Read turkana Yeremia 23 Bible Online

Yeremia 23 - turkana bible

Yeremia 23

¹Ebala Ekapolon Akuj kona, “Oitiakoi! Etioko nginyas eanyunete ngikeyokok lu inyasunete ka apetar ngamesekin kang!

²Kotere nguna, Ekapolon Akuj, Akuj a Isirael, elimunit ngakiro nugu kotere ngikeyokok a ngitunga keng. Ebala, ‘Ipot esi nyiichoikis ngitunga kang. Ipetasi esi kesi itwarakis. Kerirae tokona ayong dang esi kotere naaronok na isubakis esi.

³Achununi ayong esipanit kang lopiya anakwapea kadaang ana kolong apetakinit ayong, atobuu nakwap kech. Euruunete kesi ngide lukaalak, kiatakinos kesi talalaketa.

⁴Erumakini ayong ngikeyokok lu echoikinete kesi. Nyeringa nabo kesi eemete kori ebuli. Emam tani ipei kech ni engopi.’ ”

⁵Ebala Ekapolon Akuj kona, “Kingolik a, enangi ngirwa lu aseunea ayong alesit a Daudi toliwor ekapolon lo etenoono. Eliwor ngesi ekapolon lokooson. Esubi ngesi anakwap kadaang na etenooko ka na eriyan.

⁶ Ngirwa lu eliworor ngesi ekapolon, eyuunio ngitunga a Yuda, kiboikinos Ngisirael akaalimon. Enyarao ngesi, ‘Ekapolon Akuj erai ayuuno yok.’ ”

⁷Ebala Ekapolon Akuj kona, “Enangi ngirwa lu nyikongioto ngitunga nabo ebalasi, ‘Eger lo eyarea Ekapolon Akuj nakolong ayuuni Ngisirael anakwap a Misiri,’

⁸pearai eliworosi kesi ikongete ebalasi, ‘Eger lo eyarea Ekapolon Akuj nakolong epuduni Ngisirael anakwap ana alokwap ka ngakwapea nache daang na apetarit ngesi kesi. Elomete kesi nakwap kech a ngikulepek.’ ”

⁹Ani alowae a ngikadwarak, esurur etau kang, itadatadasi ngakoyo kang daang. Elelebun akiroit a Ekapolon Akuj nikang, Kesikok ayong itwaan ni irakarit epurot, ekok itwaan ni etijit emuna.

¹⁰Ileleba ngikalomak nakwap, ngitunga lu nyemunosi Ekapolon Akuj. Igoro akwap kotere ngilam, aono achokor keng deu. Erono eboyor kech. Esubeta ngikilinga kech ngakiro na nyiyookino.

¹¹Ebala Ekapolon Akuj kona, “Ngikadwarak ka ngimurok, nyekerito Akuj. Erum ayong kesi esubete naaronok tani alokai kang.

¹²Kotere nguna, ngirotin lu itorito kesi, ikokinete ngirotin a ngakejen lu kicheresarete anaribu. Esitori ayong kesi neni, tadakaros. Etaanyuni ayong kesi ngakiro naaronok, na enangea ekaru a eriras kech. Ayong Ekapolon Akuj alimu nguna.”

¹³“Engolik ayong ngikadwarak a Samaria, esubete akiroit nakikadakini noi. Edwarete elimito ekiro a Baal kibatasi ngitunga kang.

¹⁴ Nakaneni engolik ayong ngikadwarak a Yerusalem, esubete nabo akiroit nakikadakini noi. Eraakasi ngikalomak kisudete ngakiro. Ingarakinito ngitunga akisub naaronok, sodi tongop ni ereen anaaronok. Kesi daang, ekokis ngitunga Sodom ka Gomora.”

¹⁵Kotere nguna, Akuj Namerikanyer elimunit nugu kotere ngikadwarak a Yerusalem. Ebala, “Ainakini ayong kesi ngikito luadwarak tanyama, nabo etamasi ekitoe lokaaran. Kainyo apetakis ngikadwarak a Yerusalem akimenyarit Akuj wadaang.”

¹⁶Alimokini Akuj ngitunga a Yerusalem tama, “Nyiirasi ngakiro na iruorosi ngikadwarak. Ngapasiek ngakiro na esakete kesi esi kigienokinos. Eraakasi ngakiro nakilimokinete kesi esi ngakisingolikinet na irokete kesi ngikulepek, meere na alimu ayong.

¹⁷Isuruorete kesi jiik ngitunga lu ewounito akiirar ngakiro na alimunit ayong, ebalasi, ‘Ibooyete esi akaalimon.’ Nabo elimonokinete ngitunga daang lukechanak ebalasi, ‘Emam naaronok ianyunotor esi.’ ”

¹⁸Atolim ayong atama, “Ngae alokadwarak kangulu alot natuk a Ekapolon Akuj, kiira ka akiyen akiroit keng? Kori ngae apupokini ka achoiar na alimuni ngesi?

