Read turkana Yeremia 21 Bible Online

Yeremia 21 - turkana bible

Yeremia 21

¹Erai naga akiroit a Ekapolon Akuj na alimokini Yeremia, akolongit na amearea ekapolon a Yuda lo anyaritae Sedekia, tomea Pachur lokookeng a Malikia, ka Sepania lokookeng a Maaseya, lo arai emuron a Akuj, nia Yeremia alimokin kona,

² “Kemaimai ayong iyong atamar tanyara kare Ekapolon Akuj kilipak sua, kainyo ebunit Nebukadinesa lo erai ekapolon a Babilonia akitijwore sua. Ejok robo topedori Ekapolon Akuj asubakinea sua akitoodikinet apei nakailiilon, loger lopalem esubeenea, kitonyou Nebukadinesa kane tolot.”

³Tolimok Yeremia kesi tama,

⁴“Kapesi tolimokisi Sedekia atamar Ekapolon Akuj na erai Akuj a Isirael, ebala kona, ‘Sedekia, edwangi ayong ngajorei kon na itijiete ekapolon a Babilonia ka ngajorei keng. Ngiboro lu ejieto ngasigerea kon, atukokini ayong kiding ere.

⁵Ayong alope ketijikini iyong a agogongu kang kadaang, ka angoit kang ta anyunyura kang naaronon noi.

⁶Aari ayong ngitunga daang lu elomito lore logo. Eari edeke lokaronon noi ngitunga ka ngibaren aapei.

⁷ Ani eliwor iyong, ka ngikasubak etich kon, ka ngitunga lu epuunosi alojie, ka lu epuunosi anakoro ta edeke, kemiekini ayong esi kirumuni ekapolon Nebukadinesa ka ngimoe kus luche, lu esakete akiar esi. Kiari esi Nebukadinesa a akwara. Emam tani ipei kus ni eisikinio kori erimakinio kori ni isieni ngimoe. Ayong Ekapolon Akuj alimu nguna.’ ”

⁸Ani erumor katolimok ayong Ekapolon Akuj atamar atolimok ngitunga kona, “Topupokisi mono esi! Ayong Ekapolon Akuj, kemiekinit esi toseut erot lo isakete kerai lo eteni nakiyar kori lo eteni nakitu.

⁹Itwaan cha daang ni idongi lore logo, eari akwara, ka akoro ta edeke loaronon. Nakaneni ani ngini epudori alore kisingolikin Ngikalidayo lu iriemito ere, nyeario. Epuun ngesi alojie kangolo.

¹⁰Atiaku ayong atamar amunyari ere logo, nyarimakini. Ewaakini nakan a ekapolon a Babilonia, kinom tonomia. Ayong Ekapolon Akuj alimu nguna.”

¹¹Kalimokini ayong Ekapolon Akuj akiroit naga esaki atolimok ngitunga a awi a ekapolon a Yuda. Tama ngesi,

¹²“Topupokisi akiroit kang esi ngalesea a Daudi! Alimunit ayong Ekapolon Akuj kona: Tosub ngakiro na etenooko akolongit daang. Toyuutu itwaan ni ingalaaritae ibore, ani eyei itwaan nikechiakiaran. Ani pekikokis neni, erirauni angoit kang loger a akim, kotere ngasechesea kus naaronok, tongop kona itudungeo, kotere ngasechesea kus naaronok.

¹³Kingolik a, kanyoik ayong esi, lu ilomito nadipo, lu iraakasi ataaba anaro. Abe itamete esi[14] ibalasi, ‘Ngae ebuni akirem sua? Ngae epedi ngawasea kosi nakaagongok?’

¹⁴Kerirae ayong esi itemem ka nguna isub. Echunyakini ayong akai kus naapolon[15] akim, tonomia ibore daang ni iriamit akai ngina. Ayong Ekapolon Akuj alimu nguna.”