Read turkana Yeremia 27 Bible Online

Yeremia 27 - turkana bible

Yeremia 27

¹Napei aliworor Sedekia lo arai lokookeng a Yosia ekapolon a Yuda, katolimok ayong Ekapolon Akuj akiroit,

²atamar atoinik ngarukanes nakilori nakichiera sodi atobutok lomosiring kang.

³Ani erumor katolimok ayong Ekapolon Akuj atamar atomea ngitunga nia ngikapolok a Edom, ka Moab, ka Tiro ta Sidon. Ngitunga lu ameari ayong kesi ngikaweikinak a ngikapolok kangulu lu aponito aanyun ekapolon Sedekia alo Yerusalem.

⁴Katolimok ayong Akuj Namerikanyer na erai Akuj a Ngisirael atamar echikichik kesi tolimokis ngikapolok kech kona,

⁵“Ayong asubuni akwap a agogongu kang anaationon. Atosub ngitunga ka ngitieng lu eyakasi nakwap, nakaneni ainakini ayong ngini cha daang asaki ainakin.

⁶Epoto tokona ngakwapea kus daang ainak Nebukadinesa lo erai ekapolon a Babilonia. Erai ngesi ekasuban etich kang. Ainak ayong ngesi tani ngitieng a moding tosuba etich keng.

⁷ Esubete ngibukui daang etich keng, ani erumor tosuba etich a lokookeng, ta lo a etatait keng, tanang ngirwa lu edakaror apolou a akwap keng. Ani enangi neni, esubete ngitunga a akwap keng etich a ngibukui alukajwok ka ngikapolok lu eyenikinitae.

⁸“Ani kemin akwap kori apolou na ewouni akiwap etal a Nebukadinesa, erirae ayong akwap ngina a akwara, ka akoro ta edeke loaronon. Emiekini Nebukadinesa tomunya pil.

⁹Nyiirasi ngakiro a ngikadwarak kus kori na ngimurok, kori ngikerujak, kori ngikekeriak ta ngikasubak. Kilimonokinete kesi esi kona, ‘Nyiliworosi esi ngikasubak etich ekapolon a Babilonia.’

¹⁰Edwarete kesi alioko. Kotere ngakiro nguna, kemiekini ayong esi kitorikor nakwap naalonan noi. Ketwarakini ayong esi sodi tomunyaros.

¹¹Ani ebukut lo iwapi etal a ekapolon a Babilonia tosub etich keng, nyetwarakini ayong anakwap ana erai akeng. Emiekini ayong tolom nakwap keng a ilope kita. Ayong Ekapolon Akuj alimu nguna.”

¹²Atolimok ayong Sedekia lo erai ekapolon a Yuda ngakiro napei nguna atama, “Tacham ngakiro a Ekapolon a Babilonia. Tosub etich keng ka lo a ngitunga keng, nakaneni idongi iyong iyari.

¹³Nyo niti bore itoanikineta iyong ka ngitunga kon nakwara ka nakoro ta lodekesinei luaronok en? Ngakiro nguna ebala Ekapolon Akuj esubakinosi anakwap kadaang ana ewouni akiwap etal a ekapolon a Babilonia.

¹⁴Nyiira ngakiro a ngikadwarak alu ebalasi iyong nyiicham ngakiro a ekapolon a Babilonia. Edwarete kesi alioko.

¹⁵Alimu Ekapolon Akuj alope ebala, ‘Nyemeuna ayong kesi. Edwarete kesi alioko elimito ekiro kang. Kotere ngakiro nguna, ketwarakini ayong iyong, kitomunyar. Imunyarosi iyong aapei ka ngikadwarak lu edwarete alioko.’ ”

¹⁶Abu ayong atolimok ngimurok a Akuj ka ngitunga atamar ebala Ekapolon Akuj kona, “Nyiira ngakiro a ngikadwarak alu ebalasi ebuunio ngiboro a akai a Akuj atipei alo Babilonia. Edwarete kesi alioko.

¹⁷Nyiira ngakiro kech! Kiwap etal a ekapolon a Babilonia, toyar! Nyo niti bore itiliworere ere logo alaireng en?

¹⁸Ani keraakasi kesi ngikadwarak lua iteni dir lu eanyunito akiroit ngina anikang, kimiekisi kesi kemaima ayong Akuj Namerikanyer, eratak ngiboro lu eringa eyakasi kai kang ka na ekapolon a Yuda nyeyaar Babilonia.”

¹⁹Kainyo elimunit Akuj Namerikanyer ngakiro nugu kotere ngakiro a ngapirio, ngatanki na ngasua ananyangayek ka ngakitoweet na ijukio ta asir nache aisikinitae alore kalo.

²⁰Abu Nebukadinesa nyeelema ngiboro ngulu na arikorea Yeoyakin lo arai lokookeng a Yeoyakim alo Yerusalem tanang Babilonia. Arai Yeoyakin ekapolon a Yuda. Apon ngesi torikoroe aapei ka ngikajakaanak a Yuda ka Yerusalem.

²¹“Topupokisi ngakiro na alimunit ayong Akuj Namerikanyer na arai Akuj a Isirael, kotere asir na idongit kai kang ka kai a ekapolon a Yuda alo Yerusalem.

²²Eyaario kesi Babilonia kiboyoto kaina tanang ngirwa lu asakitor ayong kesi. Ngirwa ngulu, abuuni ayong kesi nege ainak akwap naga.”