¹⁹Ikoni anyunyura a Ekapolon Akuj ekuwam loationon, ikoni ekuwam lo ipiripiri, lo ekutakini ngakies aluaronok.

²⁰Nyedaun angoit a Ekapolon Akuj, mati kitemokin daang nakolong anyoikinit ngesi. Ngirwa lu isidiunosi, iyenunete esi nguna daang lokojokon.”

²¹Alimuni Ekapolon Akuj tama, “Meere ayong ameuni ngikadwarak ngulu, nakaneni apot kesi tamatakinos akidwar Apot kesi todwara a ekiro kang, tarai nyisuruoro ayong kesi!

²²Arai toyenete kesi ngitamen kang lumunonoe, kelimokinito ngitunga kang akiroit kang, nabo kereeunito alorotin kech aluaronok, ketiakak ka naaronok na esubete kesi.

²³“Arai ayong Akuj na aapi, meere na alona.

²⁴Ekoe, epedori itwaan adukakin ayong sodi nyeanyunga ayong ngesi a? Nyiyenete esi atamar ayei ayong wadaang, nadis ka kwap a? Ayong Ekapolon Akuj alimu nguna.

²⁵Eira ayong ngakiro na iruorosi ngikadwarak lukaliokok elimito ekiro kang, ebalasi, ‘Erujae ayong, erujae ayong!’

²⁶Erubakini alioko eyei lotai a ngikadwarak alu alu edwarete alioko tanang wori? Edwarete ngikadwarak ngulu alioko na irokete kesi ngikulepek!

²⁷Ebalasi kesi itamete akirujare na elimonokinosi kesi ngikulepek, kori ibatari ngitunga kimuriakis ngakiro kang. Loger lokolong emuriakineta ngakiro kang taapaakech, tominakis kesi akuj nabe Baal.

²⁸Ekadwaran lo irujat, tolimo atamar erai ibore akirujare, nakaneni ani lo elimokinitae akiroit kang, kiyook elimori. Ekoe, epedorio akisikwaanikin ngatunyeny ka ngakanoi a?

²⁹Ikoni akiroit kang akim, nabo ikoni akujuk na ebwangi ngatabab kieala.

³⁰Angerit ayong ngikadwarak lu eanyunete akiroit nagela sodi tamasi erai akiroit kang.

³¹Angerit ayong tani ngikadwarak lu ingamangamasi ngakiro kech a ngikulepek, niti ebalasi ‘Ekapolon Akuj alimu.’

³²Ee robo, abala ayong Ekapolon Akuj angeri ngikadwarak lu edwarete alotunga ngakiro na eraakasi alioko. Iruorosi ngakiro na irujaate, kibatasi ngitunga kang kotere alioko kech, ka ngiwog lua abangaanut. Nyemeara ayong kesi, kori nyedungokina atamar toloto, kotere nguna, emam ngakiro ajokak eanyunete ngitunga kang. Ayong Ekapolon Akuj alimu nguna.”

³³Katanyar ayong Ekapolon Akuj tama, “Yeremia, ani keyei ipei a ngitunga kang, kori ekadwaran, kori emuron ni kingisi iyong tama, ‘Ebeyo eegos[16] a Ekapolon Akuj ai?’ Ilimokini iyong ngesi tama, ‘Iyong irai eegos ani a Ekapolon Akuj, nakaneni kichakari ngesi iyong.’

³⁴Ani kelimu ipei a ngitunga kang, kori ekadwaran kori emuron tama, ‘Eegos a Ekapolon Akuj,’ erirae ayong ngesi ka ngitunga a awi keng daang.

³⁵Ejoikinit itwaan daang ingisi ngipaalon keng ka ngiyenet keng tama, ‘Anukiro atachu Ekapolon Akuj? Atama Ekapolon Akuj ai?’

³⁶Nakaneni nyelimunio nabo ekiruor be ‘Eegos a Ekapolon Akuj,’ kainyo ani kelimu itwaan idio kongina, etiliwori ayong akiroit kang eegos dir anikeng. Ebatasi ngitunga akiroit a Akuj ana eyari, Akuj Namerikanyer, na erai Akuj yok.

³⁷Yeremia, kingit ngikadwarak kona, ‘Anukiro atachu Ekapolon Akuj?’ Kori ‘Anukiro alimu Ekapolon Akuj?’

³⁸Nakaneni ani kilimut esi tamasi, ‘Eegos a Ekapolon Akuj,’ tarai sek ketengerit ayong esi abala, ‘Nyiitamasi eegos a Ekapolon Akuj,’

³⁹karutuni ayong esi katachaka nikalonan anikang. Kachakari ayong esi aapei ka ere lokolong kainakini ayong esi ka taapaakus.

⁴⁰Kesurumi ayong esi ngileech lukajik, ka etimoi lo nyikimuriakini.”