Read turkana Yeremia 12 Bible Online

Yeremia 12 - turkana bible

Yeremia 12

¹Ee Ekapolon Akuj, ani kesubura ayong iyong a ngakiro a ngadi, ileereuni atamar itenoono iyong. Tani kikoni neni, ayakasi ayong na asaki akingit iyong. Nyo ejokia eboyor aluaronok? Nyo itabarit lukamodeanak?

²Itakini iyong kesi toruput ngaten, topoloto kesi tokoniut ageor. Anakituk, eyakasi diyete kon. Ani alotai kech, eloka anikon.

³Kiyeni iyong ayong Ekapolon Akuj. Kitee iyong ayong, iyeni eger lo kaminar ayong iyong. Kuurukukuyo luaronok lugu loger a ngamesekin ana erikitoe akingol. Kitegelia kesi tanang esaa lo engolere.

⁴Eoni akwap yok tanang wori? Etoakete nginyia daang tanang wori? Etoakete ngitieng ka ngikieny kotere aronis a ngitunga. Ngitunga lu ebalasi, “Emudukana Akuj, nyitee elote yok.”[9]

⁵Tolim Ekapolon Akuj tama, “Yeremia, ani kiburunit iyong ani ibolotor ka ngitunga, ikokini iyong ibolosi ka ngangolei ai? Ani kidakar iyong anikalapatan, ikokini anamoni a Yorudan ai?

⁶Tani talokaatokon, lu eraakasi ngitunga a awi ka apakon, kimoda iyong. Kichanete kesi dang iyong. Nyiinup ngakiro kech, tani kebobok ngakiro kisuruorete iyong.”

⁷Ebala Ekapolon Akuj kona, “Achaka ayong Isirael. Aisik ayong ebukut kang loseuna. Epoto ayong ngitunga kang lu amina, ajalak ngimoe kech.

⁸Ngitunga kang luseuna, kachalanakis ayong loger a engatuny alo eyei namoni. Aremokino ayong kesi kotere ngakiro nguna.

⁹Irimirimi ebu longoor ngitunga kang a? Irikaunito ngataruk alowaitin kadaang a? Kape, tochunak ngitieng a moding daang, pot kirajakinos.

¹⁰Enyasunete ngikeyokok lukaalak amana kang a ngimusabib. Epudata kesi ngamanat kang. Etiliwosi akwap kang naajokon alapatu.

¹¹Etiliwosi ariet. Etee ayong erai alaireng. Edong akwap daang erai ariet, emam itwaan eringa emisikinit.

¹²Ngaitae a ngimukur daang anariet, adolut ngitunga akirem. Ayau ayong ejie lo emunyari akwap, napei alowae a epei tanang loche, emam itwaan iboikin akaalimon.

¹³Etakinete ngitunga kang ngakanoi tolema edoan. Asubete etich loationon, nakaneni emam ibore apot taanyut. Kotere ni angoitor ayong anyunyurar, emam ngalemet eanyunete kesi.”

¹⁴Ebala Ekapolon Akuj kona, “Eyei akiroit asaki alimun ani eyakasi ngikidunyet a Isirael lu enyasut akwap nakolong ainakini ayong Ngisirael lu eraakasi ngitunga kang. Arutuni ayong ngitunga luaronok ngulu anakwap kech, atoyuu Yuda alokiding kech.

¹⁵Ani ketiliwo ayong kesi ngirikon kerumor, edodikini ayong kesi ngisien kang. Abuari ayong ebukut daang nakwap keng, nikolong sek alomito kesi.

¹⁶Ani kitatamasi kesi eboyor a ngitunga kang a ngitai kech kadaang, ani erumor kikongo a ekiro kang tamasi, ‘Kona eyarea Ekapolon Akuj,’ loger lokolong etatameta kesi ngitunga kang akikong a ekiro a Baal, isikokinosi kesi daang toliworos ngitunga kang.

¹⁷Nakaneni ebukut cha daang lo nyiwapi ngakiro kang, adituni ayong enyasu. Ayong Ekapolon Akuj alimu nguna.”