Read turkana Yeremia 26 Bible Online

Yeremia 26 - turkana bible

Yeremia 26

¹Napei aliworor Yeoyakim lo arai lokookeng a Yosia ekapolon a Yuda,

²katolimok ayong Ekapolon Akuj akiroit tama, “Towo analaar a akai a Akuj tolimo ngakiro daang nakalimok ayong iyong atamar tolimok ngitunga daang lu eponito alorerea a Yuda akilip alokai a Akuj. Wara nyiidepa akiroit tani apei nyelimoro.

³ Epedori ta toliwor iirarete kesi daang ngakiro sodi tolunga ngirotin kech luaronok. Ani kikokis kesi neni, elochi ayong ngakiro naaronok na asaki ayaun nikech kotere ngakiro naaronok esubete kesi.”

⁴Katolimok ayong Ekapolon Akuj atamar atolimok ngitunga atamar abala ngesi, “Ayong Ekapolon Akuj ejoikinit esi kipupete kiwapa etal lokainak ayong esi.

⁵Kiirasi tani ngakiro a ngikadwarak alu eraakasi ngikasubak etich kang, lu ameununi ayong nikus jiik. Nyiwapa esi ngakiro na eruorosi kesi.

⁶ Ani kirubakis esi iwounito akiwap ngakiro kang asubakinea ayong akai naga ngakiro nakolong asubea Chilo,[18] eliworosi ngibukui daang a akwap elimito ekiro a ere kalo ilamatar.”

⁷Apot ngimurok ka ngikadwarak ta ngitunga daang keirasi ayong eruoro ngakiro nugu alokai a Akuj.

⁸Ani napei arumorea ayong akiruoro ngakiro daang nakadungokinit Ekapolon Akuj atamar eruor, katorwakinos kesi ayong tachalakis tamasi, “Ejoikinit iyong kiario kotere ngakiro nugu!

⁹Nyo ilimitor iyong ekiro a Ekapolon Akuj ibalar idwari abe ikokini akai naga Chilo, nabo inyasunio ere logo tongop itwaan elomi nege?” Apot ngitunga kerikaut ayong.

¹⁰Ani iirarete ngikarikok a Yuda ngakiro na asubakinosi, kikomaut alokai a ekapolon toloto kai a Akuj, kiboikinos nipalem iboyonokinosi alokidor alokitetet a akai Akuj.

¹¹Apot ngimurok ka ngikadwarak tolimokis ngitunga ka ngikarikok kech tamasi, “Itemokino itwaan elimunio atamar taarae kotere ngakiro na elimitor ere yok. Iirasi esi nguna a ngaki kus.”

¹²Abu ayong atolimok ngikarikok ka ngitunga kech atama, “Ekapolon Akuj kameuni ayong atamar atodwar ngakiro daang a akai kana ka ere logo nguna iirasi esi.

¹³Ejoikinit tokona esi ilungete ngirotin ka ngakiro naaronok na isubete esi, sodi kiwapa ngakiro a Ekapolon Akuj ana erai Akuj kus. Ani kikokis esi neni, ilochi ngesi nginyas lu ebala ayauni nikus.

¹⁴Ani eliwor ayong ayei nakan kus! Tosubere ayong ngakiro daang na itamito esi atamar ejokak, kiyookino.

¹⁵Nakaneni toyena iteni dir atamar ani kiar esi ayong, kimarunio esi ka ngitunga a ere kalo atamar iar itwaan ni nyesechit, kainyo Ekapolon Akuj kameuni ayong kechikichikak ngakiro nugu naki kus.”

¹⁶Apot ngitunga ka ngikarikok tolimokis ngimurok ka ngikadwarak tamasi, “Kisuruori ngoni itwaan en elimit ekiro a Ekapolon Akuj ana erai Akuj yok. Nyejoikinit ngesi eario.”

¹⁷Apot ngikasukou ngiche a Atuk tonyout tolimokis ngitunga lu achunakina neni tamasi,

¹⁸ “Nakolong araakar Esekia ekapolon a Yuda, abu Mika lo a Moreches tolimok ngitunga daang atamar abala Akuj Namerikanyer kona, ‘Echilio Sion loger a amana, eliwor Yerusalem asakatan na etukokina. Eliwor emukura lo a akai a Akuj amoni.’

¹⁹“Apot dir ekapolon Esekia ka ngitunga a Yuda taara Mika a? Mam jik! Abu ngesi toker Ekapolon Akuj tasak akitalakar ngesi. Kiloch Ekapolon Akuj ngitamen keng kotere ngakiro naaronok nasek abala ngesi ayauni nikech. Tokona, edikino ngoni kiyauni ngakiro naaronok noi niyok.” (

²⁰Ayei itwaan iche ni adwari ngakiro a ere kangolo ka akwap ngina elimit ekiro a Ekapolon Akuj, loger lopei adwarea Yeremia. Anyaritae itwaan ngini Uria lo arai lokookeng a Chemaya, lo a akwap a Kirias Yearim.

²¹Ani iirari ekapolon Yeoyakim, ka ngasigerea ta ngikarikok luche arukito ka ngesi ngakiro na alimuni Uria, tasak erot lo earea Uria. Ani iirari Uria atamar esakio ngesi akiar, tobul ngesi todok tolot Misiri.

²²Abu ekapolon Yeoyakim tomea Elinasan lo arai lokookeng a Akibor, erukito ka ngitunga ngiche. Toloto kesi Misiri arikun Uria.

²³Torikunoe ngesi nia ekapolon Yeoyakim, lo alimuni atamar kichumae ngesi a akwara tachakakinae akwaan keng nipalem enukanakinio ngitunga daang.)

²⁴Ani kona kaikinitor ayong Aikam lo arai lokookeng a Chapan, apon ayong nyekarikor lotunga lu kaarete.