Read turkana Yeremia 30 Bible Online

Yeremia 30 - turkana bible

Yeremia 30

¹Erai naga akiroit a Ekapolon Akuj,

²kalimokini ayong Yeremia tama, “Kigirak ngakiro daang nakalimok ayong iyong nakitab,

³kainyo epote ngirwa lu abuunea ayong ngitunga kang, Isirael ka Yuda. Abuuni ayong kesi nakwap nakolong ainakini taapaakech. Elemarete kesi akwap ngina nabo. Ayong Ekapolon Akuj alimu nguna.”

⁴Elimokinit Ekapolon Akuj ngitunga a Isirael ka Yuda ebala,

⁵“Eira ayong akigoro a ebuloi, akigoro a aemit meere na ekisil.

⁶Towo tokona kitamak! Epedori ekile akidoun ikoku a? Nyo tokona eteo ayong ekile daang etapit akook loger a aberu ana eriaba? Nyo epusianiaritor itwaan daang kona?

⁷Ebunit akolongit nakitubuli noi. Emam akolongit ache ikwaanatar. Akolongit na eriabatar ngitunga kang, Ngisirael, nakaneni eyuunosi kesi anariaba kangina.”

⁸Ebala Akuj Namerikanyer kona, “Ani enangi akolongit ngina, angedi ayong ngamasea na eenitere kesi atowata ngarukanes kech. Nyeringa kesi eliworosi ngikedalak a ngitunga a ngakwapea anache.

⁹Pearai esubete kesi etich kang, ayong Ekapolon Akuj na arai Akuj kech. Esubete etich tani a alesit a Daudi, alo etiliwori ayong ekapolon.”

¹⁰ “Ngitunga kang, warasi nyieam. Ngisirael, warasi nyikibul. Kayuuni ayong esi anakwap anaalonan kangina. Ayuuni ngalesea kus anakwap ana eraakatar ngirikon. Ibongunete esi nawi kiboikinos akaalimon. Emam ibore iche iemete esi.

¹¹Kiruki ayong ka esi katoyuu. Amunyari ayong ngibukui daang anakwapea ana kapetakinit ayong esi, nakaneni nyakamunyari ayong esi. Karikini ayong esi a erot alo eriyan. Nyakalakakini esi nyirira. Ayong Ekapolon Akuj alimu nguna.”

¹²Elimokinit Ekapolon Akuj ngitunga keng kona, “Nyengalekinete ngajemei kus. Nyejokearosi ngaruma kus.

¹³Emam itwaan kichoikini esi, emam ekitoe emiatakinio najemei kus, emam kona kitedekuunio esi.

¹⁴Kimuleno esi ngikonei kus daang. Nyeringa kesi kimisito esi. Karem ayong esi loger a emoit. Ianyut esi eriras a emoit alokamoitanan, kotere ngasechesea kus nakaalak. Aroner asechanu kus noi.

¹⁵Tojongoto aawan ani kiwanere. Nyengalekini nikaapilan kus. Kainyo erono asechanu kus noi nabo elalak ngasechesea kus noi. Ayong kasubakinea esi nguna.

¹⁶Ani daang lu kirikarete esi, irikario. Ani lu kirikete esi, erikio. Daang lu kichiakiarito esi, ichiakiario. Ani daang lu kidemete esi ngiboro, edemario kesi dang.

¹⁷Etangalekini ayong ngidekesinei kus. Etangalekini ngajemei kus. Tani kebalasi ngimoe kus, ‘Ekok Sion ngikuron, emam itwaan eringa emisit.’ Ayong Ekapolon Akuj alimu nguna.”

¹⁸Ebala Ekapolon Akuj kona, “Abuari ayong ngitunga kang nakwap kech. Kesienioto ngitunga a ngawiyei kadaang. Ebongokinio akiduk ere towo alomukura keng, towo awas nakaagongon anipalem ewaar.

¹⁹Eeokinete ngitunga lu elomito neni kikutakis. Elakarosi kimariteto. Iatakinosi talalaketa ani apiaritor ayong kesi. Einuni apiaro kang kesi arimatoi, nyeringa kesi imenyario.

²⁰Ikokinete ngide kech nikolong ngorot. Isikokinosi kesi alongaren kang. Erirae ayong daang lu ichiakiarito kesi.

²¹Ebuni ekarikon kech anakwap kech a ngikulepek. Ebuni lo epolokini esi alotunga kech. Etaapuuni ayong bunio nikang, kainyo ngae epedori abunere eringa ayong nyenyara?

²²Iliworosi esi ngitunga kang, atoliwor ayong Akuj kus. Ayong Ekapolon Akuj alimu nguna.”

²³Anyunyura a Ekapolon Akuj, ikoni ekuwam loationon, ikoni ekuwam lo ipiripiri, lo ekutakini ngakies aluaronok.

²⁴Nyedaun anyunyura a Ekapolon Akuj mati kitemokin daang nakolong anyoikinit asubakin. Ngirwa lu isidiunosi, iyenunete esi nguna daang lokojokon.