Read turkana Yeremia 3 Bible Online

Yeremia 3 - turkana bible

Yeremia 3

¹Ebala Ekapolon Akuj kona, “Ani kelak ekile aberu keng, torotok aberu ngina anikeng toliwor aberu a ekile a eche, ekoe, epedori nabo ekile ngolo abongor naberu ngina? Ikwa nyinyasun akwap noi erai kebongo ngesi a? Nakaneni, iyong Isirael, isuba ka ngitunga lukaalak emalaanu. Ikwa isaki tokona iyong abongokin ayong a?

²Tokienyia naitae a ngimukur nalapat. Aliwae nyepero iyong ka kesi? Idarit iyong kesi alokwaas a erot, loger a erukoot[3] anariet. Inyasu iyong akwap, kotere emalaanu kon ka aronis.

³Ngakiro nguna kesi eratakinere akiru, towou tani akiru na ngirupei akiram. Tarai ikote ngakonyen kon na amalaat, emam ngileech kirumito iyong tani wadiochichi.

⁴“Kigoronokini tokona iyong ayong ibala, ‘Irai iyong apakang, kimina iyong ayong napei kolong eringa adit.

⁵Ekoe, kingoikini iyong ayong jik a? Kinyunyurikin iyong ayong jik a?’ Isirael, ekiruor kon ngolo. Tarai isubi iyong akisech daang na ipedori.”

⁶Ngirwa lu araakar Yosia ekapolon, katolimok ayong Ekapolon Akuj tama, “Ingolik mono iyong ngakiro na asubaki Isirael, ngina nyemunoi a? Kaisiki ngesi ayong adoka lomukura lokooyen daang ka alosit kwap ekitoe lo elibit daang, tosub emalaanu keng kaneni!

⁷Etamit kolong ayong atamar kesub nguna kerumor, ebonguni nikang. Ikwa emam jik. Abu nyeebongu. Abu Yuda nakaatokeng nakaliokon kingolik ngakiro nguna daang.

⁸Ani eyakasi nguna daang, abu Yuda kingolik atamar alak ayong Isirael kotere emalaanu keng lo nyekamunor ayong. Nyeema Yuda. Abu ngesi dang tolot tosub emalaanu.

⁹Ani kona epasakinitor ngesi ngakiro a emalaanu, kinyasu ngesi akwap, tosub emalaanu ani elipitor ngamoru ka ngikito.

¹⁰ Ani kesub nguna daang kerumor, Yuda nakaatokeng a Isirael nakaliokon, nyebonguno nikang a etau keng kadaang, abu kengal ayong. Ayong Ekapolon Akuj alimu nguna.”

¹¹Ani erumor katolimok ayong Ekapolon Akuj tama, “Edodiun Isirael na area ani a Ekapolon Akuj atamar ajok ngesi akidwang Yuda nakaliokon.

¹²Tokona, kape tolimok Isirael ngakiro nugu ibala, ‘Iyong Isirael nanyikimunoi, tobongu nikang. Nyakangoikini ayong iyong,’ kainyo ayong Akuj na ngisien. Nyakangoikini ayong iyong jik.

¹³Tachamu atamar isechit. Tolim atamar kinger ayong Ekapolon Akuj na arai Akuj kon. Tolimo atamar alokwap ekitoe lokaliban daang, ipoto iyong amina kon iinak ngakujo nagelayek, towou akiwap ngitalio kang. Ayong Ekapolon Akuj alimu nguna.

¹⁴“Tobongutu esi ngitunga lu nyikimunoi, kainyo ayong arai ekapolon kus. Karikori ayong esi epei alore a epei, atoriko ngiarei anawi a apei, kayaa moru a Sion. Ayong Ekapolon Akuj alimu nguna.

¹⁵“Kainakini ayong esi ngikeyokok lu iwapete ngakiro kang, kitopolokis esi a aosou ka achwaanu.

¹⁶Ngirwa ngulu, ani ilalakearosi esi anakwap kangina, epalikinete ngitunga alimit asaduku kang a Achamunet. Epalikinete akitamanar ngakiro keng ka akitamunit ngesi. Nyeringa kesi iitanete nabo, kori nyesubakinete ache.

¹⁷Ani enangi ngirwa ngulu, enyarao Yerusalem, ‘Ekicholong a Ekapolon Akuj’, nabo echunakin ngibukui daang neni a ekiro a Ekapolon Akuj. Nyeringa eliworosi lu ichanaka esubete ngakiro na esakete ngitai kech luaronok.

¹⁸Imorikinosi Isirael ka Yuda, ebongunete kesi daang aapei anakwap ana eyei kwap, tobongosi nakwap nakolong ainakini ayong taapaakus toliwor akech jik.”

¹⁹Ebala Ekapolon Akuj kona, “Isirael, etamit ayong eger lo ketiliworea iyong epei a talokookang, kainak akwap nakebusean noi, akwap na ejok noi alobukui kadaang. Etamit atamar kori kinyarae iyong ayong apa, tongop kona ipalikini akiwapit ayong.

²⁰Nakaneni ikok iyong anikang aberu na nyemunoi na erotokini alokile. Kikuruwo iyong aliwor aberu nakamuno ayong. Ayong Ekapolon Akuj alimu nguna.”

²¹Epupio echale alokidiama ngimukur. Igorosi Ngisirael tosutonokinete, kainyo enyasut eboyor kech, nabo ajongoto akitamunit Ekapolon Akuj na erai Akuj kech.

²²Tobongutu esi daang lu nyimunosi Ekapolon Akuj. Kitangalekini ngesi esi toliworos lu kimunoi. Ibalasi esi, “Kingolik a, kibongunit sua nikon kainyo iyong irai Ekapolon Akuj, Akuj kosi.

²³Iteni dir, emam ibore kitaanyunit sua akilipit ngakujo nasubuna alomukur. Iteni, ayuuno a Isirael ebunit ani a Ekapolon Akuj, Akuj kosi.

²⁴“Napei kolong a ekiditeu, amunya akiroit na ngileech naga ibore daang nikolong epitunete taapaakosi. Amunya ngisipaan kech a ngaanei ka nganokin a ngaatuk, talokookech ka tanakookech.

²⁵Itemokino ngoni kinapakin ani kirumeta ngileech, emukokinos etimoi yok. Napei a ekiditeu yok tanang akolongit naga, kirai ngoni ka taapaayok lu kisechanakini jiik Ekapolon Akuj na erai Akuj yok. Nyiwapa ngoni ngitalio keng.”