁴Torikinoe ayong Ekapolon Akuj, torikinoe a erot alo eriyan, kori nyiikok neni ingoit, nyikimunyarea.

²⁵Tobukok anyunyura kon lobukui lu nyikikerito iyong, ka ngitunga lu nyikinyarito iyong. Kainyo aara kesi ngalesea a Yakobo. Aara amunyasi pil, enyasun akwap kech.