Read turkana Yeremia 20 Bible Online

Yeremia 20 - turkana bible

Yeremia 20

¹Pachur lokookeng a Imer, lo arai emuron a Akuj, ngesi apolokinit akai a Akuj. Abu ngesi kiira Yeremia edwari ngakiro nguna.

²Tolimok ngesi ngitunga atamar kideta Yeremia, toena a ngiriko kiboikin diyete ekidor lo alokuju lo enyaritae Benjamen lo eyei kai a Akuj.

³Ani akolongit nache nataparach, na alacharea Pachur ngiriko lu aenitere Yeremia, tolimok Yeremia ngesi tama, “Nyeringa Ekapolon Akuj kinyarit iyong a ekiro be Pachur, ekiro lo kilimok ngesi iyong ngesi lobe ‘Ebuloi awadaang.’

⁴Kainyo Ekapolon Akuj alope alimu kona, ‘Ketiliwori ayong iyong lo kibulit bon, kitubulite ngipaalon kon daang. Ianyungari iyong ngipaalon kon daang earete ngakwaaras a ngimoe kech. Ewaakini ayong ngitunga daang a Yuda nakan a ekapolon a Babilonia, eriki ngesi kesi eraakasi ngirikon tanang nakwap a Babilonia, kirikak inaa a akwara.

⁵Ani eya nguna daang, ebari a ere daang ka ngiboro luche lu ikachitae, ka ngiboro daang lu elalak ngaropiyae, ka ebari daang a ekapolon a Yuda, ewaakini ayong nakan a ngimoe kech toremo, tolemasi ngiboro daang yaasi Babilonia.

⁶Ani eliwor iyong Pachur ka ngitunga a awi kon daang, kirikio esi iraakasi ngirikon tanang Babilonia, itoanikini iyong inaa, kitonuk aapei ka ngipaalon kon daang lukolong idwaranakini iyong alioko.’ ”

⁷Ekapolon Akuj, abe kingal iyong ayong, apon ayong dir kengalae. Kainyo kidwang iyong ayong. Aliwor itwaan daang keyenyi ayong. Kakianatar kesi ayong apaaran juui.

⁸Nacha eruorikinea ayong ejoikinit eremari atama, “Amoitanut ka nginyas!” Ekapolon Akuj, kakianare ayong katoseete jiik, ani alimoritor akiroit kon.

⁹Nakaneni ani katama ayong, “Nyalimuni Ekapolon Akuj, kori nyeruorikini nabo alimit ekiro keng,” kikok akiroit kon na erirae alotau kang, na egolokino nakoyo kang. Kaburu ayong akidait akiroit ngina, nabo kakuruwo akidait.

¹⁰Apupi ayong itwaan daang ingaingaa ebala, “Eyei ebuloi wadaang! Kitorono ngesi! Potu etorono ngesi!” Tani ngipaalon kang luminan, imuit akingolikin ayong adakar, ebalasi kesi, “Ekoe, kori dikino ingalaario, edwanga ngoni ngesi, atatachakisi nayok.”

¹¹Nakaneni iyong Ekapolon Akuj ibakit alowae kang. Ikoni iyong ekajwon lokaagongon anikang. Edakarosi lu kaboliatar ayong, nyekedwangete kesi ayong. Irumete kesi ngileech jik, kainyo ekuruwori ibore daang. Nyimuriakinosi ngileech kech jik.

¹²Akuj Namerikanyer, iroanari iyong ngitunga lu etenooko, iseme iyong ngitai a ngitunga ka ngitamen, kitaanyungarae ayong ngakiro na itachanakini iyong alomoe kang. Kainyo ewaak ayong ngakiro na egieno nakan kon.

¹³ Toeonokisi Ekapolon Akuj, kipuruutu Ekapolon Akuj! Kainyo ayuu ngesi ekebootonit, anakan a ngitunga aluaronok.

¹⁴Akolongit nakolong kedounere ayong, toliwor na ilamam! Akolongit nakolong kedounio itiokang ayong, nyeeliwor na epiaritae!

¹⁵Itwaan nikolong etalakari apakang, tolimok tama, “Edou aberu kon idia!” Eliwor ni ilamitae.

¹⁶Kimiekisi itwaan ngini kikwaanikin ka ngirerea lu amunyari Ekapolon Akuj nyiisieneto. Kimiekisi kiira akigoro nataparach ka elii lo igorore naparan,

¹⁷kainyo awouni ngesi akiar ayong eringa nyidouno. Arai kikok neni, keliworo akook a itiokang aliel kang, tosub itiokang na erubakinit epoti jiik.

¹⁸Nyo kolong kedounere ayong? Ekoe, apuduni kolong ayong ataanyunea ngichan ka akialolong a? Ebooyo kerumito ngileech a?