Read turkana Yeremia 2 Bible Online

Yeremia 2 - turkana bible

Yeremia 2

¹Katolimok Ekapolon Akuj ayong akiroit tama,

²“Kape tolimok ngitunga daang lu eyakasi Yerusalem atamar ayong Ekapolon Akuj abala kona, Etamunit ayong eger lo iraakar iyong lo kimunoi ngirwa lu isorokanea, ka amina kon na iraakar ateran. Kiwapit iyong ayong anariet, etoro nakwap na emam itwaan etat ngamanat.

³Isirael, irai kolong iyong na italeuno anikang. Irai kolong iyong ageor na ekingaren a ngalemet kang. Arai itwaan daang ni enyami ageor ngina, apon kimarunae atamar esechit taanyu eriras. Ayong Ekapolon Akuj alimu nguna.”

⁴Topupokisi akiroit a Ekapolon Akuj, ngitunga a awi a Yakobo, ka esi ngitela a Isirael.

⁵Ebala Ekapolon Akuj kona, “Nyoni asechakini ayong taapaakus? Nyoni aree kesi anikang? Ewapete ngakiro napasiek tarata pas.

⁶Nyelimuno kesi tamasi, ‘Nyaali Ekapolon Akuj Akuj nakolong kipuduni alo Misiri, kitorik etoro nariet etoro nakwap na ariet ka ngasinyeno, akwap nakoonon toribokinite chuch, akwap na emam ngikalotok, akwap na emam itwaan elomit?’

⁷Karikuni ayong esi nakwap naketurupan ngikinyam talakarotor ageor keng ka ngiboro luche ajokak daang. Ani napei inangeta inaa, ipot kinyasut akwap kang. Tosuba ngakiro nakikadakinete, anakwap ana kainakini ayong esi kiruma.

⁸Apot ngimurok nyeetamasi, ‘Nyaali Ekapolon Akuj?’ Pekayenete ayong ngiketatamak a etal, katongero ayong ngikarikok.[2] Todwara ngikadwarak a ekiro a Baal. Kilipa ngakujo nasubuna na eraakasi pas.”

⁹Ebala Ekapolon Akuj kona, “Kotere nguna, ketitakini ayong esi. Etitakini ayong ngalesea kus.

¹⁰Totenikisi anam toloto too lokwar a Kupuro. Tomeasi itwaan kide tolot nakwap a Kedar. Ingolikinete esi atamar emam ibore ni ikoni nege ni asubakin a ache.

¹¹Eyei mono ebukut edio eloch ngakujo keng tani pekeraakasi ngakujo nguna ngaka iteni a? Tarai kaisikis ayong ngitunga kang, kaisikis ayong na etaanyuni kesi arimatoi, ewapakis ngakujo na emam ibore kitaanyunete.

¹²Kotere nguna, adungokinit ayong adis atamar toriangakin torikirikok. Kitatalasi ngakiro nguna esi kitobul,

¹³kainyo asubakis ngitunga kang ngakiro naaronok ngaarei, areasi anikang, ayong lo ekoni elelea a ngakipi anakaalimok, aliwor esubete ngatanki kech a ngikulepek, ngatanki na epeded nyiratakinete ngakipi.

¹⁴“Erai mono Isirael ekedalan a? Edounio kolong erai ekedalan a? Nyo bo kingatareta iyong ngimoe?

¹⁵Irurumanakinete ngesi ngingatunyo, irurumaate lokojokon. Etiliwosi akwap keng ariet. Edong ngirerea keng eraakasi alaireng, emam itwaan eyei.

¹⁶Ani eya nguna, Ngitunga a ngirerea a Mempis ka Tapanes, abwang akou keng.

¹⁷Isirael, iyong ilope inyarakin nguna, ani kiisikinea iyong ayong Ekapolon Akuj, na arai Akuj kon, nakarikitor iyong alorot.

¹⁸Tokona, esibit iyong nyo ianyuni kilot Misiri akimat ngakipi a angolol a Nili? Esibit iyong nyo ianyuni kilot Asiria akimat ngakipi a angolol a Eupurate?

¹⁹Aronis kon a ilope kirirae iyong. Area kon anikang kidesi iyong. Ingolikini iyong nabo iyenuni aronis ka apipilu nakiisikinea iyong ayong Ekapolon Akuj, na arai Akuj kon, tapalik akerit ayong. Ayong Ekapolon Akuj Namerikanyer, ngesi alimu nguna.”

