Read turkana Yeremia 31 Bible Online

Yeremia 31 - turkana bible

Yeremia 31

¹Ebala Ekapolon Akuj kona, “Ngirwa ngulu, aliwor ayong Akuj a ngitela kadaang a Ngisirael, sodi toliworos kesi ngitunga kang.

²Ngitunga daang lu abuchunosi anakwara, apot kesienioto ayong anariet. Ani esakete Ngisirael akiangar,

³abu ayong etaanyun kesi anialonan. Ngisirael, kaminak ayong esi nakajik. Kotere nguna, arubakini ayong kamina esi.

⁴Abongokini ayong akiduk esi. Ee robo, Ngisirael lu italeuno! Ilemunete esi ngaekeeke kus kinyiakanasi imariteteete.

⁵Itakinete esi nabo ngimusabib lomukur a Samaria. Itakinete ngiketak, tanyama ageor na ekoniuni.

⁶Ee robo, enangi ngirwa lu enyaratar ngiketeok alomukur a Epiraim ebalasi, ‘Potu atodokasi Sion, nia Ekapolon Akuj ana erai Akuj yok.’ ”

⁷Ebala Ekapolon Akuj kona, “Toeokisi a alakara kotere Ngisirael, kimaritetekisi kotere ngulu eyenikinitae alobukui. Taramutu eeos kipuruut ibalasi, ‘Ayuu Ekapolon Akuj ngitunga keng, Ngisirael lupiyayek.’

⁸Kingolikisi a, arikuni ayong kesi alowae alo alokwap, atochun kesi alowaitin kadaang a akwap. Irukunete kesi ka ngimuduk ta ngikangwalak, aapei ka ngaberu na epotiyete, ta na adol akidoun. Ebongunete kesi eraakasi ajore natiapolon.

⁹Ebongunete ngitunga kang igorosi. Arikuni ayong kesi ilipito. Ariki ayong kesi ni eyakasi ngingololin, alorot alosulut alo emam ibore ilegeuni kesi. Kainyo arai ayong apakech a Ngisirael. Epiraim erai lokookang loapolon.”

¹⁰Ebala Ekapolon Akuj kona, “Ngibukui, topupokisi ngakiro kang, tolimosi alokwaasea a nganamea anaalonak. Tolimutu kona, ‘Ngolo apetari Ngisirael, echunakini kesi nabo kiyok loger lo iyokiyo ekeyokon esipanit keng.’

¹¹Alachak ayong Ngisirael, ayuu kesi alobukut alokajwon noi.

¹²Epote kesi toeokis elakara anaita a Sion. Elakarosi noi kotere ngadutan na adusea ayong kesi. Adusi kesi a ngikinyam ka emuna ta akimiet. Amekini kesi ngamesekin ka ngaatuk. Ikokinete kesi amana na ebukio ngakipi jiik. Eanyunete kesi ibore daang ni iitanito.

¹³Sodi talakaros ngapesur kinyiakanasi. Elakarosi ngisorok ka ngikasukou. Esililingi ayong kesi, eloch akigoro kech toliwor alakara. Eloch akialolong kech toliwor akiena.

¹⁴Eritokini ngimurok kang akimuj naajokon, sodi etemu ngichan a ngitunga kang kadaang. Ayong Ekapolon Akuj alimu nguna.”

¹⁵ Ebala Ekapolon Akuj kona, “Eirario echale alore a Rama, etoil a itwaan igoro kisutusuta noi. Igoro Rael kotere ngide keng. Engerit ngesi akisililingo, kainyo adaunosi ngide keng.”

¹⁶Ebala Ekapolon Akuj kona, “Tojongo akigoro, tomieta ngakiyo anakonyen kon. Kainyo ibusio dang na isubea iyong ngide kon. Ebongunete kesi anakwap a ngimoe.

¹⁷Ejokearosi ngakiro kon monan, ebongunete ngide kon nawi. Ayong Ekapolon Akuj alimu nguna.

¹⁸“Apupi ayong Ngisirael itasionosi ebalasi, ‘Ekapolon Akuj, kikoni sua ibarasit ni eturono, nakaneni kitatami iyong sua akiwap ngakiro. Tobuunae sua. Kisaki sua abongun nikon, Ekapolon Akuj na irai Akuj kosi.

¹⁹Ani kimuleni sua iyong kerumor, kipot atolimosi ngasechesea kosi. Ani keanyun aronis kosi kerumor, atobilakisi sua ngiluutei etasionikinos. Kiruma sua ngileech ka etimoi, kainyo kisechi kolong sua napei kolong eringa kidisiak.’

