Read turkana Yeremia 34 Bible Online

Yeremia 34 - turkana bible

Yeremia 34

¹Katolimok ayong Ekapolon Akuj akiroit ngirwa lu etijio ekapolon a Babilonia lo anyaritae Nebukadinesa ngitunga a Yerusalem ka ngirerea lu edunyatar. Nebukadinesa ka ngasigerea keng, ibakito ka ngikapolok daang a ngakwapea ka ngitela lu apolokinit ngesi.

²Ekapolon Akuj na erai Akuj a Isirael, abu katolimok ayong atamar atolot atolimok ekapolon Sedekia kona, “Abala ayong Ekapolon Akuj, epotori ere logo ainak ekapolon a Babilonia, kichunyak akim.

³Nyibuchar iyong. Kirumunio iyong kitorikor nikeng. Ianyungari iyong ekapolon a Babilonia a ngakonyen kon a ilope, kikobanakinos ngakituk. Ani erumor tolot Babilonia.

⁴Sedekia, topupok ngakiro kon na eruoro ayong. Nyikiarakinio iyong lojie.

⁵ Itoani iyong akaalimon, kinoma ngitunga emitina kitonuketa iyong loger lokolong enometa na atoaketa ta apaakon lukolong sek araakasi ngikapolok. Kigorotor kesi iyong tamasi, ‘Oitiakoi kare ekapolon kosi!’ Ayong Ekapolon Akuj alimu nguna.”

⁶Abu ayong esisak ekapolon Sedekia ngakiro nguna daang alo Yerusalem

⁷esaa lo etijikinitotor ngasigerea a Babilonia Yerusalem ka ngirerea a Yuda daang lukolong edongito, Lakich ka Aseka lu araakasi ngirerea ngiarei make lu aringa ngawasea eyakasi.

⁸Katolimok Ekapolon Akuj ayong Yeremia akiroit, kerumo ekapolon Sedekia achamakin ka ngitunga a Yerusalem atamar kilachakini

⁹ngikedalak kech lu araakasi Ngieburaniae, lukiliok ka luberu aapei, sodi nyeemin Esiraelit lo erikit Esiraelit loche erai ekedalan keng.

¹⁰Tachamut ngitunga daang ka ngikarikok kech alachakin ngikedalak kech, nyiitiliwosi ngikedalak nabo jik. Apot kesi talachakis ngikedalak,

¹¹ ani ekisidi tobilunos tobuasi ngikedalak luberu ka lukiliok lusek alachakinete kesi, kitingakis kesi aliwor ngikedalak nabo.

¹²Katolimok ayong Ekapolon Akuj akiroit tama,

¹³“Ayong Ekapolon Akuj na arai Akuj a Isirael abala, kichamakin kolong ayong ka taapaakus nakolong epudunio kesi alo Misiri, sodi atalachak kesi anaenanot. Atolimok ayong kesi atamar

¹⁴adaunet a ngikaru a ngikan-kapei talachakis itwaan ni erai Eburaniait daang ni asub etich kech a ngikaru a ngikan-kapei. Apot taapaakus towout adetar ngaki kiirasi ngakiro kang.

¹⁵Been kona, ipot esi toriangakinos tosubakis ngakiro na ajoikinete ngakonyen kang. Tachamut esi daang atamar ilachakinete Ngisirael, ngitunga kus. Tachamakinos esi alongaren kang, alokai ana kelipitere ayong.

¹⁶Nakaneni todepasi esi nguna nabo, kisuruma ekiro kang ngileech. Ipot esi daang tobuasi ngikedalak lusek ilachakinete esi loger lo asaketa, kitingakis esi kesi aliwor ngikedalak nabo.

¹⁷Tokona bocha, abala ayong Ekapolon Akuj nyiwapa esi ngakiro kang. Nyelachakina esi Ngisirael, ngitunga kus. Ani kikote neni, ketiliwori ayong esi lu ilachakina. Alachakin kus ngesi atoanikin nakwara, ka edeke ta akoro.

¹⁸Ngitunga lu asechete achamunet kang, towout akiyookin ngakiro a achamunet ana kolong achamakinosi alongaren kang, esikokini ayong kesi itaok ni apakete kesi ngaarei, ani erumor kitoro kiding ngapaket naarei nguna.

¹⁹Ngikarikok a Yuda ka Yerusalem, ka ngikasubak etich alokai a ekapolon, ka ngimurok a Akuj ta ngitunga daang lu etorete kiding ngapaket naarei a itaok,

²⁰epotori ayong ainak ngimoe kech lu esakete akiar kesi. Enyamete kesi ngataruk ka ngibuin ngawat kech.

²¹Epotori ayong tani Sedekia lo erai ekapolon a Yuda ka ngikarikok keng luche ainak ngimoe kech lu esakete akiar kesi. Ajali ayong kesi epotok ngasigerea a Babilonia, na ajongoto akitijikin esi.

²²Kingolikisi a, adunguni ayong akiroit tobongut kesi lore logo. Itijikinete kesi, tolemasi, kichunyakis akim. Esikokini ayong ngirerea a Yuda alaireng na emam itwaan elomit. Ayong Ekapolon Akuj alimu nguna.”