Read turkana Yeremia 36 Bible Online

Yeremia 36 - turkana bible

Yeremia 36

¹Ekaru lo a nguomwon lo araakar Yeoyakim ekapolon a Yuda, katolimok ayong Ekapolon Akuj akiroit tama,

²“Tolem akitab kigirak ngakiro daang nakalimok ayong iyong kotere Isirael, ka Yuda ta ngibukui luche daang. Kigirak ngakiro daang nakalimok ayong iyong napei kolong esiakinea ayong akisuruor iyong na araakar Yosia ekapolon tanang tokona.

³ Ani tokona ngon kiirasi ngitunga a Yuda nginyas daang lu asaki ayong ayaun nikech, ereunosi aloboyor kech aloaronon. Sodi atorimak ayong aronis kech ka ngasechesea.”

⁴Abu ayong atanyarau Baruk lokookeng a Neria, esisak ngesi ngakiro daang nakalimokini Ekapolon Akuj. Kigirak Baruk ngakiro nguna daang nakitab.

⁵Atolimok ayong Baruk ngakiro nugu, “Nyekachamakinitae ayong alomari kai a Akuj.

⁶Nakaneni asaki ayong iyong tolot neni akolongit na eronitotor ngitunga akimuj, kisomak akitab irema, sodi kiirareta ngitunga ngakiro daang nakalimokini ayong Ekapolon Akuj kesisak ayong iyong. Kisoma kongina kiirarea itwaan, aapei ka ngitunga a Yuda lu eponito neni alorerea kech.

⁷Kori tokona ngon epedorete kesi akilip Ekapolon Akuj toreeunos aloboyor kech aloaronon, kainyo erono angoit ka anyunyura na elimitor Ekapolon Akuj ngitunga lugu.”

⁸Sodi kisoma Baruk ngakiro a Ekapolon Akuj alokai a Akuj loger lo alimokinitor ayong ngesi.

⁹Ekaru lo a ngikan elap lo a ngikan-koomwon lo araakar Yeoyakim ekapolon a Yuda, apot ngitunga torono akimuj esakete akitalakar Ekapolon Akuj. Kirichakis ngitunga daang lu alomito Yerusalem aroneenen akimuj ngina, kirichakis tani daang lu apote alorerea a Yuda, pot neni.

¹⁰Ani eringa ngitunga epupokinito, kisomak Baruk anakitab ngakiro daang nasek alimuni ayong. Asubakini ngesi nguna alokai a Akuj, anamaniyat a Gemaria, lokookeng a Chapan, alo arai ekegiran anitubet ekies. Ayei amaniyat keng nalaar na alokidiama, diyete ekidor lokitetet akai a Akuj.

¹¹Abu Mikaya lokookeng a Gemaria, lo arai etatait a Chapan, kiira Baruk isomae anakitab ngakiro nasek alimunit Ekapolon Akuj.

¹²Tolot ngesi kai a ekapolon, toloma namaniyat a ekegiran na eyei nitubet ekies. Eriamiriamito ngikapolok daang neni. Ngirora a ngikapolok kangulu kesi Elichama lo erai ekegiran anitubet ekies ka Delaya lokookeng a Chemaya, Elinasan lokookeng a Akibor, Gemaria lokookeng a Chapan, Sedekia lokookeng a Anania, ayakasi neni ka ngikapolok luche daang.

¹³Kisisak Mikaya kesi ngakiro daang na eirari Baruk isomakini ngitunga.

¹⁴Apot ngikarikok tomeasi Yeudi (lo erai lokookeng a Nesania, tarai etatait a Chelemia, alo erai lokookeng a Kuch) alimokin Baruk atamar yau akitab nasek esomakini ngesi ngitunga. Inu Baruk kesi akitab.

¹⁵Tamasi kesi, “Kiboikin, sodi kisomak sua ngakiro na igiritae nakitab ngina.” Kisomak Baruk.

