Read turkana Yeremia 13 Bible Online

Yeremia 13 - turkana bible

Yeremia 13

¹Katolimok ayong Ekapolon Akuj tama, “Kape togielu edengo, toinik naabor, wara nyiiwaak nakipi.”

²Abu ayong atogielu edengo loger lo kalimokinitor Ekapolon Akuj sodi atanap anaabor.

³Abu Ekapolon Akuj kesuruorik ayong na ngaarei tama,

⁴“Tolema edengo lo igielu iyong, lo tokona inapit iyong anaabor, tolot nangolol a Eupurate, sodi kidaa anachiet a ataaba.”

⁵Atolot ayong edaa edengo ngolo alodiyete Eupurate, loger lo kadungokinitor Ekapolon Akuj.

⁶Ani adaunet a ngirwa alukaalak, katolimok Ekapolon Akuj ayong tama, “Kape nangolol a Eupurate, tolem edengo lokolong abala ayong iyong kidaa.”

⁷Atonyou ayong atolot nangolol a Eupurate, atoboka. Atolem edengo anisek edaikini ayong. Ani alemuni, atoriangakin engolikini atamar kinyasun keliwor pas.

⁸Abu Ekapolon Akuj katolimok ayong akiroit nabo tama,

⁹“Eger ngolo enyasunea ayong ekinis a Yuda ka ekinis loationon a Yerusalem.

¹⁰Awout ngitunga luaronok lugu akiwap ngakiro kang. Akidwang akikokin neni, echanaketa daang aroketa. Elipa kesi ngakujo nache, asuba etich kech. Ikokinete kesi edengo lo enyasun logo.

¹¹Eger lo irumeikinor edengo naabor, asaki ayong ngitunga daang a Isirael ka Yuda kerumeikinosi ayong, toliworotor ngitunga kang, lu itaanyunete ekiro kang ekipur ka arima. Nakaneni apot kesi towout akiirar ngakiro kang. Ebala Ekapolon Akuj neni.”

¹²Ekapolon Akuj na erai Akuj a Isirael, kalimokini ayong kona, “Yeremia, tolimok Ngisirael atamar ejoikinit ngamoti daang ilelebikinio emuna. Kingisete kesi iyong tamasi, ‘Esibit iyong nyikiyeni sua atamar ejoikinit ngamoti ilelebio emuna a?’

¹³Sodi tolimok iyong kesi tama, ‘Ebala Ekapolon Akuj edikino elelebikini ngitunga a akwap kana emuna lo eupi kiraka. Irakari ngikapolok lu eraakasi ngalesea a Daudi, ka ngimurok, ka ngikadwarak ta ngitunga a Yerusalem daang.

¹⁴Ani erumor atobwanganak ayong kesi ni eyakasi luche loger a ngamoti, lumojong ka lusorok aapei. Nyekesieniyete ayong kori nyariaka amunyar kesi.’ ”

¹⁵Esi Ngisirael todetasi ngaki topupokis! Tojongoto ekinis, kainyo eruorik Ekapolon Akuj.

¹⁶Kipuruutu Ekapolon Akuj, na erai Akuj kus, eringa ngesi nyeyauna aribu, eringa amoru nyenanga ngakejen kus alomoru esaa lo eribokinea. Ani eringa iyong idarit akicha, kibele ngesi akicha toliwor ekamutot ani erumor kitiribok chuch.

¹⁷Nakaneni ani kiwout esi akiirar, ekalouni ayong ngakiyo anikang bon, kotere ekinis kus. Ekalouni ayong lokojokon, talakakis ngakonyen kang ngakiyo kainyo ngitunga a Ekapolon Akuj erumiar loger a ngamesekin arata ngirikon.

¹⁸Katolimok ayong Ekapolon Akuj tama, “Tolimok ekapolon ka itiokeng kona: Totiyaunos alokicholongo kus alu apolou, kainyo ngikiraunea kus luajokak, achakunosi anakies kus.”

¹⁹Eriam ngimoe ngirerea a Negeb. Emam itwaan elomari. Erumiar ngitunga a Yuda daang arik, arikor kesi daang toliworos ngirikon.

²⁰“Yerusalem, kingolia kare! Eponito ngimoe kon alokwap! Nyaali esipanit lokolong kichikakinio iyong? Nyaali esipanit lokolong inisar iyong?

²¹Itamari iyong ai erai kidwang iyong ngitunga lukolong ielokinosi ka iyong tarata ngipaalon, ani erumor kitopolokis? Nyiriabakin cha iyong dir loger a aberu ana eriaba a?

²²Ani kilimu iyong alotau tama, ‘Ekoe, nyo esubatar nugu daang anikang?’ Erai ni erokiata ngasechesea kon noi, ngesi ewolorere ngiworui kon toboliare akwaan kon.

²³Epedori itwaan akiloch amuny a akwaan keng a? Epedori eris akiloch ngameriyek keng a? Ani kepedori akiloch, ikwa ipedorete esi dang, lu isubete naaronok, akisub naajokak.

²⁴Kealari ayong esi loger a nginyia alu ekutari ekuwam lo a ariet.

²⁵Ngakiro nguna ianyunete esi. Nguna kesi aseu ayong Ekapolon Akuj kotere esi, kainyo kimuriakis esi ngakiro kang, kigienokinos alioko.

²⁶Ewolori ayong ngiworui kus tanang nakies, kileereunioto ngileech kus.

²⁷Engolik ayong ngakiro nakikadakinete isubete esi. Engolik emalaanu lo iwapitotor esi ngakujo nagelayek, alokidiama ngimukur ka ngamanat. Loger a ekile alo iwapit aberu a itwaan, kori loger a esikiria alo esupit asikiria. Oitiakoi kare ngitunga a Yerusalem! Abe etioko nginyas ianyunete esi! Ani kolongit ikiunotor esi tosegeta?”