Read turkana Yeremia 18 Bible Online

Yeremia 18 - turkana bible

Yeremia 18

¹Katolimok ayong Ekapolon Akuj akiroit tama,

²“Yeremia, kape nawi a ekayen ngamoti. Kalimokini ayong iyong akiroit kaina.”

³Abu ayong atolot nawi a ekayen ngamoti. Ani anangi, atorukau ekayen ngamoti eyekinit amot.

⁴Arai nacha esechar echoto lo eyekinit ngesi, tolem ngesi echoto ngolo toyeunea ibore iche ni ejoikini ngesi.

⁵Sodi katolimok ayong Ekapolon Akuj akiroit tama,

⁶“Ikwa nyapedori ayong Ekapolon Akuj asubea esi Ngisirael ngakiro na esubea ekayen ngamoti echoto a? Toyena atamar eger lopei eyakar echoto nakan a ekayen ngamoti, iyakasi esi dang nakan kang, esi Ngisirael.

⁷Ani katiaku ayong ebukut be ati, kori apolou be ati, adituni, kori aukori, kori enyasuni,

⁸nakaneni tolung ebukut ngolo akisech keng, nyasubakini ayong ngakiro naaronok sek asaki asubakin.

⁹Aloger alopei kangolo, na atiakunea ayong atamar adukokini ka akitowo ebukut, kori apolou,

¹⁰ani erumor tosech ebukut ngolo alongaren kang towou akiwap ngakiro kang, nyasubakinea ayong ngakiro naajokak nasek asaki asubakinea.

¹¹Tokona bocha, tolimok ngitunga a Yuda ka lua Yerusalem atamar abala ayong Ekapolon Akuj kona, ‘Kingolikisi a, areat ayong naaronok anikus, nabo atukit naaronok[13] anikus. Kimiekisi ngirotin kus luaronok, kibeloto elote ka eboyor kus.’

¹²Nakaneni etachunete kesi tamasi, ‘Mam jik, nyo kosi? Kisubi sua na kisaki sua ngikulepek. Esubi itwaan daang na esaki loger lo eronia etau keng.’ ”

¹³Ebala Ekapolon Akuj kona, “Kingit ngibukui daang, ngae nakanuan eira akiroit na ikoni naga? Asuba ngitunga kang, Ngisirael, akiroit nakitubuli!

¹⁴Eyei akolongit na emamakar eloch anatabab ana ekokoriyorito alo Lebanon a? Ani ngakipi keng nakaalimok eleleunito alomoru, epedorete dir atubo nyeeleleut a?

¹⁵Nakaneni emuriakin ayong alotunga kang. Inomanakinete kesi ngakujo nasubuna emitina. Elegeunosi kesi tadakaros alorotin kech, nyeringa iwapito erot lokolong ngorot. Etoro kesi lorotin lu inacharito adepasi akitorit lorot lo idiiri.

¹⁶Etiliwosi kesi akwap naga ibore ni kitubuli, ibore ni ijotajotare. Itwaan daang ni itoruni neni, ebuli kotere nguna eanyungari, kimungumungak akou keng.

¹⁷Apetari ayong ngitunga kang iteete ngimoe kech, loger a apua ana ekutari ekuwam lo ekutunit alo kide. Amuleni ayong kesi, atowou akingarakin akolongit na eanyuneta ngichan.”

¹⁸Ani erumor tamasi ngitunga kona, “Potu mono esi atotukotor Yeremia, kainyo nyikingopikinete ngoni ngimurok luche lu kitatamete, ka ngikoosok lu kisuruorete ta ngikadwarak lu elimorete akiroit a Akuj! Potu erirata ngesi a ngakiro keng a ilope, kori nyikimisik ngakiro na iruoro ngesi.”

¹⁹Abu ayong elip atama, “Ekapolon Akuj, topupok ngakiro kang, topupok ngakiro nakeruorotor ayong ngimoe kang.

²⁰Ekoe a, naaronok etachakinio itwaan kotere naajokak a? Abe aboka bo kesi akipany na achakakin ayong. Kitam eger lokolong awaar ayong alongaren kon, eruoro naajokak kotere kesi. Asaki atamar nyiingoik iyong kesi.

²¹Tokona bocha Ekapolon Akuj, kimiek ngide kech toriyo erogo. Kimiek taarae a akwara. Kimiek ngaberu tadaunos ngikiliok ka ngide kech. Kimiek ngikiliok kech taar edeke loaronon, sodi taarae ngisapa a akwara.

²²Kiirarae ngitunga igorosi anawiyei kech, na imeunea iyong ngirukooi lu edemarete kesi ngiboro atipei. Abe kabokakis bo kesi ayong akipany, nabo alokakis erot lo kesurumeta.

²³Nakaneni, iyong Ekapolon Akuj iyeni ngakiro daang na etukitere akiar ayong. Wara nyiirimak aronis kech tani wadiochichi, kori nyiikisa akisech kech alongaren kon. Kimasak kesi kwap alongaren kon. Tosubea kesi na isaki eringa ingoit.”