²⁰“Isirael, irai iyong lokookang lominat, ikoku ni amina ayong noi. Napei kangoiki ayong iyong, atoloma akitam[21] ngakiro kon, tadakun etau kang anikon jiik. Kisieni iyong ayong.

²¹“Kitowo ngapirio sodi kigeronok erot. Toripu erot lokojokon erot lokolong itori iyong na irotokinio. Tobongutu Ngisirael, tobongutu nawi, lorerea lukolong iisikinete esi.

²²Esi ngitunga lu nyimunosi Akuj, Isadanakinete esi tanang ori? Asubak ayong ibore nikitetet anakwap ni ikoni aberu na eikini ekile.”

²³Akuj Namerikanyer na erai Akuj a Isirael, ebala kona, “Naabuunea ayong ngitunga nakwap kech, elimunete nabo anakwap a Yuda ka ngirerea keng kona, ‘Ee emukura a Akuj, ni ibooyo ateneanut, kitopia Ekapolon Akuj iyong.’

²⁴Elomete ngitunga Yuda ka ngirerea keng daang. Epete ngiketak ka ngikeyokok ta ngibaren kech.

²⁵Esiangari ayong lu eburunit, esikwaru daang lu elilimiyorito.”

²⁶ Ani erumor atokienyu ayong, engolia atorukau akwaan kelaka.

²⁷Ebala Ekapolon Akuj kona, “Enangi ngirwa lu elelebea ayong ngitunga ka ngitieng nakwapea a Isirael ka Yuda.

²⁸Loger lokolong achoikinitor ayong atamar adituni, ka ayatar, ka akitukumiyor, ka amunyar ta aukor, achoikini ayong akitakin kesi ka adukokin.

²⁹Na enangea ngirwa ngulu, nyeringa ngitunga elimunete tamasi, ‘Anyamete taapa ngamusabib nakaabarak kisaalik ngikel a ngide kech.’

³⁰ Erai itwaan nicha enyami ngamusabib nakaabarak ngesi isaalikini ngikel keng. Nakaneni etoani itwaan daang kotere akisech keng a ilope.”

³¹Ebala Ekapolon Akuj kona, “Enangi ngirwa lu kichamakinor ayong ka Ngisirael ta ngitunga a Yuda. Eliwor achamunet ngina nakitetet.

³²Nyikwaanikin ka achamunet nakolong kichamakin ayong kata apaakech nakolong atingea ayong ngakan kech epudo alo Misiri. Tani na etusubunor ayong ekile kech, apot kesi nyiirichakis achamunet ngina.

³³Achamunet nakitetet kichamakin ayong ka Ngisirael ngesi naga. Ewaakini ayong etal kang tooma kech, sodi egirak lotai kech. Aliwor ayong Akuj kech, eliworosi kesi ngitunga kang.

³⁴ Emam anikech itwaan itatami itwaan niche tolimok atamar toyen Ekapolon Akuj kainyo kayenete daang ayong napei ani nyeyenikinitae tanang ni eyenikinitae. Arimakini ayong ngasechesea kech nabo nyeringa emarit na ichwanganakinete kesi. Ayong Ekapolon Akuj alimu nguna.”

³⁵Iwaakinit Akuj akolong tacha naparan. Kiwaak elap ka ngikanyer toliworos echayete nakwaare. Itukulauni ngesi anam toloma aruore. Ekiro keng ngesi Akuj Namerikanyer.

³⁶Elimunit ngesi ebala, “Anicha kerubakis ngakiro nguna eyakasi, erubakini Isirael dang erai ebukut, alongaren kang jik.

³⁷“Arai toyei kona itemio adis akolongit adio, ka akireb ni ewaar akwap, kanger ayong Ngisirael kotere daang na asuba kesi. Ayong Ekapolon Akuj alimu nguna.”

³⁸Ebala Ekapolon Akuj kona, “Enangi ngirwa lu ebongokinere akiduk Yerusalem toliwor ere kang, napei alopem alo alo too tanang lokidor lokiitoret.

³⁹Iriwor ekukuor alo too kaneni tanang lomukura a Gareb sodi kiriam Goa.

⁴⁰Adipo daang etia ni etia, ni erai ngalielin tarai ni echakio asakatan, ka ngamanat daang na eyakasi kidiama ingolol a Kidiron napei alokidor a Angole alo eyei kide, eliwor ni italeunitoe. Nyeringa ere ngolo erutorio kori echakario nabo jik.”