Read turkana Yeremia 15 Bible Online

Yeremia 15 - turkana bible

Yeremia 15

¹Ani erumor katolimok Ekapolon Akuj ayong tama, “Arai tani towaas Musa ka Samuel alongaren kang kemaimayete ayong, pekarimak ayong ngitunga lugu. Kitwarak kesi alongaren kang. Kimiek toloto!

² Ani kingita kesi iyong ebalasi, ‘Aliwae kilosi sua?’ Itachakini iyong kesi atamar abala ayong Ekapolon Akuj kona, ‘Ngulu ilamakinitae edeke loaronon, emunyakinosi lodeke. Ngulu ilamakinitae akwara, emunyakinosi nakwara. Ngulu ilamakinitae akoro, emunyakinosi nakoro. Ngulu ilamakinitae narikonot, erikio, toliworos ngikedalak.’

³“Atiaku ayong Ekapolon Akuj atamar ainuni kesi ngakiro ngoomwon na emunyarete kesi. Eario kesi alojie, enyilinyilaarete ngingokwo ngawat kech, enyamete ngataruk kesi, tomunyasi ngibuin nipiya.

⁴Etiliwori ayong kesi ibore ni itubuli ngapolosio daang anakwap, kotere ngakiro nakolong asubi ekapolon Manase lokookeng a Esekia alo Yerusalem.”

⁵ Ebala Ekapolon Akuj kona, “Etige Yerusalem, isieni iyong ngae? Ngae ikalouni kotere iyong? Ngae ereeun kingit iyong ngakiro a eboyor kon?

⁶Kingero esi ayong, ibongete jiik akamaluwot. Kotere ngakiro nguna, abu ayong katomunya esi. Kaburu ayong arimanakin esi.

⁷Alore kadaang anakwap, kapiesi ayong esi loger a ngatunyeny. Aar ayong ngide kus, Amunya ayong ngitunga kang. Iwounete esi areeun alorotin kus aluaronok.

⁸Etalala ayong ngapuseru kus edwanga tani asinyen na ekwaas a anam. Aari ayong ngide kus lusorok alokileenu kech lotingilan, etaanyu taitiokech ngichan. Atipei, ayau ayong nikech ariaba ka ebuloi.

⁹Erakar aberu na aario ngide keng lusapa ngikan-kaarei. Eringa iroga. Asubu anikeng adooyo akolong eringa apaaran. Eruma ngesi ngileech ka etimoi. Ani lu eringa eyarete, emiekinea akwara a ngimoe kech. Ayong Ekapolon Akuj alimu nguna.”

¹⁰Oitiakoi kare! Aluchan lu katingito ayong lugu? Nyo kolong kedounio itiokang ayong? Kingolopa ayong ka apega ka itwaan daang anakwap. Emam itwaan earit ngaropiyae kang, tamam ngaropiyae a itwaan na aarit ayong, tarai kechieni itwaan daang ayong.

¹¹Kimiek kikokis neni Ekapolon Akuj, erai pekasubit etich kon niajokon, erai pekegoronokinit iyong kotere ngichan a ngitunga kang. (

¹²Emam itwaan ebili asuat nakirion. Tarai cha noi asuat nakirion na eyaunit alokwap imorikinitae ka nanyang.)

¹³Katolimok ayong Ekapolon Akuj tama, “Ameuni ayong ngimoe toremo ngibaren ka ebari loche a ngitunga kang, kirirae ngitunga kang kotere ngasechesea na asubete kesi awadaang anakwap.

¹⁴Emiekini ayong kesi tosuba etich a ngimoe kech anakwap ana nyeyenete kesi, kainyo arirau angoit kang loger a akim, nabo enoki jik.”

¹⁵Abu ayong atolim atama, “Ee Ekapolon Akuj, iyeni iyong. Kitamunae kare ayong, kingarak. Tatachak ngakiro alu kaboliatar ayong. Ititiny iyong, nyikimiek kare adaun. Toyen atamar erai iyong keyenyere ayong.

¹⁶Kisuruori iyong ayong, atopupok akiroit daang. Katojoikis ayong ngakiro nguna, tominak etau kang. Arai ayong ikon, ee robo, Ekapolon Akuj, Namerikanyer.

¹⁷Nyiruko ayong ka ngitunga lu amerasi, kori nyelakara ayong kesi aapei. Ebooyi ayong alopei ani keratakinea akan kon. Kainyo ibu iyong kitongo ayong elelebun.

¹⁸Nyo peedaunor apipilu kang? Nyo peengalekinio ajeme kang, ekuruworitor ekitoe lo itedekere? Isaki iyong akingalare ayong loger a ingolol ani etuboonosi ngakipi jiik a?”

¹⁹Abu Ekapolon Akuj tatachu tama, “Ani kibongu iyong nikang, kachamuni ayong iyong, toliwor iyong ekasuban etich kang nabo. Ani kidepa iyong ngakiro napasiek, toliwor iruoro ngakiro natenoyek, iliwor iyong ekadwaran kang nabo. Ereeunosi ngitunga nikon, meere iyong ireeun nikech.

²⁰Alongaren ngitunga ngulu, ketiliwori ayong iyong awas a asuat ananyang na itirokina. Ijikinosi iyong ka kesi, nakaneni nyikidwangete kesi iyong, kainyo kirukit ayong ka iyong keyok ka ayuun iyong.

²¹Kayuuni ayong iyong anakan a ngitunga aluaronok, katalachu anakan a ngirukooi. Ayong Ekapolon Akuj alimu nguna.”