¹⁶Ani kisoma ngesi kerumor, tokienyanakinos ebulit tamasi, “Kilimokini sua ekapolon ngakiro nugu.”

¹⁷Apot kesi kingita Baruk tamasi, “Tolimokinae tokona sua, ikokini iyong igiri ngakiro nugu daang ai? Kori robo Yeremia kisisakini iyong?”

¹⁸Tatachu Baruk tama, “Yeremia kesisakini ayong ngakiro daang, egirak ayong a ewino nakitab naga.”

¹⁹Apot kesi tolimokis Baruk tamasi, “Kapesi iyong ka Yeremia toduka. Warasi itwaan nyeeyen ni iyakasi esi.”

²⁰Apot ngikapolok kiwaakis akitab ngina namaniyat a Elichama alo arai ekegiran anitubet ekies. Toloto kesi nia ekapolon tolimokis ngakiro daang.

²¹Tomea ekapolon Yeudi ayaun akitab ngina. Tolem ngesi anamaniyat a Elichama sodi kisomak epupi ekapolon, ka ngikapolok luche daang eriamito ngesi.

²²Araakasi ngirwa ngulu lua akatorot, ebooyi ekapolon alokai keng ana akiporo, epiara akim.

²³Ani napei eirarea ngesi ngilainio nguuni kori nguomwon, totub a ebanyet tachakak nakim. Torubak ngesi ikwaanakini neni tanang inomi akitab daang.

²⁴Nakaneni emam tani ekapolon kori epei a ngikasubak etich keng lu apot toema kori tochilichileta ngiworui kech ialolongete na eirareta ngakiro nguna daang.

²⁵Tani na emaimaeta Elinasan, ka Delaya ta Gemaria ekapolon esakete nyiinom akitab ngina, towou ngesi apupokin ngakiro kech.

²⁶Abu ekapolon todungok lokookeng a ekapolon lo anyaritae Yerameel, ka Seraya lokookeng a Asiriel ta Chelemia lokookeng a Abideel atamar kerumut ayong ka ekegiran kang Baruk. Nakaneni kidaa Ekapolon Akuj sua.

²⁷Ani inomi ekapolon Yeoyakim akitab na esigiri ayong Baruk kerumor, katolimok ayong Ekapolon Akuj akiroit tama,

²⁸“Tolem akitab ache kigir ngakiro daang nakolong ayakasi nakitab na ekingaren nakolong enomi Yeoyakim, ekapolon a Yuda.

²⁹Ani eliwor Yeoyakim ekapolon a Yuda, ilimokini iyong ngesi atamar ebala Akuj Namerikanyer kona, ‘Abe inom iyong akitab, niti ibala nyo egirea Yeremia atamar ebuni ekapolon a Babilonia kinyasu akwap naga ka akiar ngitunga ka ngibaren.

³⁰Tokona bocha, ayong Ekapolon Akuj kalimokinit iyong ekapolon a Yuda atamar emam alesit kon nabo jik na epolokini anapolou a Daudi. Echakario akwaan kon nikalapatan ni enomea akolong naparan, tokutak akatorot nakwaare.

³¹Kerirae ayong iyong, ka ngalesea kon ta ngikasubak etich kon kotere ngasechesea na isubete esi daang. Ayauni ayong nikus ngakiro naaronok daang nguna alimu atamar ayauni, towout esi akiirar. Ayauni ayong ngakiro napei nguna nia ngitunga a Yerusalem ka Yuda.’ ”

³²Abu ayong atolem akitab ache ainak Baruk lokookeng a Neria, lo arai ekegiran kang. Kigirak ngesi ngakiro daang na esisakini ayong. Kigirak ngesi ngakiro daang na alimokini ayong, nakolong ayakasi nakitab na enomi ekapolon a Yuda lo enyaritae Yeoyakim. Kiatakinae nabo ngakiro ngache na ekwaan ka nguna.