Read turkana Yeremia 22 Bible Online

Yeremia 22 - turkana bible

Yeremia 22

¹Alimokini Ekapolon Akuj Yeremia tama, “Kape kai a ekapolon tolimok akiroit naga,

²tama, ‘Iyong ekapolon a Yuda, lo irai alesit a ekapolon Daudi, aapei ka ngikasubak etich kon ta ngitunga lu elomito Yerusalem. Topupokisi akiroit kang, ayong Ekapolon Akuj.

³Abala ayong Ekapolon Akuj kona: Tosub ngakiro na eriyan ka na iyookino. Toyuutu itwaan ni ingalaaritae ibore ani eyei itwaan nikechiakiaran. Nyiisechak kori nyiidema ngitunga a akwap anache ibore, kori ngide lukokiok ta ngapuseru. Warasi nyiibukosi ngaakot a itwaan ani nyesechit kane.

⁴Kainyo ani kirichakis esi akisub etich loger lokadungokinitor ayong esi, erubakinete ngalesea a Daudi eraakasi ngikapolok. Erubakinete ngikapolok ngulu, ka ngikasubak etich kech ta ngitunga kech itoruuniyete lodorin a akai a ekapolon, edokito ngaurukukui na irito ngangolei todokito ngangolei.

⁵Nakaneni ani pekiwap esi ngakiro kang, ekongi ayong a ekiro kang atamar eliwor akai naga alaireng. Ayong Ekapolon Akuj alimu nguna.’ ”

⁶Ngakiro elimunit Ekapolon Akuj nugu kotere akai a ekapolon a Yuda, “Ibus kolong iyong loger a akwap a Gilead, ka ngimoru a Lebanon. Tani kikoni neni, ketiliwori ayong iyong ariet, ee robo, ngirerea lu emam itwaan elomit.

⁷Ameuni ayong ngitunga akinyasun iyong, etingi ipei kech daang aep anakan. Itelete ngichekereng kon luajokak, tachakakis nakim.

⁸“Ani ekisidi, itorunete ngitunga lukaalak a ngakwapea anache lore ngolo, kingitanaros make ebalasi, ‘Anukiro nugu asubakinea Ekapolon Akuj ere loapolon logo?’

⁹Etachunete ngirukitos kech tamasi, ‘Erai nikolong aisikineta kesi achamunet nakolong achamakin ka Ekapolon Akuj na erai Akuj kech, kilipa ngakujo ngache tosuba etich kech.’ ”

¹⁰Ngitunga a Yuda, nyiigor kotere ekapolon Yosia. Nyiisutonokis kotere akitu keng. Nakaneni kigoro kotere lokookeng lobe Yoawas. Arik ngesi nyebonguni nabo. Nyeringa nabo eanyungari akwap nakolong edounere.

¹¹Kainyo elimunit Ekapolon Akuj ngakiro nugu ani eyei lokookeng a Yosia lo enyaritae Yoawas, lo ilunyokin nados a apakeng toliwor ekapolon. Ebala Ekapolon Akuj kona, “Arotoki ngesi kane, nyebonguni nabo jik.

¹² Etoani ngesi anakwap ana arikor, nyeringa nabo eanyungari akwap naga jik.”

¹³Oitiakoi! Abe etioko nginyas eanyuni itwaan ani eduki akai keng a erukoonu, kiata ngamaniyae na alokidiama a engalas. Ee robo, itwaan ni itusubi luche etich pas, tamam ngaropiyae enyamete.

¹⁴Etioko ngakiro eanyuni itwaan ni ebala, “Aduki ayong akai naapolon na eyakasi ngamaniyae naapolok kidiama.” Ani erumor kitem ngipukei, todukok ngikwaasea a ngikito a ngichekereng, sodi kiwasak emunyen loarengan.

¹⁵Ibala iyong kori iliwor ekapolon loajokon akidwang luche, ani idukio ngakais a ngichekereng, kibuseketa noi akidwang na luche a? Peebooyi kolong apakon imuji, tamasi, tosubi na eriyan ka na etenooko? Nguna kolong etojokete ngakiro a eboyor keng.

¹⁶Einanakini ngesi lukebootok ka lu ibato ngakan a eger alo etenoono, kitojoka ngakiro nguna eboyor keng. Ibore erai akiyen Ekapolon Akuj ngini.

¹⁷ Nakaneni eripiyarito ngakonyen kon ka etau ibore nimoduna ni erai iyaret kon a ilope. Ibukori iyong ngaakot ani nyesechit, kichiakia ngitunga kon, tarai ekademan.

¹⁸Kotere nguna, ngakiro nugu elimunit Ekapolon Akuj kotere Yeoyakim lokookeng a Yosia, lo erai ekapolon a Yuda, ebala, “Emam itwaan ikalouni kotere akitu keng, tama, ‘Oitiakoi kare lokaatokang! Oitiakoi kare nakaatokang!’ Emam itwaan iutekini kotere ngesi kori emam ni ikalouni ebala, ‘Oitiakoi kare ekarikon kang! Oitiakoi kare ekapolon kang!’

¹⁹Eyaario akinuk peerimae loger a esikiria, iriyario nikalapatan kimiekinae eperi anikalapatan ngidorin a Yerusalem.”

²⁰“Esi ngitunga a Yerusalem, Kapesi a Lebanon tachalakis, kiremasi alo Bachan. Kikaloutu alomoru a Abarim, kainyo amunyar lu ibakito ka esi daang.

²¹Kesuruori kolong ayong esi ngirwa lukolong iyakatar esi najako, nakaneni ipot esi tamasi, ‘Nyikipupokini sua.’ Eboyor kus ngolo napei kolong alokiditeu kus, kikuruworit esi akiwap akiroit kang.

²²Ekutari ekuwam ngikarikok kus daang, erikio lu ibakito ka esi nakwapea nache. Sodi kiruma esi ngileech ka etimoi kotere aronis kus daang.

²³Esi daang lu ilomito Lebanon, lu ibooyete akaalimon alochekereng. Ikunuakinete esi na iirareta apipilu. Apipilu na ikoni na aberu ana eriaba.”

²⁴Tolimok Ekapolon Akuj Yeoyakin tama, “Ekong jik ani kona araakar ayong na ayari, arai tani tarai iyong Yeoyakin ekababaat lo a emachar anakan kang ana aloteten, kabuto ayong iyong

²⁵kepotok ngitunga lu iemit iyong, lu esakete akiar iyong. Kepotok ayong iyong nakan a Nebukadinesa alo erai ekapolon a Babilonia, ka ngasigerea keng.

²⁶Ketingaari ayong iyong ka itiokon kitorik nakwap ache nagela, nakolong pekidoikinio esi. Idaikinosi esi daang inaa.

²⁷ Kimui esi abongun nakwap naga, nakaneni nyibongunete.”

²⁸Atolim ayong atama, “Ekoe, ekok ekapolon Yeoyakin agulu na abwanga, na echakario ani emamakar itwaan esaki a? Nyo emasarere ngesi ka ngide keng nialonan torikoe nakwap na nyeyenete kesi?”

²⁹Ayoro akwap, akwap, kiira akiroit a Ekapolon Akuj!

³⁰Ebala Ekapolon Akuj kona, “Kigirak atamar emam itwaan en ikoku, ekile lo emam naajokak eanyuni aloboyor keng. Emam tani ipei a ngalesea keng ni iboikin lokicholong a apolou a Daudi topolok nabo akwap a Yuda.”