Read turkana Yeremia 33 Bible Online

Yeremia 33 - turkana bible

Yeremia 33

¹Ani eringa ayong kainikinitae nalaar na ngasigerea ana iteete ekidor a ekapolon, abu akiroit a Ekapolon Akuj bu nia Yeremia na a ngaarei.

²Ekapolon Akuj nakolong asubi akwap, tosub kiwaak ni tokona eyei. Elimokinitae ngesi ekiro be Ekapolon Akuj. Katolimok ngesi ayong tama,

³“Tanyarae ayong, nakaneni ekii ayong, kedodik iyong ngakiro naapolok namunonoe na nyiyeni iyong.

⁴Ayong Ekapolon Akuj na arai Akuj a Ngisirael, abala eyatario ngakais na eyakasi Yerusalem ka ngakais na ngikapolok a Yuda kiratakinere ngimoe

⁵alojie alo ajiere ka Ngibabiloniae, nakaneni ilelebunosi ngawat a ngitunga a Yerusalem nakais. Eraakasi ngawat nguna ngaka ngitunga alu aari ayong kotere angoit ka anyunyura. Amuleni ayong ere logo kotere ngakiro naaronok asubete ngitunga a ere.

⁶Nakaneni etangalekini ayong ngidekesinei kech tojoketa. Etangalekini ayong ngidekesinei a ngitunga kang emiek kesi kiboikinos akaalimon isilito noi.

⁷Abuuni ayong ngitunga a Yuda ka Ngisirael lukolong arikio, etojok kesi kikokis nikolong a ekingaren.

⁸Etesegi ayong kesi anakisech kadaang anakolong kasechakinete kesi ayong. Arimakini ayong kesi ngasechesea kech ka aronis nakangeritotor ayong.

⁹Eliwor ekiro a ere kalo anikang eka alakara, ka ekipur ta aruonu. Eemete ngitunga a akwap kadaang tamaranikis na iirareta ngakiro naajokak na asubea ayong ngitunga a Yerusalem ta ajako daang na ainakini ayong kesi.”

¹⁰Tolim Ekapolon Akuj tama, “Ebalasi ngitunga ikoni akwap naga ariet, na emam ngitunga ka ngitieng eyakasi. Iyookinito kesi nguna. Ngirerea a Yuda ka ngirotin a Yerusalem, esilok. Emam ngitunga ka ngitieng eyakasi neni. Nakaneni iirario moi nabo alorerea kangulu

¹¹ elale ka akimaritetere, ka ekare lo imwomworere anakuuta. Iirari iyong ngitunga eeosi esaa lo eyauneta ngakipeyos kai kang, ngakipeyos nakabuanakineta ayong alakara. Etamarete kesi, ‘Tobuakisi Akuj Namerikanyer alakara kainyo ejok ngesi nabo erai amina keng na nyedaun jik.’ Abuuni ayong ngitunga a akwap kana lukolong arikio kikokis nikolong a ekingaren. Ayong Ekapolon Akuj alimu nguna.

¹²“Anakwap ana ikoni ariet kana, ana emam ngitunga kori ngitieng eyakasi, epete nabo ngachokorin na iyokiyete ngikeyokok ngamesekin kech.

¹³ Alorerea a akwap ana a ngimukur, ka ngaukon, ka kuju Yuda, ka akwap a Benjamen, ka ngadakarin na idunyatar Yerusalem ta ngirerea a Yuda, iisete nabo ngikeyokok ngibaren kech kaneni. Ayong Akuj Namerikanyer alimu nguna.”

¹⁴Ebala Ekapolon Akuj kona, “Enangi ngirwa lu eyookinio ayong ngakiro nakolong kichikakin ka Ngisirael ta ngitunga a Yuda.

¹⁵Ani enangi ngirwa ngulu, etukurupupuuni ayong ateni na etenoono a Daudi tosub na eriyan anakwap.

¹⁶Ngirwa ngulu, eyuunio ngitunga a Yuda, kiboikinos Ngisirael akaalimon. Enyarao ngesi ‘Ekapolon Akuj na erai ateneanut yok.’

¹⁷Ayong Ekapolon Akuj echikakinit atamar ngirwa daang, nyengopi alesit a Daudi na eliwor ekapolon alo Isirael.

¹⁸ Ngirwa daang, eliworosi ngimurok a ekitela a Lawi lu esubete etich kang, ka akipeyore ngakipeyos na inomio, ka ngakipeyos a ngalemet ta ngakipeyos nache.”

¹⁹Katolimok ayong Ekapolon Akuj akiroit tama,

²⁰“Kichamakin ayong ka apaaran ta akwaar atamar toliworos etakanunete esaa lo itemokino. Nyichwangakinio achamunet ngina.

²¹Aloger alopei kangolo, kichamakin ayong tani ka ekasuban etich kang Daudi atamar ngirwa daang, emini alesit keng na eliwor ekapolon. Kichamakin nabo ayong ka ngimurok lu ekitela a Lawi atamar esubete kesi etich kang ngirwa daang. Nyichwangakinio ngachamunet nguna jik.

²²Eger lo emamakar kona imarunio ngikanyer lu eyakasi nadis, ka eger lo emamakar kona imarunio asinyen a ekwaas a anam, etalalae ayong ngalesea a ekasuban etich kang Daudi totiata neni. Etalalae tani ngimurok kang Ngilawi totiata neni.”

²³Katolimok ayong Ekapolon Akuj akiroit tama,

²⁴“Ingolik iyong atamar ebalasi ngitunga lugu anger ayong Isirael ka Yuda, ngitela luarei lukolong aseuni ayong a? Imenyarito kesi ngitunga kang loger ngolo. Nyeringa nabo itamito atamar eraakasi ebukut eche lo iteo.

²⁵Nakaneni kichamakin ayong Ekapolon lo arai Ekapolon Akuj ka apaaran ta akwaar. Ewaak ayong ngitalio lu erikete akwap ka kidiama.

²⁶Ani kona asubakinea ayong nguna, erichakini ayong achamunet kang ani a ngalesea a Yakobo, ka ekasuban etich kang Daudi. Aseuni ayong alesit a Daudi epei topolok ngalesea a Aburaam, ka Isaka ta Yakobo. Abuuni ayong ngitunga kang lukolong arikio, atorimak.”