²⁰Ebala Ekapolon lo erai Ekapolon Akuj, “Isirael, ingedi kolong iyong ngamasea nakienitere, towata ngarukanes nakienitere. Kidiama emukura lokooyen daang ka kwap ekitoe lokaliban daang, ibu iyong tosub emalaanu ani ilipea ngakujo ngache.

²¹Nakaneni ketakini kolong ayong iyong loger a emusabib aloseuna alo arai ekinyamit loajokon noi. Nakaneni kingolik cha iyong na isubak! Ikok iyong emusabib loabosan, lo erai pas.

²²Tani kirigakin iyong amakat kilotar a esabuni alokaalan, idongi akemer a akisech kon etee ayong. Alimu ayong Ekapolon Akuj nguna.

²³“Ikokini iyong ibala, ‘Eringa ayong nyinyasuna. Nyilipa ayong Baal, ai?’ Kingolik eger lo isechea iyong anadipo. Kingolik na isub iyong. Ikoni iyong ekaal lo edwarunit, lo ekeri ipatakae,

²⁴ikoni asikiria nakaturonon na itwangi anariet. Na edwarunea, tomerakin toloma akinguonor ekuwam. Esikiria daang lo iitanit ngesi, nyichanakin esaki ngesi. Erwaarit ngesi esaa daang lo esakere akwarakin.

²⁵Isirael, nyiitubur ngakejen kon, kori nyiitoon edokole kon deu ani iwapitor ngakujo nagelayek. Nakaneni ibala iyong, ‘Eraakasi nugu daang akiding pas! Aminak ayong ngakujo nagelayek, ewapakini ayong kesi.’ ”

²⁶Ebala Ekapolon Akuj kona, “Eger lo irumeta ekokolan ngileech, eger ngolo irumeta Ngisirael ngileech. Irumete ngileech kesi ngikulepek ka ngikapolok kech, ka ngikarikok a arieng, ka ngimurok ta ngikadwarak kech.

²⁷Elimokinete kesi ekitoe tamasi, ‘Irai iyong apakang.’ Ani amoru tolimokis tamasi, ‘Irai iyong itiokang.’ Esubakinosi nguna kainyo kebongokis kesi ayong akau, towout akingoliun nikang. Nakaneni ani eanyunete ngichan tamasi, ‘Tonyou toyuunae sua!’

²⁸“Nakaneni nyaanu ngakujo kon na isubakini iyong? Kimiek kesi tonyout kepedorete ayuun iyong, na ianyunea ngichan. Etige Yuda, abe elalak ngakujo kon eriyan ka ngirerea kon!

²⁹Nyo ingurunguratar esi? Nyo kingerioto esi ayong?

³⁰Kerirae ayong esi, nakaneni ikwa kerirat pas. Ipot esi tongero arikino. Aar ngakwaaras kus ngikadwarak kus loger a engatuny alokaadengan.”

³¹Topupokisi esi Ngisirael akiroit a Ekapolon Akuj na ebalar, “Ekoe, ekok ayong ariet alo Isirael a? Kori akwap na eribokinit chuch a? Nyo ebalatar ngitunga kang, ‘Kilachakina sua nyikiwapi iyong nabo.’

³²Ekoe, eyei apese imuriakini asir keng a? Eyei ateran na imuriakini alagama keng a? Nakaneni ajongoto ngitunga kang akitamun ayong a ngirwa alukaalak emam kona imarunio.

³³Abe kiyenikinitae iyong anakisak ngaberu. Itatam iyong tani ngaberu naaronok.

³⁴Etakanete ngakemera a ngaakot aloworui kon. Ngaakot a ngikebootok ka lu nyesechito tarai nyirumuna iyong kesi ebwangito akai kon. “Tani bo ikoni neni dang,

³⁵ibala iyong, ‘Nyasechit ayong. Iteni dir nyeringa Ekapolon Akuj kangoikinit ayong.’ Nakaneni kerirae ayong iyong ani ibalar, ‘Nyasechit ayong.’

³⁶Nyo iwowootor iyong kona, nyo ilochio ngirotin kon? Kisurum Misiri iyong ngileech, loger lokolong kisurumea Siria.

³⁷Irotokini iyong tani alo Misiri, ijuurui ani kirumitotor ngileech. Anger ayong Ekapolon Akuj lu igieno iyong, emam ibore kingarakinete kesi iyong.”