Read turkana Yeremia 11 Bible Online

Yeremia 11 - turkana bible

Yeremia 11

¹Katolimok Ekapolon Akuj ayong Yeremia akiroit ebala,

²“Topupok ngikitetio a achamunet kana, tolot tolimok ngitunga a Yuda ka lu elomito Yerusalem.

³Ilimokini iyong kesi kona: Ilamit Akuj itwaan ni nyiwapit ngakiro a achamunet kana.

⁴Achamunet naga ngesi nakolong echikakini ayong taapaakus na epudunio kesi alo Misiri, akwap na ekoni anikech akim nakariran. Atolimok atamar kiwapa ngakiro kang ka akisub daang na adungokini ayong. Atama ayong kesi ani kikokis neni, eliworosi ngitunga kang, atoliwor ayong Akuj kech.

⁵Ani kiwap kesi ngitalio ngulu, eyookini ayong akichikakinet nakolong ekongokini ayong taapaakech abala ainakini akwap na ileleba ngakile ka akimiet a ao, akwap na tokona erai akech.” Atatachu ayong atama, “Kikokis kare neni, Ekapolon Akuj.”

⁶Abu Ekapolon Akuj katolimok ayong tama, “Tolimo ngakiro nguna daang alorerea a Yuda ka ngirotin a Yerusalem. Tolimok ngitunga atamar kiirasi ngakiro a achamunet kana sodi kiwapa.

⁷Kainyo echikichiki kolong ayong taapaakech lokojokon na epudunio anakwap a Misiri, nabo eringa ayong kechikichiki esi jiik tanang akolongit na tokona naga abala kiwapa akiroit kang.

⁸Nakaneni towout kesi akiwap ngakiro kang ka adetar ngaki kech. Akidwang akikokin neni, abu ipei kech daang kichananer, toroner. Sodi erira ayong kesi a ngakiro a achamunet ana kolong abala ayong kesi kiwapa kana, nakaneni towout kesi akiwap.”

⁹Abu nabo Ekapolon Akuj katolimok ayong tama, “Etukito ngitunga a Yuda ka lu elomito Yerusalem akinger ayong.

¹⁰Abongosi kesi nasechesea kata apaakech alu awounete akiwap ngakiro kang. Elipa kesi ngakujo ngache asuba etich kech. Echwangakis ngitunga a Isirael ka lua Yuda achamunet nakolong kichamakin ayong kata apaakech.

¹¹Tokona bocha, echikichiki ayong Ekapolon Akuj kesi atamar amunyari ayong kesi, emam ni ebuchar. Ani kekaloikinete kesi ayong, nyeirari ayong kesi.

¹²Eloose ngitunga a Yuda ka lua Yerusalem nakujo na ipeyonokinete kesi ngakipeyos, kigoronokis esakete akingarakino. Nakaneni nyingarakinete ngakujo nguna kesi na eanyuneta ngichan.

¹³Iyong Yuda, elalak ngakujo kon, loger lo elalaketa ngirerea kon. Ngikenoi lu aduko ngitunga a Yerusalem ipeyonokinioto akuj nakikadakini be Baal, elalak noi loger lo elalaketa ngirotin alo Yerusalem.

¹⁴Yeremia, nyiilipanak ngitunga lugu, nyikigoronok ayong nabo nyikimaima kotere kesi, kainyo tani kelipa kesi ayong na eanyunitotor ngichan, nyapupokini ayong ngakiro kech.”

¹⁵Ebala Ekapolon Akuj kona, “Nyo elometa ngitunga lu amina ayong kai kang na esechitotor? Ebalasi kesi kori kiratakini ngakiro naaronok a ngikongen[8] ka akipeyore ngakipeyos a? Ekoe, italakarete nguna kesi a?

¹⁶Abala kolong ayong eraakasi kesi ekitoe a akimiet lo elibit ekilikili, lo erait ageor naajokon. Nakaneni tokona, agirokini ayong loger a agiro, enom ngakui keng ka akibil ngaten keng.

¹⁷“Ayong Akuj Namerikanyer, ngesi etakini Isirael ka Yuda. Nakaneni alimunit tokona atamar eanyunete kesi ngakiro naaronok ani asecheta. Ketongoa kesi ayong ani epeyonokinioto Baal ngakipeyos.”

¹⁸Kedodik ayong Ekapolon Akuj, atoyen. Ee robo, kedodik Ekapolon Akuj ayong naaronok na atukito kesi.

¹⁹Ekoni ayong imesek nikapatanan ni erikitoe akingol. Peayeni atamar ayong katukuore ebeyo, “Enyasutu ekitoe ka ageor keng, atotubosi ngesi anakwap ana eyakasi lu eyarete, tojongoi alimit ekiro keng nabo jik.”

²⁰Abu ayong elip atama, “Ee Akuj Namerikanyer, iyong na itubi ngakiro a ateneanut, na itemit ngitai ka ngitamen a ngitunga. Eraakasi ngakiro kang daang ngaka akiding kon. Kimiekinae kengolik iyong itachakini naaronok asubete ngitunga lugu.”

²¹Alimu robo Ekapolon Akuj kona kotere ngitunga a Anasos lu asakete akiar ayong ebalasi, “Nyiidwar ilimit Ekapolon Akuj, ani kemam kiari sua iyong.”

²²Ebala Akuj Namerikanyer kona, “Kingolik a, erirae ayong ngitunga a Anasos. Eario ngisorok kech a akwara. Ngide kech lusapa ka lupesur, eriyorosi erogo.

²³Arekinit ayong ngirwa lu ayaunea ngakiro naaronok lotunga a Anasos, ani enangi ngirwa ngulu, emam tani ipei kech ni epuun.”