Read turkana Yeremia 16 Bible Online

Yeremia 16 - turkana bible

Yeremia 16

¹Katolimok Ekapolon Akuj ayong akiroit nabo tama,

²“Nyiuta kori nyianyu ngide kane.

³Kalimokini ayong iyong ngakiro na esubakinosi alode alu idounio kane ka ngikauriak kech.

⁴Earete kesi daang ngidekesinei luaronok, emam itwaan igoro tosutonok kotere kesi, nabo emam itwaan enuki kesi. Etukokinosi ngawat kech nalup loger a ngasike. Emunyakinio kesi nakwara ka akoro, tanyama ngikieny ka ngibuin ngawat kech.

⁵“Nyiiloma kai na igorore ekatoan, nyiigor kori nyiisutonok, kainyo alema ayong ekisil kang ka amina kang na nyedaun ta ngisien kang alotunga kalu.

⁶Etoakete ngitunga daang luuchik ka luapolok anakwap kana, nakaneni emam itwaan enuki kesi kori igoror tosutonok. Emam ni edungudungo kori ni eluri idodiunit atamar egoro.

⁷Emam itwaan imujete kori emaase ka itwaan ni etoanit itwaan keng kisililingea. Emam itwaan ni idodiuni ngisien tani kerai itiokeng kori apakeng a itwaan kangini etoanit.

⁸“Nyiiloma kai na enyameta ngitunga akimuj nakaalan. Nyiiboikin akimuj kori tamata ka kesi aapei.

⁹ Ayong Akuj Namerikanyer, na arai Akuj a Isirael alimu kona, ‘Esililingi ayong anakwap kana elale ka akimaritetere ta ekare a akuuta. Asubakini ayong nguna daang eringa esi iyarete.’

¹⁰“Na ilimokinea iyong kesi nguna daang, kingisete kesi iyong ebalasi, ‘Nyo atiakunea Ekapolon Akuj aboliar sua niaronon kona? Nyo kichwangak sua? Nyo kisechak sua Ekapolon Akuj, na erai Akuj kosi?’

¹¹Itachakini iyong kesi atamar ebala Ekapolon Akuj kona, ‘Kemiekinete kolong taapaakus ayong, kiwapakis ngakujo ngache, kilipa ka akisub etich kech. Kemiekinete kesi ayong, towout akiwap ngitalio kang.

¹²Isuba esi naaronok noi akidwang taapaakus, kainyo ichanana ipei kus daang, torono. Nyisakete esi akiirar ngakiro kang.

¹³Kotere ngakiro nguna, ketwarakini ayong esi anakwap kana, kelomak nakwap nakolong nyeanyuna esi ka taapaakus a ache. Isubete esi ngitichisio a ngakujo anache kaina akwaar ka apaaran. Emam ngisien ianyunete esi anikang.’ ”

¹⁴Ebala Ekapolon Akuj kona, “Enangi akolongit na nyikongioto ngitunga ebalasi, ‘Ekong tani Ekapolon Akuj na eyari, nakolong epuduni Ngisirael anakwap a Misiri.’

¹⁵Eliworosi ikongete ebalasi, ‘Ekong tani Ekapolon Akuj nakolong epuduni Ngisirael anakwap ana eyei kwap ka ngakwapea daang nakolong apetarit ngesi kesi.’ Abuari ayong kesi nakwap kech a ngikulepek, nakwap nakolong ainakini ayong taapaakech.”

¹⁶Ebala Ekapolon Akuj kona, “Kingolik, anyarauni ayong ngikechiemak lukaalak pot kirumut ngitunga lugu. Ani erumor atanyarau ngikerikak lukaalak kirikata kesi alomoru kadaang ka emukura daang ta ngakope.

¹⁷Kainyo etee ayong ngirotin kech daang. Emam ibore erapap anikang. Emam akisech erapap anakonyen kang.

¹⁸Etachete kesi ngasechesea kech ngatachet ngaarei, kainyo enyasut kesi akwap kang a ngakujo anasubuna ana eperete loger a ngikatoak. Nabo eleleba kesi ngakiro kech nakikadakinete nakwap kang.”

¹⁹Ee Ekapolon Akuj, irai iyong ngikilinga kang ka awas kang nakaagongon, nikon amotun ayong esaa daang lo aanyunea ngichan. Nikon epote ngibukui daang anasalunet a akwap, “Amam kolong taapaakosi ibore apot kiruma, mati ngakujo na alioko. Ngiborei lupasiek lu emam ibore kitaanyunete.

²⁰Epedori itwaan asubakin ngakujo keng a ilope a? Mam, ani kesubaki, nyeliworosi ngakujo dir.”

²¹Ebala Ekapolon Akuj kona, “Kotere nguna, edodiun ayong anikech eleere. Ee robo, tokona jik, edodiuni ayong apolou ka agogongu kang. Toyena kesi atamar arai ayong Ekapolon Akuj.”