Read turkana Yeremia 24 Bible Online

Yeremia 24 - turkana bible

Yeremia 24

¹Kedodik ayong Ekapolon Akuj ngakikapea ngaarei a ngameyana na ewaakinitae ngaren akai a Akuj. (Asubasi ngakiro nugu ekisidi a ngirwa alu arikorea ekapolon a Babilonia lo anyaritae Nebukadinesa, toriko Yeoyakin alo Yerusalem eenitae, tanang Babilonia. Arai Yeoyakin ekapolon a Yuda. Anyaritae apakeng a Yeoyakin Yeoyakim. Arikio Yeoyakin aapei ka ngikarikok a Yuda, ka ngikunonoi ta lu itatamitae etich.)

²Ayakasi ngameyana naajokak nakikap na ekingaren, ngameyana na engelario akiger. Ani akikap na ngaarei, ayakasi ngameyana naaronok noi, na nyepedorete tani anyama.

³ Abu Ekapolon Akuj kengit ayong tama, “Yeremia, nyo itee iyong?” Atatachu ayong atama, “Ngameyana, na ejokak, ejokak noi, ani na eroko, eroko noi nyenyamasi.”

⁴Sodi katolimok ayong Ekapolon Akuj akiroit tama,

⁵“Ayong Ekapolon Akuj, na arai Akuj a Isirael, engolik atamar ngitunga a Yuda lukolong arikio Babilonia, ikote ngameyana naajokak nugu, nakaneni edodikini ayong kesi apatanu.

⁶Etee ayong kesi jik, atobuu nakwap naga. Aduki ayong kesi, nyayatari. Etakini, nyarutuni.

⁷Ainakini ayong kesi etau lo eyeneta atamar ayong arai Ekapolon Akuj. Eliworosi kesi ngitunga kang, aliwor ayong Akuj kech, kainyo ebongunete kesi nikang a ngitai kech kadaang.

⁸“Ekapolon Sedekia lo a Yuda, ka ngikasubak etich keng, aapei ka ngitunga lupiyayek a Yerusalem lu elomito nakwap ngina, ka ngitunga luche daang lu awoose Misiri, esikokini ayong Ekapolon Akuj kesi ngameyana naaronok noi na nyenyamasi.

⁹Ayauni ngakiro naaronok noi nikech na itubulete ngibukui a ngakwapea kadaang. Eliworosi ngitunga ekianatar kesi, toseta ka akimeny. Ilamete ngitunga kesi awadaang ani apetari ayong kesi.

¹⁰Ainuni ayong kesi ejie, ka eron a akoro ta edeke, tanang edaunosi korot, anakwap ana kolong ainakini ayong kesi ka taapaakech.”