Read turkana Yeremia 25 Bible Online

Yeremia 25 - turkana bible

Yeremia 25

¹Ekaru lo a nguomwon lo araakar Yeoyakim ekapolon a Yuda, abu Ekapolon Akuj tolimok Yeremia akiroit na elimokini ngitunga a Yuda. (Arai ekaru ngolo lo ekingaren aliworor Nebukadinesa ekapolon a Babilonia.) Arai Yeoyakim lokookeng a Yosia.

²Abu Yeremia kiruoro ka ngitunga daang a Yuda, ka daang lu elomito Yerusalem. Tolimok tama,

³“A ngikaru a ngitomwon-arei ka nguuni tanang tokona, napei alokaru alo a ngitomon ka nguuni araakar Yosia lo arai lokookeng a Amon ekapolon a Yuda, kalimonokini Ekapolon Akuj ayong akiroit keng. Abu ayong katolimonok esi akiroit ngina jiik, nakaneni towout esi akiirar.

⁴Ipot esi towout akiirar kori adetar ngaki kus, tarai ameunit Ekapolon Akuj ngikadwarak lu araakasi ngikasubak etich keng nikus jiik.

⁵Kitolimokis kesi esi tamasi, ‘Tapalikisi akiboi eboyor loaronon ka akisub ngakiro naaronok na isubete esi, sodi torubakineta ibooyete anakwap ana kolong kiinakini Ekapolon Akuj esi ka taapaakus, toliwor akus jik.

⁶Nyiilipa ngakujo ngache kori nyiisuba etich kech. Warasi nyiitongoa Ekapolon Akuj ani ilipeta ngakujo na isubete esi ngikulepek. Arai kiwapa esi ngakiro a Ekapolon Akuj pekirirat ngesi esi.’

⁷ Nakaneni ebala Ekapolon Akuj ipot esi towout akiirar ngakiro keng. Akikarun akikokin neni, ipot esi kitongoa ngesi a ngakujo kus anasubuna, kirirae kotere ngakiro nguna. Ekapolon Akuj ngesi alimu nguna.”

⁸Abala ayong Akuj Namerikanyer kona, “Tokona bocha, ani kona iwouneta esi akiirar ngakiro kang,

⁹Kanyarakini ayong esi ngitela daang lu ewae alo alokwap aapei ka ekasuban etich kang Nebukadinesa, lo erai ekapolon a Babilonia. Arikuni ayong kesi toremo akwap na Yuda naga, ka ngitunga lu elomito nege daang ta ngibukui daang lu idunyatar kesi. Kamunyari ayong esi daang tarata ibore ni ta ngileech lu nyedaunosi jik.

¹⁰Ani eyakasi nguna daang, atubori ayong anikech akimaritetere ka alakara. Engopi akinyiakanar ka akimaritetere na iutare. Engopi akimiet a ngataae kech, engopi eruye lo iriere ngakiria.

¹¹Idongi akwap naga daang erai asakatan ka alaireng. Ani ngibukui lu idunyare, esubete etich a ekapolon a Babilonia a ngikaru a ngitomwon-kaarei.

¹²Ani adaunet a ngikaru alutomwon-kaarei kangulu, erirae ayong ekapolon a Babilonia ka ebukut ngolo aapei. Enyasuni ayong akwap ngina kidong erai asakatan jik.

¹³Asubakini ayong ngakiro daang nakolong alimuni kotere akwap ngina. Eyookini ngakiro daang nakolong egirio nakitab naga nakolong adwari Yeremia kotere ngibukui daang.

¹⁴ Atachakini Ngibabiloniae na itemem ka na esubete kesi ka etich a ngakan kech, kainyo ngibukui lukaalak ka ngikapolok lukaalak, itiliworio ngikedalak kech.”

¹⁵Ekapolon Akuj, Akuj a Isirael, kalimokini ayong kona, “Toting ekopo a emuna lo ileleba anyunyura kang. Yaa kitamat ngibukui daang lu kameari ayong iyong nikech.

¹⁶Na emaseta kesi, elomarete akiteretero kikerepik, kotere akwara na ayauni ayong nikech.”

¹⁷Sodi robo ediau ayong ekopo ngolo anakan a Ekapolon Akuj, etamat ngibukui daang lu kamearit Ekapolon Akuj nikech.

