Read turkana Yeremia 28 Bible Online

Yeremia 28 - turkana bible

Yeremia 28

¹Ekaru lopei ngolo, elap lo a ngikan a ekaru alo a nguomwon araakar Sedekia ekapolon, abu Anania lokookeng a Asur kesuruor ayong alokai a Akuj. Arai Anania ekadwaran a ere alobe Gibeon. Katolimok ngesi ayong alongaren ngimurok a Akuj ka ngitunga

²atamar Akuj Namerikanyer, na erai Akuj a Ngisirael, elimunit kona, “Alema ayong ekapolon a Babilonia nidikil.

³Napei tokona tanang ngikaru ngiarei, abuuni ayong asir daang a akai a Akuj nakolong ayaari ekapolon Nebukadinesa Babilonia. Abuuni ayong asir ngina nege.

⁴ Abuuni ayong tani Yeoyakin lokookeng a Yeoyakim, lo erai ekapolon a Yuda, atobuu nege. Abuuni aapei ka ngitunga a Yuda daang lukolong arikio Babilonia, kainyo alemari ekapolon a Babilonia nidikil.”

⁵Alongaren ngimurok a Akuj ka ngitunga daang lu awaasi alokai a Akuj, abu ayong atolimok Anania atama,

⁶“Kitalarete nu! Kimiekisi robo Ekapolon Akuj tosubak nguna! Ani nyiyookini bo ngesi ngakiro na idwari iyong, tobuu asir a akai a Akuj alo Babilonia, aapei ka ngitunga daang lukolong arikio a!

⁷Nakaneni topupok ngakiro nakalimokinit ayong iyong ka ngitunga daang.

⁸Ngikadwarak lukolong esiaunete akidwar eringa ayong ka iyong, adwarete atamar ebuni ejie, ka akoro ta edeke lobukui lukaalak ka ngakwapea na eyenikinitae.

⁹Ani ekadwaran lo edwari ekisil, enupio atamar erai ekadwaran lo emeunit Ekapolon Akuj dir, erai kiyookinosi ngakiro na edwari ngesi tarata iteni.”

¹⁰Abu Anania tobut akilori nakichier alomosiring kang tobilibili,

¹¹tolim alongaren ngitunga daang tama, “Alimu Ekapolon Akuj atamar ekokini ngesi nege abili akilori nakichier na eenikinit Nebukadinesa lomosiringan a ngibukui kadaang. Ebili ngesi loger logo napei tokona jik tanang ngikaru ngiarei.” Abu ayong atorotok.

¹²Ani adaunet a ngirwa alu abilea Anania akilori nakichier, katolimok ayong Ekapolon Akuj akiroit,

¹³atamar atolot nia Anania atolimok atama, “Ebala Ekapolon Akuj abe ipedori iyong akibil akilori nakitoe nakichier, nakaneni elunyakini ngesi[19] akilori nasuat nados keng.

¹⁴Akuj Namerikanyer, na erai Akuj a Isirael, alimu atamar ewaakini asuat nakichier lobukui lugu daang, tosuba kesi etich a Nebukadinesa alo erai ekapolon a Babilonia. Alimu Ekapolon Akuj atamar etusubi tani ngitieng etich a Nebukadinesa.”

¹⁵Abu ayong atolimok Anania nugu eatak atama, “Anania! Topupok a, meere Ekapolon Akuj kimeunit iyong, nakaneni itunup iyong ngitunga lugu ngakiro na eraakasi alioko.

¹⁶Kotere ngakiro nguna, ebala Ekapolon Akuj alope kalemari iyong anakwap. Ani eringa ekaru logo nyedauna, itoani iyong kainyo ilimokini iyong ngitunga atamar tongero akiroit a Ekapolon Akuj.”

¹⁷Totoan Anania elap lo a ngikan-kaarei a ekaru kangolo.