Read turkana Yeremia 32 Bible Online

Yeremia 32 - turkana bible

Yeremia 32

¹Katolimok Ekapolon Akuj ayong akiroit ekaru lo a ngitomon lo araakar Sedekia ekapolon a Yuda. Arai ekaru ngolo ani a Nebukadinesa lo a ngitomon ka ngikan-kauni erai ekapolon a Babilonia.

²Ngirwa ngulu, etijiete ngasigerea a ekapolon a Babilonia Yerusalem. Apon ayong katoinikin nalaar a ekapolon a Yuda, ni iteeto ngasigerea ekidor.

³Kainikinit ayong ekapolon Sedekia neni. Kangoikinit ngesi ayong ani alimorea atamar ebala Ekapolon Akuj kona, “Emiekini ayong ekapolon a Babilonia tolema ere logo,

⁴tongopik ekapolon Sedekia kona ebuchar ani a Ngibabiloniae. Erikorio ngesi nia ekapolon a Babilonia. Eanyungari Sedekia ngesi a ngakonyen keng nabo kikobanakinos ngakiro.

⁵ Erikio Sedekia Babilonia, sodi kiboi kaina tanang abuni ayong aanyun ngesi. Tani kitiji ngesi Ngibabiloniae, nyidwangi ngesi kesi. Ayong Ekapolon Akuj alimu nguna.”

⁶Katolimok ayong Ekapolon Akuj akiroit

⁷atamar ebuni Anamel lo erai lokaamaekang alo enyaritae Chalum, katolimok tama, “Togiel amana kang na eyei Anasos na akwap a Benjamen, kainyo iyong irai eyenet kang dir lo ejoikinit igieli.”

⁸Abu Anamel bu aanyun ayong dir loger losek kalimokinitor Ekapolon Akuj. Bu ngesi nalaar na ayei ayong katolimok ayong atamar atogiel amana. Abu ayong atoyen dir atamar Akuj kesuruori ayong.

⁹Atogiel ayong amana ani a Anamel, alo arai lokaamae kang alo Anasos, emarak ayong ngesi ngaropiyae[22] ngatomon ka ngakan-kaarei.

¹⁰Egirak ayong ekiro kang nachamunet ngina ataramak emachar. Atanyarak ngikaanyunak, etem ngaropiyae anaratilio.

¹¹Atolem ayong achamunet na egielit na aramakinitae emachar lo etal, ka nache na amam emachar aramakinitae.

¹²Ani achamunet nagielat, ainak ayong Baruk lokookeng a Neria, tarai etatait a Maseya. Ainak itee Anamel lo arai lokaamae kang, ka ngikaanyunak ngiarei lu egirakinete ngirora kech nachamunet na egielit ta Ngiyaudi daang lu ebooyete analaar a ngasigerea ana keteok ngidorin.

¹³Atolimok ayong Baruk epupete kesi daang kona,

¹⁴“Akuj Namerikanyer na erai Akuj a Isirael, kidungok iyong atamar tolema ngachamunet nugu daang, na a egielit taramakinitetei emachar ka na nyeramakinitae emachar, kiwaak niborosit nilupe, kibooyoto nikooyen.

¹⁵Alimu Akuj Namerikanyer, na erai Akuj a Ngisirael atamar egielio nabo ngakais, ka ngamanat ta ngamanat a ngimusabib anakwap kana.”

¹⁶Arumoret a ainakin Baruk lokookeng a Neria achamunet na agielitae, atagat ayong Ekapolon Akuj abala,

¹⁷“Ee Ekapolon lo irai Ekapolon Akuj! Iyong kolong isubi adis ka akwap a agogongu kon anaationon ka akan kon naationon! Emam ibore kikuruwori iyong.

¹⁸Idodiunit iyong amina kon na nyedaun anabunge anakaalak, nakaneni iriraene iyong ngide kotere ngasechesea kata apakech. Irai iyong Akuj na kiyenikinitae tarai naationon. Erai ekiro kon Akuj Namerikanyer.

¹⁹Iosokinit iyong arere ngakiro daang tosubi naationok. Iteete ngakonyen kon ngakiro daang na esubete ngitunga sodi tosubakinea itwaan daang ngakiro na itemem ka na esubi ngesi.

²⁰Kolong a angorot, isubi iyong ngakiro nakailiilok ka nakatalarak alo Misiri. Isubi iyong nguna tani tokona alo Isirael ka ngibukui luche daang. Kotere ngakiro nguna, kiyenikin iyong tani tokona.

²¹Ipuduni iyong ngitunga kon anakwap a Misiri isubi ngakiro nakailiilok ka nakatalarak. Kipud iyong kesi a agogongu anaationon, tobul ngimoe kech noi.

²²Ibu iyong nak kesi akwap naga na ileleba ngakile ka akimiet a ao, loger lokolong ikongio iyong ani kata apaakech atamar iinakini.

