Read turkana Yeremia 19 Bible Online

Yeremia 19 - turkana bible

Yeremia 19

¹Katolimok ayong Ekapolon Akuj tama, “Kape togielu agulu alokayen ngamoti. Ani erumor toriko ngikasukou a Atuk ngiche ka ngimurok luapolok,

²kirukosi ka kesi tanang nadipo a Lokookeng a Inom, kitor lokidor a Abelekek. Ani inangi neni, tolimo akiroit nakalimokini ayong iyong.

³Ilimuni iyong kona, ‘Esi ngikapolok a Yuda ka ngitunga a Yerusalem, kiirasi akiroit na alimuni ayong Akuj Namerikanyer, na arai Akuj Isirael. Kingolikisi a, ayauni ayong ngakiro naaronok noi nakwap naga, toliwor itwaan daang ni iirari, ipiakinete ngaki.

⁴Ekokini ayong neni kainyo kaisikis ayong ngitunga. Enyasut tani nege ani etiliworeta ni ipeyonokinere ngakujo ngache ngakipeyos. Taraakas ngakujo nguna na nyeyenete kesi, nyeyenete tani taapaakech ka ngikapolok a Yuda. Eleleba kesi ngaakot a ngitunga alu nyesechito nege,

⁵adukokis akuj nabe Baal ngikenoi lu ipeyooto ngide kech eraakasi ngakipeyos. Nyedungokina ayong kesi atamar kikokis neni, peetamit ayong tani atamar kori ikokinete neni.

⁶Tokona bocha, toyena atamar epote ngirwa lu epalikinere nege anyarit Topes, kori adipo a lokookeng a Inom, eliwor enyaritae adipo a Aaranot.

⁷Nege ngesi ekurukuruokinea ayong ngakiro daang na ereto ngitunga a Yuda ka Yerusalem. Emiekini ayong ngitunga ngulu kidwangae. Earete ngimoe kech kesi a akwara. Emiekini ayong ngawat kech tanyama ngikieny ka ngibuin.

⁸Etiliwori ayong ere a Yerusalem logo ibore ni kitubuli. Ee robo, etiliwori ibore ni ijotajotare. Itwaan daang ni inutuni neni, itubulete ngakiro a nginyas kangulu, toloma akijotajota.

⁹ Iriamete ngimoe ere, tasaka akiar ngitunga a ere kangolo. Eroner eboyor a ere kangolo noi. Elomakinete ngitunga anyama make alotooma ere, tanyama tani ngide kech a ngikulepek.’

¹⁰“Ani erumor tobwang iyong agulu alongaren ngitunga lu irukorete ka iyong

¹¹sodi tolimok kesi atamar abala ayong Akuj Namerikanyer kona, ‘Abilibili ayong ngitunga lugu, atobwang ere logo, kikokis agulu naga nabwangang na emam kona irumeikin. Enukakinio ngitunga Topes, kainyo engopi nabo wache enukakinio.

¹²Ngakiro nguna asubakinea ayong akwap naga ka ngitunga keng. Asubakinea ere logo ngakiro na asubea Topes.

¹³Ngakais na eyakasi Yerusalem ka ngakais a ngikapolok a Yuda, eliworosi na nyitaleuno loger a Topes. Tani ngakais daang nakolong enomanakinere ngikanyer emitina alokidiama kech, ka akidokanakin ngakujo nache emuna erai akipeyos, ikokinete neni.’ ”

¹⁴Ekisidi kanguna, torotok Yeremia alo Topes, anisek amearit Ekapolon Akuj alosit akidwar ngakiro. Tolot towo analaar a akai a Akuj tolimok ngitunga daang tama,

¹⁵“Akuj Namerikanyer na erai Akuj a Isirael, ebala kona, ‘Kingolikisi a, ayauni ayong lore logo ka ngadakarin daang na idunyatar, eriras lokolong abala ayong ayauni, kainyo ichanaka kesi, awout akiirar ngakiro kang.’ ”