Read turkana Yeremia 14 Bible Online

Yeremia 14 - turkana bible

Yeremia 14

¹Erai naga akiroit na alimokini Ekapolon Akuj Yeremia kotere akamu. Tolim tama,

²“Igoro Yuda esutonokini. Atoniasi ngirerea keng. Eperete ngitunga keng analup ialolongete. Kigoro Yerusalem esaki kengarakin.

³Emearete lukajakaanak ngikasubak etich kech esakete tookut ngakipi. Toloto ngikasubak etich nakare, nakaneni tongopikis ngakipi. Tobongut nyeoko ngiboro. Iloi kesi kibiler, tarapa ngireetin kech irumito ngileech.

⁴Ani kona emamakar akiru, eoni akwap deu. Ialolongete ngiketak, tarapa ngireetin kech.

⁵Euri agete anamoni kimiek itaok kaneni kainyo emam nginyia.

⁶Ewaasi ngisikiria a moding anaitae a ngimukur analapat, iangasi loger a ngikolowoi. Aribonoki ngakonyen kech, ani angopikinea akimuj.

⁷“Kegoronokinete ayong ngitunga kang ebalasi, ‘Tani kilimorito sua ngasechesea kosi, kingarakinae kare sua Ekapolon Akuj, sodi kipuruunere iyong. Kirea sua anikon nakaalak. Kisechak sua iyong.

⁸Iyong na irai ngesi kigieno Isirael. Iyong kiyuuni sua ngirwa lua ngichan. Nyo ikonea iyong itwaan nigela anakwap kosi? Loger a ekaloton alo eperi apei bon!

⁹Nyo ikonea iyong itwaan ni kibilerit? Nyo ikonea iyong asiger naationon na nyepedori ayuun itwaan niche? Tarai bo Ekapolon Akuj, kirukit sua ka iyong. Kirai sua daang ngitunga kon. Nyikichaka sua.’ ”

¹⁰Ebala Ekapolon Akuj kona kotere ngitunga keng, “Eminasi kesi awowoot, nyiratakinete kesi ngakejen kech. Kotere ngakiro nguna, anger Ekapolon Akuj kesi. Itamuni tokona ngesi aronis kech, kirira kesi kotere ngasechesea kech.”

¹¹Katolimok ayong Ekapolon Akuj tama, “Nyikilip ayong isaki atamar engarak ngitunga lugu.

¹²Tani keron kesi, nyeirari ayong akigoro kech. Tani kalemanakis ayong ngakipeyos na inomio ka na ngalemet, nyachamuni ayong. Pearai amunyari ayong kesi a akwara, ka akoro ta ngidekesinei luaronok.”

¹³Abu ayong atama, “Wae, Ekapolon lo irai Ekapolon Akuj, iyeni iyong atamar elimonokinete ngikadwarak ngitunga atamar emam ejie ka akoro epete nakwap, kainyo ichikak iyong atamar ekisil bon emini nakwap kosi.”

¹⁴Katatachak Ekapolon Akuj ayong tama, “Isudete ngikadwarak ngakiro elimito ekiro kang. Nyemeara ayong kesi, emam tani ngakiro adungok, kori nyisuruoro ayong kesi. Kidwaranakinete kesi esi ngakisingolikinet na alioko ka ngakiro napasiek na irokete kesi ngikulepek.

¹⁵Kotere ngakiro nguna, alimu ayong Ekapolon Akuj nugu kotere ngikadwarak lu edwarete elimito ekiro kang ngulu, tarai nyemeara ayong kesi. Abe ebalasi kesi nyepete ejie ka akoro nakwap naga. Amunyakini ayong ngikadwarak ngulu lojie ka akoro.

¹⁶Ani ngitunga lu esuruorio ngakiro nguna, eario loger lopei ngolo. Echakakinio ngawat kech lorotin a Yerusalem, tongop itwaan enuki. Esubakinosi ngakiro nguna ani eyakasi kesi daang aapei ka ngaberu kech, ka talokookech, ka tanakookech, kainyo abukokini ayong kesi aronis kech a ngikulepek.”

¹⁷Katodungok ayong Ekapolon Akuj atamar atolimok ngitunga kona, “Kimiekisi ngakonyen kang talakakis ngakiyo apaaran juui ka akwaar kiiya. Kimiek ngakiyo nguna nyeetubos, kainyo ewanan ngitunga kang niaronon noi, idichakinitae towanae niaronon noi.

¹⁸Ani kalot ayong namanat, aanyungari ngawat alu aario a akwara. Ani kaloma lore, aanyungari lu aari akoro. Ngikadwarak ka ngimurok a Akuj, eloose esubete etich kech, nakaneni nyeyenete ibore ni esubete.”[10]

¹⁹Ekapolon Akuj, inger iyong Yuda jik a? Iremokin iyong ngitunga a Sion a? Nyo kiwanea iyong sua niaronon noi kona? Tongop tani ngidekesinei kosi kona engalekinete? Kibala sua kori kianyuni ekisil, nakaneni emam ibore ajokon kianyu. Kigieno atamar engalekinete ngidekesinei kosi, nakaneni ebuloi bon kipot ataanyutu.

²⁰Ekapolon Akuj, kilimo sua aronis kosi, ka ngasechesea kata apaakosi dang, kainyo kisechakinit sua iyong.

²¹Nyikichaka kare sua, sodi kipuruunere iyong. Wara nyiicham ngileech epete Yerusalem, ni ipuruunitere apolou kon. Kitamu achamunet nakolong kichamakin ngoni, nyiichwangak achamunet ngina.

²²Tokona mono a, eyei tani apei anakujo anasubuna a ngibukui, na epedori ayaun akiru a? Epedori adis alakakin ngakipi kilimilimak a? Mam jik! Erai iyong Ekapolon Akuj, Akuj kosi, ngesi kigieno sua, kainyo iyong isubi nguna daang.