Read turkana Yeremia 17 Bible Online

Yeremia 17 - turkana bible

Yeremia 17

¹Ebala Ekapolon Akuj kona, “Ngitunga a Yuda, igiritae akisech kus lotai kus ka lowaitin a ngikenoi a ngakipeyos. Nyikisar loger a ngagiran ana ichiekinitae namoru a ekalam alosuat alo erai niita alumas.

²Ilipito ngitunga kus alokenoi a ngakipeyos a akuj anabe Achera. Itoweikinitae Achera ngakisikwaanet nguna alokitoe kadaang alokaliban kilipere Achera, ka ngaitae a ngimukur

³ta kidiama ngimoru lu eyakasi naroatin. Ebari kus a ngibaren ka ebari loche, etangatari ayong ngimoe kus kotere ngasechesea daang na isubete esi[11] awadaang a akwap.

⁴Iisikinete esi akwap nakolong kainakini ayong esi, kemiek ayong esi tosuba etich a ngimoe kus anakwap ana nyiyenete esi, kainyo anoku angoit kang loger a akim, nabo enoki jik.”

⁵Ebala Ekapolon Akuj kona, “Ilamam itwaan ni erea anikang, kigienokin itwaan niche, kitiliwo aupwal keng.

⁶Ikoni ngesi ekitoe lo eyei nariet, emam naajokak eanyuni pei dang. Iboikin nikoonon anariet, alodoot alo emam itwaan elomit.

⁷“Epiaritae itwaan ni igienokin Ekapolon Akuj, itwaan ni erai Ekapolon Akuj bon igieno.

⁸ Ikoni ngesi ekitoe lo erupunit ani a ngakipi, lo iteliarit ngaten na alokwap nakipi. Nyeemi ngesi na eriraunea akwap, kainyo idongete ngakui keng epuseaka. Emam ibore ichani ngesi nakamu, erubakini ekoniununi ageor.

⁹“Ingalana etau noi akidwang ibore daang, nabo emodeana lokojokon. Ngae epedori akiyen eboyor keng?

¹⁰ Ayong Ekapolon Akuj aripi ngitamen, eningono etau, atosubakinea itwaan daang na itemem ka eboyor keng, ka na itemem ka na esubi ngesi.”

¹¹Itwaan ni eanyuni ngaropiyae namoduna, ikoni ikeny ni ebekuni ngitak anabeyei ana nyeraakasi ngakeng. Engopiari ebari daang eringa ngesi nyemojonga. Ani enangi esal a eboyor keng, kidong erai ekabangabangat.

¹²Ikoni akai a Akuj yok ekicholong a apolou lokebusean, lo ewaakinio kidiama emoru napei anakisiakinet.

¹³Ekapolon Akuj, iyong kigienosi Ngisirael, irumete ngileech daang lu kingerete iyong. Engopiarete lu kiisikinete iyong, loger a ngirora alu igiritae napua,[12] kainyo kiisikis kesi iyong Ekapolon Akuj na irai elelea a ngakipi anaajokak.

¹⁴Kitangalekinoe kare Ekapolon Akuj, atojoker atangalek. Toyuunae ayong sodi atoyuun, kainyo iyong ngesi kepuruunit.

¹⁵Kingolik a, kengiseenete ngitunga ebalasi, “Nyaanu nakolong abala Ekapolon Akuj asubakini? Kimiekisi chene tosubak nguna.”

¹⁶Nakaneni nyengero ayong aliwor ekeyokon alotich. Kori nyesaka ayong atamar bu akolongit a ngichan. Iyeni iyong daang nakolong alimuni ayong.

¹⁷Nyiiliwor kitubulit ayong. Nikon amotun ayong akolongit na ngichan.

¹⁸Kisirum lu kaboliatar ayong ngileech, nakaneni kimiekinae ayong nyikisurum ngileech. Kitubul ngitunga ngulu, nakaneni kimiekinae ayong nyikitubul. Inu kesi akolongit na aronis, Torochak kesi ngakiro naaronok.

¹⁹Katolimok ayong Ekapolon Akuj tama, “Yeremia, kape tolimo akiroit kang alokidor a Ngitunga alo itoreenete ngikapolok a Yuda na elomareta ka apudor alore. Kape tolimo tani alorerea kadaang a Yerusalem.

²⁰Tolimok ngakiro kang ngikapolok daang a Yuda, ka ngitunga daang a Yuda ta ngitunga daang lu elomito Yerusalem, lu elomunete kitorut lodorin ngulu.

²¹Tolimok kesi atamar abala ayong Ekapolon Akuj kona, ‘Tochoikinos. Ani kiminasi esi akiyar kus, warasi nyiiwok eegos tani lodiochichi akolongit na Sabato. Nyiiwokut eegos tolomuneta lodorin a Yerusalem.

²²Nyiiwokosi eegos anakais kus akolongit na Sabato, kori nyiisuba etich. Kitaleutu akolongit a Sabato, loger lokolong adungokinea ayong taapaakus.

²³ Apot taapaakus towout adetar ngaki kiirasi ngakiro kang. Pearai apot kesi kichanaketa, towout akiirar ka akiwap ngakiro na adungokinit ayong.’

²⁴“Tolimok ngitunga lugu atamar kiwapa ngitalio kang daang. Nyiiwok eegos kitorunioto lodorin a ere kalo akolongit na Sabato. Ejoikinit kesi italeunete Sabato nyeesuba etich tani lodiochichi.

²⁵Ani kikokis neni, elomarete ngikapolok kech ka ngikarikok kitoro lodorin a Yerusalem, taanyut apolou na ikoni nakolong a Daudi. Imorikinosi kesi ka ngitunga a Yuda ka Yerusalem, tolomut itorunito lodorin a ere kalo, edokito ngaurukukui na irito ngangolei, todokito ngangolei. Eliworosi ngitunga ileleba lore a Yerusalem jik.

²⁶Epote ngitunga alorerea a Yuda, ka ngadakarin na idunyasi ka Yerusalem. Epote ngiche anakwap a Benjamen, ka ngaukon, ka lomoru ta Negeb. Eyaunete kesi kai kang ngakipeyos na inomio, ka ngakipeyos nache, ngakipeyos a ngalemet ka emitina ta ngakipeyos na ebuanakinere Akuj alakara.

²⁷Nakaneni ejoikinit kesi iwapete ngakiro kang, kitaleut akolongit na Sabato, kori nyiiwok eegos kitorioto lorotin a Yerusalem akolongit na Sabato. Ani kewout kesi akiwap ngakiro kang, enokakini ayong akim lodorin a Yerusalem. Enomiari akim ngakais naapolok kebuseak daang alo Yerusalem, tongop kona itudungeo.”