²³Tolomasi kesi nakwap ngina kitiliwosi akech. Nakaneni nyiwapa kesi akiroit kon ka etal. Anakiro ana idungokinit iyong atamar tosuba, nyesuba tani apei. Kotere ngakiro nguna, yau iyong nginyas lugu daang nikech.

²⁴“Kingolik a, adukokis Ngibabiloniae ngakatiputipui esiriam ere esakete akitijikin tolemasi. Elemarete kesi ere logo a akwara, ka eron a akoro ta edeke lo eyei lore logo. Ngakiro nakolong ilimuni iyong eyookinosi dir, itee cha tokona iyong dang.

²⁵ Ee Ekapolon lo irai Ekapolon Akuj kilimok iyong ayong itama, ‘Togiel amana ngina a ngaropiyae iteete ngikaanyunak. Ani kerai Ngibabiloniae ngikalemarak ere logo, ikokinete ngakiro nugu ai?’ ”

²⁶Abu Ekapolon Akuj katolimok ayong akiroit tama,

²⁷“Ayong arai Ekapolon Akuj, na arai Akuj a ngitunga kadaang. Emam ibore kagogongikinit ayong.

²⁸Tokona bocha, epotori ayong ere logo ainak Nebukadinesa lo erai ekapolon a Babilonia tolema.

²⁹Epote Ngibabiloniae lu itijiete ere logo, kichunyakis akim. Inomete ere ka ngakais nakolong adokete ngitunga kinoma emitina a Baal alokidiama, ka abukokin ngakujo nache emuna, esakete akitililere ayong.

³⁰Napei kolong a angorot, esubete Ngisirael ka ngitunga a Yuda ngakiro naaronok jiik. Ketilileta kesi ayong a ngakiro anaaronok esubete.

³¹Napei kolong adukere ere logo tanang tokona, ketongoa ayong ngitunga a ere kalo ketilileta. Kotere nguna, enyasuni ayong ere logo atojongo akitere.

³²Ketongoa ayong ngitunga a Yuda ka lua Yerusalem ketilileta kotere ngakiro naaronok asubete kesi aapei ka ngikapolok kech, ka ngikarikok, ka ngimurok ta ngikadwarak kech.

³³Apot kesi katoreikis ayong ngakawa meere ngireetin kech. Tani na etatamea ayong kesi atobongonok, nakaneni apot towout akiirar ngakiro.

³⁴Kitowaa kesi ngakujo nasubuna nakikadakinete alotooma akai nakelipitere ayong, kinyasut.

³⁵ Adukokis kesi ngikenoi lu ipeyonokinioto Baal anadipo a lokookeng a Inom, kipeyonokinioto akuj nabe Molek ngide kech lusapa ka lupesur. Nyedungokina kolong ayong kesi atamar tosuba kongina, kori peetamit ayong tani atamar esubete kesi ngakiro na ikote nguna, kitosecha ngitunga a Yuda.”

³⁶Ekapolon Akuj na erai Akuj a Isirael, kalimokini ayong tama, “Yeremia, ebalasi ngitunga akwara, ka akoro ta edeke itelemari ekapolon a Babilonia ere logo. Kiira tokona ngakiro na alimuni ayong.

³⁷Achununi ayong ngitunga anakwapea kadaang ana kolong apetakini ayong kesi na angoitor anyunyura. Abuuni ayong kesi nege kiboyoto akaalimon.

³⁸Eliworosi kesi ngitunga kang, atoliwor ayong Akuj kech.

³⁹Ainakini ayong kesi etau epei ka erot epei, katokereta kesi ayong jik, taanyuneta ka ngalesea kech na isidiunosi ngakiro naajokak.

⁴⁰Kichamakin ayong ka kesi achamakin naka jik. Nyamuleni ayong kesi kori nyaisikini atama ajongoe asubea kesi naajokak. Etiliwori ayong kesi lukakerito ayong alotai kech, nyereatar kesi wache anikang.

⁴¹Ee robo, alakar ayong kotere kesi, atosubea naajokak. Etakini ayong kesi nakwap naga jik, a etau kang kadaang ka akiyar kang daang.”

⁴²Ebala Ekapolon Akuj kona, “Eger lo ayaunea ayong ngakiro naaronok nugu daang nakwap naga, ekokini neni ayauni nikech ngakiro naajokak daang na echikak ayong.

⁴³Ebalasi ngitunga ikokini akwap naga ariet na emam ngitunga ka ngitieng eyakasi. Ebalasi nabo dang ainakin kolong Ngibabiloniae. Nakaneni egielio ngamanat nabo anakwap kana.

⁴⁴Egielete ngitunga ngamanat a ngaropiyae, kigirae ngirora lu egielaritere, taramakinae emachar pena ngikaanyunak. Esubakinosi nguna anakwap a Benjamen, ka ngadakarin na idunyatar Yerusalem, ka ngirerea a Yuda, ka ngirerea a akwap ana a ngimukur, ka ngaukon ta Negeb. Abuakini ayong ngitunga nakwap kech. Ayong Ekapolon Akuj alimu nguna.”