¹⁸Etamat Yerusalem ka ngirerea daang a Yuda, aapei ka ngikapolok ka ngikarikok kech, toliworotor kesi alaireng nalapat, ibore ni ijotajotare, nilamam loger lo tokona ikoneta neni.

¹⁹Parao ekapolon a Misiri, ka ngikasubak etich keng, ka ngikarikok ta ngitunga keng daang.

²⁰Ngimisiri ka ngitunga a akwap anache daang lu elomito Misiri. Ngikapolok a akwap a Us daang. Ngikapolok daang a ngirerea a Ngipilisti alu enyaritae Achikelon, ka Gasa, ka Ekiron ta lupiyayek a Achidod.

²¹Ngitunga a akwap a Edom ka Moab ta Amon.

²²Ngikapolok daang a Tiro ka Sidon. Ngikapolok daang a akwap ana ekwaas anam a Mediterenian.

²³Ere a Dedan, ka Tema ta Bus. Ngitunga daang lu eirete ngitim kech.

²⁴Ngikapolok a Arabia daang. Ngikapolok daang a ngitela alu eyakasi nariet.

²⁵Ngikapolok daang a Simri, ka Elam ta Media.

²⁶Ngikapolok daang alokwap, lu eloka ka lu eapiyete, napei ani eyei epei kiporok loche. Emaase ngikapolok daang anakwap. Ani erumor tamat ekapolon a Babilon dang.

²⁷Tolim Akuj Namerikanyer tama, “Tolimok ngitunga atamar ayong Akuj Namerikanyer, na arai Akuj a Isirael, adungokinit kesi atamar tamata epurot kiraka, toleka tanang edakarosi, tokuruwo anyoun, kotere akwara na ayaunit ayong nikech.

²⁸Ani kewout kesi akidiaun ekopo anakan kon tamaseta, ilimokini iyong kesi atamar abala ayong Akuj Namerikanyer, ejoikinit kesi emaseta ekopo ngolo!

²⁹Kainyo ani kesiak ayong akirirare ere lo erai ekang, esibit ibucharosi esi aloriras a? Toyena atamar kirirao esi dir, kainyo ayauni ayong akwara lotunga daang a akwap. Ayong Akuj Namerikanyer, alimu nguna.”

³⁰“Tokona bocha iyong Yeremia, todwar ngakiro daang na alimu ayong. Tolimok ngitunga lugu kona, ‘Irurumakini Ekapolon Akuj anadis. Egirokini ani italeuno ibooyo ngesi. Irurumakini akationon alotunga keng. Ikilauni loger a itwaan ani ipudae ngamusabib. Iirari itwaan daang anakwap etoil keng.

³¹Iirario etoil ngolo anasalunet a akwap. Ititakinit Ekapolon Akuj ngibukui. Etubi ngesi ngakiro a ngitunga kadaang, taar luaronok. Ekapolon Akuj alimu nguna.’ ”

³²Alimu Akuj Namerikanyer kona, “Etingete ngakiro naaronok ebukut epei kikobakin loche. Ewotunit ekuwam loaronon ationon anasalunet a akwap.”

³³Akolongit ngina, ngawat a ngitunga alu eari Ekapolon Akuj, epetakin ewae epei a akwap tanang loche. Nyigoroi tosutonokinae kotere kesi, kori nyiriyario tonukae. Eperete kesi analup loger a ngasike ana etukokina.

³⁴Kigoro esi ngikeyokok. Kikaloutu kibelebelokinos anapua, Esi ngikulepek a esipanit, kainyo adolut ngirwa lu kingolere esi Kingolio esi loger a ngimesekin aluatumak.[17]

³⁵Emam ngikeyokok ni edokinete. Ngikulepek a ngamesekin ngulu emam kona epuunosi.

³⁶Topupokisi akigoro a ngikeyokok, kiirasi akiutere a ngikulepek a ngamesekin. Kainyo enyasu Ekapolon Akuj nginyia anachokor kech.

³⁷Abwang nipalem ibooyoto kesi akaalimon abwang kotere angoit a Ekapolon Akuj.

³⁸Apudu Ekapolon Akuj anipalem eyei loger a engatuny alo epuduni anaburibur keng. Aliwor akwap kech alaireng kotere ngakwaaras a ngimoe ka angoit a Ekapolon Akuj.